Ta’utino Teutupe o lo o tulaga lelei tupe maua malo

E ui i ni finagalo fa’aalia o ni isi o faipule e le o tulaga lelei ripoti i tupe maua a le malo mo le tausaga tupe lenei 2014, e pei ona valoia e le malo i le taimi na fa’alauiloa ai le Paketi a le malo, peita’i na taua e le Teutupe a le malo ia Dr. Falema’o Phil Pili i luma o le maota o sui i le taeao ananafi, o lo o tulaga lelei tupe ao a le malo, ma e i ai lona talitonuga e ausia e le malo tupe sa valoia e maua i totonu o le tausaga tupe lenei.

 

“E le lelei sa’u moe i po ta’itasi, ou te tuli vae fo’i i le Atua i po uma ina ia alofagia tulaga o fa’agaioiga a le malo i lona tamaoaiga, ina ia sologa lelei pea ma manuia mo le atunu’u,” o se vaega lea o le saunoaga a Dr. Falema’i i se iloiloga sa faia a le Komiti o le Paketi a le maota o sui ananafi.

 

O le ta’ita’ifono o le Komiti o le Paketi a le maota o sui ia Timusa Tini Lam Yuen na fesili i le teutupe, pe le o i ai se isi fuafuaga a le malo e toe faia ni isi suiga i tulaga o tupe e tatau ona maua mai i le tausaga tupe lenei, ona o lea ua maitauina e le o talafeagai tupe sa faamoemoe e maua ma tupe o lo o taua i le ripoti ua mafai ona maua e le malo i le taimi nei.

 

“Ou te talitonu afai e tulaga lelei pea auala e tolu o lo o sau ai i totonu tupe maua a le malo, e oo atu i le faaiuga o le tausaga tupe lenei ua ova tupe e ao e le malo ma tupe sa fuafuaina e maua,” o le saunoaga lea a Dr. Falema’o.

 

I le ripoti lea na tuuina atu e le Teutupe i luma o le Fono i le vaiaso nei, o lo o taua ai tulaga nei, talu mai le amataga o le tausaga tupe lenei ia Oketopa 1, 2013 e oo mai i le aso 18 Mati 2014 na te’a nei, e $42 miliona ($42,803,006.40) le aofa’i o le tupe ua mafai ona ao mai e le malo i totonu, ae $41 miliona ($41,364,797.74) le aofa’i o lana tupe fa’aalu.

 

O le $40 miliona o le tupe sa ao mai e le malo i totonu e pei ona saunoa Dr. Falema’o, o le tinoitupe (cash), ma o iina e ta’u mai ai o lo o malosi ma lelei tulaga o tupe ao a le malo i masina ta’itasi.

 

E tele isi alaga tupe a le malo e le i maua mai mo le tausaga tupe lenei, ma o le tele lava o nei alaga tupe o vaega tupe mai le feterale, e pei o le $1.1 miliona mai le ‘Maliliega o le Tapa’a.’

 

“Fa’atoa iloa tonu lava le tulaga e taoto ai tupe maua a le malo pe a mae’a le kuata tolu o le tausaga tupe lenei, lea e mae’a ia Iuni 2014, ae mo le taimi lenei, o lo o tulaga lelei pea tupe maua a le malo,” o se vaega lea o le saunoaga a le teutupe.

Comment Here