Ads by Google Ads by Google

TA’UTINO LE KOVANA I FAIAOGA NA TE LE TUULAFOAINA LE LATOU TAUTUA

Na tau fai pati lima faiaoga ma tagata faigaluega a le Matagaluega o Aoga a le malo i le taeao ananafi, ina ua faaiu le saunoaga a le afioga i le kovana sili ia Lolo Matalasi Moliga i lana folafolaga, na te le tuulafoaia la latou tautua, ae o le a faaaoga lona malosi faa kovana ina ia mautinoa latou te maua mea uma o lo o manaomia mo le faatinoina o le latou tautua faa faiaoga i le atunuu.

 

“E le o se galuega faigofie la outou pito laau o lo o faia nei o le a’oa’oina lea o fanau, ma ou te talitonu, o la outou galuega e faamoemoe i ai le manuia o fanau ma le malo, o lea ua ou manatu ai, ou te le tuulafoaina la outou tautua, ae ou te taumafai i lo’u malosi faakovana ina ia faia mea uma e faamalieina ai la outou tautua i le atunuu,” o le saunoaga lea a le alii kovana i le silia i le to’a afe tagata faigaluega a le matagaluega o aoga e aofia ai fai aoga ma tagata faigaluega i ofisa ma isi matata, na auai i le mafutaga e tatala aloaia ai lenei tausaga aoga, lea na faia i le fale taalo a le Aoga Maualuga a Tafuna i le taeao ananafi.

 

O le kovana sili na fai ma fofoga faapitoa o le aso, ae o le afioga i le Faatonusili o Aoga ia Vaitinasa Dr. Salu Hunkin Finau na saunoa e faamalosi faiaoga i le tiute e ao ona latou faia mo le tausaga aoga lea ua amata atoa ai ma le aga’i atu i isi tausaga aoga i le lumana’i.

 

I le saunoaga autu mai le afioga i le kovana sili, e le gata sa ia faailoa ai le taua o le tiute faa faiaoga, ae sa ia faailoa foi i le mafutaga le mafuaaga e tulaga ai ai le tiute o le tagata e avea ma faiaoga.

 

“E le o se galuega faigofie la outou galuega o lo o faia nei, e le gata e faalagolago ia te outou le manuia o ola o fanau ma le malo, ae o outou fo’i e mafai ona faia se suiga tele i le olaga o tupulaga talavou i le atunuu,” o le saunoaga lea a Lolo.

 

“O le lumana’i la o fanau ma le atunuu o lo o i o outou aao, afai e lelei la outou a’oa’o atu o le a manuia fanau ae a faaletonu la outou a’oa’o atu o le a faaletonu fo’i lumana’i o fanau ma le atunuu,” o le isi lea saunoaga a Lolo.

 

Na taua foi e Lolo e faapea, afai e sese le galuega a le foma’i, e mafai i le taimi lava lea ona iloa le mea sese ua tupu, ae o le tiute faa faiaoga, afai e sese i le taimi nei, o le a le mafai ona toe faasa’o lea sese i le olaga atoa o le tamaititi aoga.

 

“E mafua ona ou iloa le taua o la outou galuega atoa ai ma lona naunau ina ia faataua pea le tiute o le faiaoga, ona sa avea fo’i a’u ma faiaoga i tausaga ua mavae, ma ou te taumafai pea i le taimi nei ina ia galulue faatasi ma outou faiaoga, aua o iina o lo o taoto ai le lumana’i manuia o le atunuu,” o le saunoaga faaiu lea a le alii kovana.

 

O ni isi o faafitauli o lo o feagai pea ma le matagaluega o aoga mai le tele o tausaga na taua ai e Vaitinasa e faapea, i le 30 tausaga talu ai, o le 70% o fanau aoga sa tumau pea le i ai o togi o a latou suega i le mataupu o le Numera ma Faitau Tusi i le tulaga maualalo, silia i le 50% o faiaoga o lo o umia le tikeri maualalo faa faiaoga o le AA ma lalo mai, faapea ai ma le faaaogaina pea o le gagana Faaperetania e a’oa’o ai fanau i vaega amata o le ECE.

 

Saunoa Vaitinasa e faapea, o le 97.5% o fanau aoga i aoga a le malo e o mai i aoga Samoa, e le gata e tautatala i le gagana Samoa ae malosi ai fo’i tu ma agaifanua a Samoa, ae o le taumafai e a’oa’o latou i le gagana faaperetania a’o i ai i le ECE, o se tulaga e le tatau.

 

Sa ia fautuaina le Faalapotopotoga a Matua ma Faiaoga (PTA) ina ia faaitiitia le auai i sailiga tupe ma isi mea faafiafia, ae ave lo latou taimi e fesoasoani ai i le faaleleia o aoaoga a le fanau e pei o le fesoasoani i fanau i le faitau tusi ma le faia o a latou meaaoga i tua i aiga, ina ia lagona ai e fanau le naunau atu o matua e lagolago i le tiute a le faiaoga.

 

O ni isi o tulaga lelei na faatula’i e Vaitinasa e lu’itau ai faiaoga, sa ia taua ai le tulaga lea, so o se faiaoga lelei lava, e le gata na te fuafuaina ana lesona mo aso taitasi ae na ta sailia foi metotia e faatino ai le aoaoina o fanau aoga, ma vaai maualuga ia ausia e fanau le atamai ma le poto.

 

O le vaiaso lenei o le a lesitalaina ai faiaoga a’o sauni ai e faatali le toe fo’i atu o fanau aoga i totonu o potu aoga i le vaiaso fou.