Ads by Google Ads by Google

TA’UTINO TA’ITA’I MALAGA NA TE LE I AIA SE TUPE

E tiga lava ona malolosi 'upu ma tala na lafo e sui o se tasi o 'aulotu i le tamali'i sa ta'ita'ia le malaga sa'ili tupe a le 'aulotu na alu i Amerika, o ia e to'atasi lea ua mafua ai ona tele le vaega tupe sa maua mai i le malaga ua leiloa, peita'i e tasi lava le tali a le ula lea, “ou te le i aia se tupe, ou te le iloa se mea.”

O le lua ai lenei o vaiaso talu ona le maua se to’a filemu i le lotoifale o le Ekalesia Kerisiano lenei i se tasi o pitonu'u o Tafuna, ina ua taunu'u mai le malaga a le 'aulotu sa alu i Amerika mo le fa'amoemoe e fausia ai se falesa fou, ae emo ane le ata ina ua le tala o le tupe, e silia i le $12,000 le tupe o aofia i le ripoti a le ta'ita'i malaga ma lana komiti, e ui o lo o tamau lava le ta'ita'i malaga ma lana komiti i la latou mau, o le tupe uma lava lea o le malaga.

O le fonotaga lona lua a le 'aulotu lea na faia i le na te’a, na ta'ua ai e ni molimau le papatutu’i o le fale o le Ekalesia i tagata 'aulotu na lolofi atu e fia fa'alogologo po o fea o le a i’u i ai le mata'upu lenei.

“E o'o lava i kagaka 'auloku ia ua ka’i fa i le ka’i ogo masiga e le’i koe o'o aku i se falesa, ga o aku uma i le fia maua o le 'au o le paipa po o ai o le a pau i ai le uluulu o le la'au i kupe o le malaga,” o le fa'amatalaga lea a le molimau lea sa ia fa'ailoaina mai i le Samoa News le mata'upu lenei a le 'aulotu.

Ina ua amata le fono ma tu'u atu le avanoa i le ta'ita'i malaga ma lana komiti i la latou ripoti, na atagia mai ai i le ripoti e i ai isi tupe sa maua i le sa'iliga tupe e le o i totonu o le ripoti, ma o tupe ia fai mai le ta'ita'i malaga, sa fa'aaoga i mea'ai ma ni isi o manaoga a le 'au malaga ao i ai i Amerika.

O isi tupe sa foa’i ane e ni isi o faife'au ma latou 'aulotu e alolofa ane ai i le 'au malaga na taua e le ta'ita'i malaga, sa fesoasoani e fa'atau ai oso a le 'au malaga ina ua sauni e toe fo'i mai.

Ae i le ripoti na fofola atu e le isi vaega o le 'au malaga lea o lo o tete’e i le ta'ita'i ma lana komiti, o lo o manino mai ai i le ripoti lea igoa o 'aulotu ma le aofa'i o le tupe sa latou fesoasoani ane ai i le 'au malaga.

E o'o lava fo'i i tupe sa maua mai i galuega na fa'atinoina e le 'au malaga o lo'o i ai uma i totonu o le ripoti e aofia ai ma lisiti.

Fai mai le molimau, na fa'amatala e le isi a’oa’o sa alu ai i le malaga e fa'apea, e masani ona la o ma le isi sui o le komiti e lafo mai tupe i le to'alua o le ta'ita'i malaga ma le fa'aupuga, o tupe o lo o maua mai i le fanau a le ta'ita'i malaga o lo o i fafo, lea ua lafo mai i Samoa i lona to'alua ma lana fanau.

Fai mai le molimau, ua taua'ao e le isi vaega o le 'au malaga lisiti o tupe sa lafo mai e le ta'ita'i malaga ma ni isi o lana komiti i o latou aiga i Amerika Samoa nei, lea e aofia ai ma fa'amatalaga e uiga i le ta'avale fou a le ta'ita'i malaga sa fa'atau i Amerika.

Ua i ai le fa'amoemoe o le ekalesia e tatau ona o'o atu i le isi a latou fonotaga o lo o loma nei, ua mautu se fa'aiuga e uiga i ripoti e lua o le malaga, atoa ai ma le sa'ilia o ni fa'amaoniga o isi fa'amatalaga e uiga i tupe sa lafo mai i aiga o sui o le komiti atoa ai ma le ta'avale a le ta'ita'i malaga lea ua maua tala sa faa'tau ao i ai i Amerika.

Fai mai le molimau, e le o mautu mai lava i le taimi nei po o le a se faa'iuga a le faife'au ma le 'aulotu e fai lenei mata'upu, se i vagana ua fa'amaonia ma mae'a fonotaga o lo o faia.