Ta’utino seila na te le’i iloa o ni mariuana na sau ma ia

Na taua e le alii seila o le Lady Naomi mai Samoa lea o lo o taofia i le toese i Tafuna i leoleo e faapea, na te le’i iloaina o ni mariuana o lo o i totonu o le afiafi lea na sau ma ia mai Apia, ma le faamoemoe na te tuuina i se tagata o lo o faatali atu i Amerika Samoa nei.

 

Na taua e le alii o Liki Kirisimasi i leoleo e faapea, o le afifi lea na sau ma ia mai Apia, sa faatonuina o ia na te tuuina atu i le tagata lea o le a telefoni atu ia te ia pe a taunuu le va’a i Tutuila.

 

Ina ua taunu’u le Lady Naomi i le taeao o le aso Tofi o le vaiaso na te’a nei,  na taua ai e Kirisimasi le telefoni atu o se tagata e igoa ia Vagana ia te ia, ma fesili atu pe na sau ma aumai se afifi mai Apia, na tali le alii seila ioe, ma faasino atu ai loa e Vagana le vaega o le taulaga la te fetaui ai e piki ai le afifi.

 

Na taua e Kirisimasi, o le taimi lea na amata ai loa ona masalosalo lona loto, e foliga mai o se vaega o le pauta faasaina o le aisa o lo o i totonu o le afifi na sau ma ia mai Apia.

 

O Kirisimasi na molia faatasi e le malo ma Fatu Vagana i le vaiaso na te’a nei, i moliaga mamafa ta’ilua o le umia faasolitulafono lea o vaega o le laau faasaina o le mariuana, atoa ai ma le umia faasolitulafono o mariuana ma le faamoemoe e tulei ma faatau atu i isi tagata.

 

O le mataupu lenei na tofu atu i le Vaega o lo o suesueina fualaau faasaina i le Ofisa o Leoleo (Vice and Narcotics), ina ua logo e se molimau leoleo e faatatau i gaioiga faasolitulafono o lo o faia e Vagana, i lona faatauina atu lea o mariuana i tagata latou te faigaluega i le kamupani i’a i le tele o aso, ma tofia ai loa le alii leoleo ia Capt. Paulo P. Leuma na te su’esu’eina lenei mataupu.

 

Na taua e le molimau i leoleo e faapea, o le tausaga e 2008 na amata ai ona ia iloa Vagana ina ua la faigaluega faatasi, ma o le tele o aso e alu atu ai Vagana ma sikaleti mariuana i le galuega, ona ia faatau lea i nisi o tagata faigaluega i taimi o malologa poo le manava fo’i o galuega.

 

O le tele fo’i o taimi e pei ona taua e le molimau i leoleo, e masani ai ona la ti’eti’e ma Vagana i lana taavale, ma o iina na te vaaia ai i totonu o le taavale a Vagana sikaleti mariuana ua uma ona taai, atoa ai ma tama’i taga pepa iila o lo o i ai lau mariuana mamago ua sauni mo le faatauina atu i tagata.

 

Ae i le masina o Setema ma Oketopa o le tausaga na nei e pei ona taua e le molimau i leoleo, sa faamatala atu ai e Vagana ia te ia le auala o lo o ia faatau atu ai mariuana o lo o maua mai i sana uo mai Samoa i Sisifo. Sa faailoa foi e Vagana i le molimau lona manatu, e le taitai maua o ia e leoleo mai lana galuega o lo o faia o le faatauina atu o mariuana.

 

E oo foi i le fale o Vagana i Aoloau e pei ona faamatala e le molimau i leoleo, sa ia vaaia ai fo’i se vaega o mariuana, ma o le taimi mulimuli na ia asia ai le fale o le ua molia, o le amataga o le masina lenei o Novema, lea fo’i sa ia vaaia ai mariuana.

 

O faamatalaga uma e pei ona tuuina atu e le molimau i leoleo, na matua talitonuina e leoleo le moni ma faamaoni, ma aga’i atu ai loa leoleo i le aso 21 Novema mo le faataunuina o se poloaiga a le faamasinoga, e su’e ai le tino ma le taavale a le ua molia poo ia tauaveina ni vaega o le laau faasaina o le mariuana.

 

O le taeao atoa lea i le taulaga i Fagatogo, e le’i toe misi le taavale pikiapu Toyota lanu mumu a Vagana ma le vaai a leoleo, amata mai lava i ana feuiaiga i le taulaga a’o kilia le pasese a le Lady Naomi, seia oo loa i le taimi na talanoa ai Vagana i lana telefoni pe a ma le 15 minute.

 

Ina ua mae’a, sa toe faaola lana taavale ma aga’i atu loa i le vaega e afe ai pasi i tafatafa o le Metro Store i Fagatogo, ma vaaia ai loa le piki e Vagana o se alii, ma la aga’i atu loa i le afega o le auala lea e i lalo o le maota o le ali’i kovana, mulimuli ane na toe vaaia e leoleo le toe liliu mai o le taavale a Vagana ma aga’i atu i le vaega e paka ai taavale i le Tedi of Samoa i Fagatogo ma tuu ai le alii na ia pikiina, ae toe faaauau lana malaga aga’i i le itu o lo o i ai i le kamupani i’a i Atu’u.

 

O le taimi lava na paka ai le taavale a Vagana i luma o le StarKist Samoa, na tau fai paka atu ai foi ma ta’avale a leoleo ofu savili sa latou tuli mataia gaioiga a Vagana i le taeao atoa, ma vaaia ai e leoleo se afifi i totonu o le taavale.

 

O le afifi e pei ona taua e Vagana i leoleo, sa tuu atu e se alii seila o le Lady Naomi ia te ia, ona ia ave lea o le tupe i le alii seila e faatau ai sana pusa si’usi’u pipi. I totonu o le afifi, e tolu isi tama’i afifi o lo o i ai vaega o le mariuana.

 

E $50,000 lea ua faatulaga e totogi ona faatoa mafai lea ona tatala Vagana i tua mai le toese, ae $30,000 ua faatulaga e tatala ai le alii seila i tua.

Comment Here