Ads by Google Ads by Google

Ta’utino Vaitinasa e le toe tula’i mai ni fa’afitauli i faleaoga i le lumana’i

O fuafuaga ua faataoto e le Matagaluega o Aoga a le malo ina ia foia ai le toe tula’i mai o faafitauli i faleaoga, lea na mafua ai ona tolopo le amataina o aoga a le malo mo le lua vaiaso i le masina na te’a nei, ua maea ona fa’ataoto e le mataluega.

 

E to’afa sui o le Matagaluega o Aoga ua tofia i se komiti faapitoa latou te galulue faatasi ma le Vaega o le School Lunch, i le mata’ituina lea o auala uma ina ia mautinoa e le toe tula’i mai le faaletonu i faleaoga ma fale’ai a aoga ta’itasi, lea na mafua ai ona tapunia e le Matagaluega o le Soifua Maloloina ni isi o aoga i le masina na te’a nei.

 

“O le agaga autu ua mafua ai ona tofia i latou nei, ina ia aua ne’i toe tula’i mai faafitauli e pei ona aafia ai faleaoga i le atunuu, ma ou te tautino atu fo’i e le toe tula’i mai ni faaletonu pe afai e galulue fa’amaoni i latou ua tofia i lenei komiti,” o le saunoaga lea a le tamaitai faatonusili o aoga ia Vaitinasa Dr. Salu Hunkin-Finau i luma o le Komiti o Aoga a le maota o sui i le vaiaso nei i se iloiloga sa faia ai e faatatau i mataupu o lo o tula’i mai i totonu o aoga i le atunuu.

 

O i latou e to’afa ua taua o ‘Quality Control’ e pei ona faamaonia e Vaitinasa i luma o le komiti, o le latou galuega o le asia lea o faleaoga uma i le teritori ma tuuina atu sa latou ripoti i le Ofisa o Aoga, e tusa ai o tulaga o lo o i ai faleai, faletaele ma potu aoga i aoga taitasi.

 

O le tamaitai faipule ia Vui Florence Vaili Saulo na lagaina le mataupu e faatatau i ni auala e tatau ona faatino e le matagaluega e puipuia ai faleaoga mai le toe faaletonu i se taimi o i luma.

 

Saunoa Vui e faapea, o lona itumalo o Tualauta e pito sili ona tele aoga o lo o i ai nai lo isi lava itumalo, ma e tatau fo’i ona i ai se fuafuaga faataoto a le matagaluega o aoga e mata’ituina ai le tausia lelei o faleaoga ina ia tumau le lelei ma aua ai ne’i toe tula’i mai le faaletonu e pei ona maitauina i le masina na te’a nei.

 

Na faamanino atili e Vaitinasa i luma o le komiti e faapea, e le gata ua tofia ‘Quality Control’ e toafa e galulue ma le School Lunch ina ia mautinoa e tumau tulaga lelei o faleaoga, ae o masina uma fo’i latou te fono ai mo le faailoaina atu o le tulaga o lo o i ai faleaoga.

 

E tusa ma le $1miliona na faaalu e le matagaluega o aoga e toe faaleleia ai faaletonu na aafia ai faleaoga uma i le atunuu.

 

O se tasi o faaopoopoga i le tupe faasoasoa a le matagaluega o aoga mo le tausaga tupe fou 2014 e pei ona saunoa Vaitinasa, e le gata o le a faa faigaluega ai ni isi e vaaia lelei faletaele (bathroom monitor), ae o le a toe faa faigaluega ai ni isi tagata kamuta e fesoasoani ia i latou e to’a 15 o lo o galulue i le vaega a le ‘Maintainance’ mo le faaleleia o vaega o faleaoga e manaomia le toe faafouina.

 

“Ou te faafetaia le alii kovana ona o lona naunau e tuu mai lana fesoasoani i le matagaluega o aoga, ina ia mautinoa e lelei faleaoga e a’oa’oina ai fanau a le atunuu,” o le saunoaga lea a Vaitinasa.

 

Na taua e le alii faipule ia Larry Sanitoa e faapea, o aoga uma o lo o i totonu o le itumalo o Tualauta atoa ai ma aoga uma i le atunuu, sa tuuina atu ai fo’i le fesoasoani a le matagaluega o aoga i le tele o tausaga ua mavae, i le toe faaleleia ma le faafouina o vaega sa faaletonu, peitai e foliga mai e tiga lava ona taumafai le matagaluega e faaleleia faleaoga, faleai ma faletaele, ae leaga lava ona o fanau.

 

Na faafetaia e Vui ma Sanitoa ia Vaitinasa e tusa ai o galuega lelei o lo o faia mo le faaleleia o faleaoga i le atunuu.

 

Na taua e Vaitinasa e faapea, e le’i faateia o ia ina ua tuuina atu le ripoti a le matagaluega o le soifua maloloina e tapunia aoga, ae foliga mai sa faatamala le matagaluega i le faatinoina o ana tiute tauave i tausaga ua mavae, ae ua aoga fo’i faaletonu na tutupu ma itu ua toe faaleleia ai faleaoga i le atunuu.