Ads by Google Ads by Google

Ta’utino se ali’i sa ia fa’aleagaina fale lona tuafafine

O le ali’i lea na tu’uaia e le malo i lona fa’aleagiana lea o le fale a lona tuafafine, e mafua mai ona o se feeseeseaiga lava i le lotoifale o le aiga, ua ia ta’utino i luma o le fa’amasinoga maualuga, e fa’amaonia tu’uaiga sa faia e le malo fa’asaga ia te ia.

 

O le susuga a Gataivai Talamoa na ulua’i tu’uaia e le malo i ni moliaga se tolu, lea e aofia ai le moliaga mamafa e tasi o le talepe fale i le tulaga lua, atoa ai ma moliaga mama e lua o le fa’aleaga meatotino i le tulaga lua faapea ai ma lona faia o ni gaioiga e save’u ai le nonofo filemu o tagata lautele.

 

O se vaega o le maliliega na sainia e le malo ma ua talia fo’i e le fa’amasinoga maualuga, ua tali ioe ai Talamoa i le moliaga lona lua lea ua toe teuteu e le malo, ina ia fa’ailoa ai le solitulafono o le fa’aleaga meatotino i le tulaga lua, o se solitulafono mamafa i le vaega D, lea e mafai ona fa’asala ai se tasi i le toese mo le umi e le sili atu i le 5 tausaga, pe fa’asala fo’i i le salatupe e le sili atu i le $5,000, po o le fa’asala fo’i i fa’asalaga uma ia e lua, faapea ai ma le moliaga mama o le fa’atupu vevesi i nofoaga faitele.

 

I le talia ai e le fa’amasinoga o le tali ioe a le ua molia, na talosaga ia loa le malo ina ia solofua le moliaga mamafa e tasi o lo o totoe ai i le pepa o tagi sa latou fa’aulu, le moliaga o le talepe fale i le tulaga lua.

 

I le tali ioe ai o Talamoa, sa ia ta’utino ai e fa’apea, i se taimi o le aso 29 Iuni 2014 i lo latou aiga i Malaeloa, sa ia fa’aleagaina ai meatotino a lona tuafafine sa i totonu o lona fale, lea e silia i le $1,000 lona tauaofa’i.

 

Na ta’utino le ua molia e fa’apea, sa oso i lana ta’avale ma alu i le fale a lona tuafafine i lea aso, ona o le ita o lona loto i se mataupu o lo o tula’i mai pea i totonu o le lotoifale o le latou aiga.

 

Ina ua taunu’u lana ta’avale i luma o le fale a lona tuafafine, sa oso i lalo ma savali atu i le pito i tua o lana ta’avale ma aumai ai se samala ta ma’a, ma amata ai loa ona ia fa’aleagaina le fale e ala i lona sasa o le faitoto’a pito i tua atoa ai ma le faitoto’a pito i luma.

 

Sa ia ta’utino fo’i i lona sasaina lea i lalo o fa’amalama o le fale, ma taei ai tioata e 5.

 

Na ta’utino fo’i le ua molia e fa’apea, ina ua mae’a lana gaioiga lea, sa ia sasa’a ina loa se fagu penisini i luga o le fola o le fale, soso’o ai loa ma lona tata’e o le tioata o le ogaumu sa lona tuafafine.

 

Ua manatu itu e lua e fautua i le fa’amasinoga mo se fa’asalaga fa’anofovaavaaia. O le aso 15 Iuni lea ua fa’atulaga e le faamasinoga e lau ai le fa’asalaga a Talaoa, ma o lo o tumau pea poloaiga o lo o tatala ai o ia i tua e fa’atali ai le aso e lau ai lona fa’asalaga.