Na ta’utino e le Step Father o le teineititi e 16 tausaga le matua lea na aafia i ni faiga faasolitulafono mataga i luma o le Faamasinoga Maualuga i le vaiaso nei, e faamaonia tuuaiga a le malo faasaga ia te ia, i lo la momoe lea ma si ona afafine fai i le masina o Ianuari na te’a nei, ma o lea gaioiga sa ia faia e le tusa ai ma ala o le tulafono.

Ina ua fesiligia e le faamasinoga le alii lea e 49 tausaga le matua na ia taua ai, a’o moe i le po, na faateia o ia ina ua taavale mai lona afafine ma moe mai i ona tafatafa, ona ia nofo lea i luga ma tago atu i le ie afu ma toe faaafu ai o ia, peitai sa le mafai ona ia taofiofia le malosi o faaosoosoga a le tiapolo ia te ia i lea taimi, ma i’u ai loa ina la momoe ma si ona afafine.

O le alii lea sa uluai tuuaia e le malo i moliaga mamafa e aofia ai le faiaiga ma se teineititi e laititi i lalo o le tulafono, faia o uiga mataga faafeusuaiga, faiaiga ma se teineititi e aiga i ai, atoa ai ma lona faia o ni uiga e ono lamatia ai le saogalemu o se fanau laititi.

Ae i le maliliega lea na ia sainia ma le malo lea foi ua talia e le faamasinoga, na ia ioeina ai loa le moliaga mamafa o le faiaiga ma se teineititi e laititi i lalo o le tulafono, ma le moliaga mama o lona faia o ni gaioiga e ono lamatia ai le saogalemu o se fanau e laititi i lalo o le tulafono.

I se vaega o le maliliega na sainia e lenei alii ma le faamasinoga, ua ia tautino ai e faapea, o le gaioiga sa ia faia i lona afafine fai, o le a faatupuina ai ni aafiaga i lona mafaufau mo isi aso o loo totoe o lona ola.

Ua manatu loia o le a tuuina atu ni a laua fautuaga i le faamasinoga mo se faasalaga mama mo lenei alii, peitai ua malamalama le ua molia, tusa lava pe talosaga loia i le faamasinoga mo se faasalaga mama mo ia, e pule le faamasinoga pe talia pe teena ia fautuaga.

Ua ia malamalama foi ma iloa, e le mafai ona toe suia lana tali ioe ua tuuina atu i le faamasinoga, pe afai e tuuina mai se faasalaga a le faamasinoga ae le fiafia i ai lona loto, aua o loo i ai i le faamasinoga le malosi e faasala ai o ia i soo se faasalaga e manatu le faamasinoga e talafeagai mo le solitulafono sa ia faia.

I faamaumauga a le faamasinoga o loo taua ai, o le va  o le masina o Ianuari 2010 ma Iuni 2011 na tulai mai ai lenei faalavelave, ae na faatoa alia’e i le masina o Iuni na tea nei, ina ua maua mai e le tuagane o le teineititi na aafia le ua molia, o loo taoto atu i luga o lona tuafafine.

Na te’i i luga le teineititi na aafia a’o moe ina ua ia faalogoina lona tuagane o loo vava o i totonu o le fale, ma ia iloa ai o loo tuli e lona tuagane le ua molia i fafo ma le fale, ona o le gaioiga sa ia faia ia te ia.

Na faamatala e le teineititi i leoleo, e le o se taimi muamua lea ua faia ai e lona tama fai uiga mataga nei ia te ia.

E tusa ai ma le faamatalaga a le teineititi na aafia i leoleo, o le masina o Ianuari o le tausaga na te’a nei na faamalosi ai e lona tama fai o ia la te faiaiga e ui sa musu ai. Talu mai lava lea taimi, sa faaauau pea ona faia e le ua molia nei uiga mataga ia te ia seia oo i le taimi na maua ai e lona tuagane.

O loo taofia pea i le toese i Tafuna lenei alii e faatali ai le aso 3 Fepuari 2012 lea ua faatulaga e lau ai lona faasalaga.