Na teena uma e le ali’i ave taxi o Tamiano Tino tu’uaiga a le malo fa’asaga ia te ia, ina ua tula’i e molimau mo ia lava i luma o le fa’amasinoga maualuga i le taeao ananafi.

I le fa’amatalaga fa’atauto a Tino sa tu’u atu i luma o ali’i fa’amasino, sa ia taua ai e fa’apea, e le o ia lea na alu e momoli le tama’ita’i na a’afia i Leone i le vaveao na tula’i mai ai le fa’alavelave, na te le’i taumafai fo’i e faia ni uiga mataga ia te ia.

O le susuga a Tino o lo o tu’uaia e le malo i moliaga mamafa o le gaoi ma lona taofia faapagota fa’asolitulafono o se tagata, faapea ai isi moliaga mama e lua o lona taumafai e tagofia itutinosa o se tama’ita’i i le tulaga tolu ma le fa’aoolima i le tulaga tolu.

Na faailoa e Tino i luma o le fa’amasinoga i lana molimau e fa’apea, o luma o le pa a le kamupani o le McConnell Dowell i Tafuna sa ia pikiina mai ai le tama’ita’i o loo tu’uaia na a’afia, ona ia momoli lea o ia i le fale’aiga a le McDonalds i Tafuna lava, ae ina ua mae’a ona ia tuua le tama’ita’i lea i le fale’aiga a le McDonalds, sa taofi e ni ali’i se to’alua sa nofonofo i le Fale Fa’atali pasi o loo fa’afesaga’i ma le McDonalds lana ta’avale, ma fai atu e momoli i laua i Taputimu, o lea na alu ai loa ma momoli i laua nei i Taputimu.

Na taua atili e Tino e fa’apea, ina ua mae’a ona momoli lana pasese lea i Taputimu, sa ia fesoota’i mai loa i le ali’i o “Matini” o loo tali telefoni i le latou ‘stand taxi’ i Tafuna ma faailoa atu i ai, o ia lea la’a alu i le fale e fai sina malologa ona ua alu fo’i le po o la’u pasese.

O se taimi o le taeao lea ao moe Tino i lona aiga i Ottoville, na o atu ai leoleo ma aami o ia latou te o i le Ofisa o Leoleo i Leone, se’i fa’atalatalanoa ai le mataupu e pei ona tu’uaia ai o ia e se tama’ita’i, i lona taumafai lea e fai ni uiga mataga ia te ia, atoa ai ma lona gaoia o lana $180 sa i totonu o lana ato tupe.

I fa’amaumauga ua i luma o le fa’amasinoga o lo o taua ai e fa’apea, ina ua le mafai e le tama’ita’i na a’afia ona fa’amaonia i leoleo o le ali’i tonu lea sa ia taumafai e fai uiga mataga ia te ia, i le taeao lava lea na tula’i mai ai le fa’alavelave, na toe tatala ai loa e leoleo Tino e alu i lona aiga, e aunoa ma le faia i ai o ni moliaga fa’asaga ia te ia, ae ia ua toe tuuina atu e le tama’ita’i na a’afia le isi ana fa’amatalaga tusitusia i leoleo i le tuana’i ai o aso e fa talu ona mae’a le fa’alavelave, o iina na fa’atoa molia ai loa e le malo ia Tino ma taofia ai o ia i le toese seia oo mai i le taimi nei.

O isi molimau na valaau e le malo mo le latou itu, o se ali’i ave taxi e tutu fa’atasi a la taxi ma Tino i le ‘stand taxi’ e tasi i luma o le malae va’alele.

I le molimau a le ali’i lea, sa ia taua ai i le fa’amasinoga e fa’apea, i le vaveao o le aso e pei ona taua, sa fetaui ai lana ta’avale ma le taxi a Tino i Leone, lea fo’i sa mafai ona la talanoa ma Tino i luga o leitio feavea’i a la taxi.

Na taua atili e lea molimau e fa’apea, o se tasi o faiga masani a le latou ‘stand taxi’, soo se taimi e piki ai e se ta’avale se pasese, e tatau ona fa’ailoa i le latou ‘stand’ le nofoaga sa piki mai ai le pasese, ae poo fea fo’i e momoli aga’i i ai.

Na finau le malo e fa’apea, e le’i usitaia e Tino lea ta’iala mo latou o ave taxi, ina ua ia le fa’ailoa i le tali telefoni le taimi na ia pikiina ai le tama’ita’i na a’afia, atoa ai ma le taimi o loo ia finau mai sa ia pikina ai ali’i e to’alua ma momoli i Taputimu.

Ina ua fesiligia e le ali’i loia o loo tula’i mo Tino o Joel Shiver le ua molia, pe sa i ai se tala a le tama’ita’i na fai atu ia te ia i le taimi na ia pikina ai o i ai luma o le pa a le McConnell, na tali Tino “ioe”, sa fesili atu le tama’ita’i pe i ai sana telefoni na te fia fa’aaogaina, ona ia tago lea ua ave i ai lana telefoni, ona fa’aaoga lea e le tama’ita’i lana telefoni i se taimi pe a ma le 30 sekone, ona ia toe fa’afo’i atu lea.

Ina ua fesiligia e le loia a le malo o Tiffany Oldfield ia Tino pe sa i ai se taimi na alu ai i Leone e momoli le tama’ita’i na a’afia, na tali Tino “leai”. Sa toe fesiligia fo’i o ia pe sa i ai se taimi na la fetaui ai ma le isi taxi a le latou ‘stand taxi’ i se vaega o le alatele i Leone i le vaveao na tula’i mai ai le fa’alavelave, na tali fo’i Tino “leai”.

O ali’i fa’amasino o loo iloiloina le mataupu a Tino e aofia ai Lyle L. Richmond, Mamea ma Tunupopo.