Ads by Google Ads by Google

TA’U E LE AITU LE MEA PI’O A LE FAIFEAU O LO O FAI

TU’UAIA LEOLEO MAMOE I LE MA’ITO A SE TAMA’ITA’I O LE AULOTU

Na avea le oso o le ma’i aitu a se tasi o mafine o le isi aulotu i le itu i Sasa’e o le motu nei o Tutuila ma itu na iloa ai e le aiga ma le ekalesia, o le maula lea e le ma’i aitu mo’i ae ma’ito, o lana ma’ito fo’i o lo o feta’uaina ai le suafa o le latou faifeau, le ua igoa o le Leoleo Mamoe.

Ua i lalo nei se alii faifeau i mea vaai faatonutonu alu mamao a lana aulotu, ina ua masalomia o ia i le ma’itaga o le mafine lea, peitai na taua e nisi o molimau i le Samoa News le teena malosi e le leoleo mamoe o ia tu’uaiga.

O le tulai mai ai o lenei faafitauli i le lotoifale o le aulotu, na taua ai e nisi le tuu fesili o latou mafaufau i le moni o le faaolataga ma le talalelei na folafola ma tala’i e lenei auauna, ma ua avea ai lea tulaga ma itu ua fetosoaina faapa’utolo ai a loi o latou talitonuga i le avea pea lea o i latou ma tagata kerisiano mo le Alii.

E tusa ai ma faamatalaga a molimau na tuu mai i le Samoa News sa taua ai e faapea, e le o toa filemu le lotoifale o le aulotu i le taimi nei, ina ua alia’e le faafitauli e pei ona feta’uaiaina ai le suafa o le latou faifeau.

O nisi o aiga o le aulotu e fesootai ma le aiga o le mafine ua aafia ua le toe o atu i ni lotu, ae o isi lava foi matafale e le fesoota’i ma aiga o lo o aafia ae ua aafia o latou mafaufau ma lagona i le mea ua tupu, ua le toe o atu foi i le lotu.

O le alii faifeau o lo o tuuaia e pei ona taua e tagata o le aulotu, ua 42 tausaga o lona soifua ae lei faia sona aiga, se’i vagana ai lana uo tamaita’i o lo o fai, ma ua silafia uma e le aulotu le la mafutaga.

E tolu vaiaso o saili fofo le aiga o lo o nofo ai le mafine ua ma’itaga, i le tau sailiina lea o se fofo o lona gasegase, lea e faatetele lava le oso pe a oo ina malu le afiafi, peitai sa le maua lava se fofo, ae ina ua ave i le isi fafine e fofo Samoa i le isi pitonuu o le nuu, na faatoa manino ai loa iina le mata o le vai ina ua tago atu le olomatua i le manava o le sifi lea ma iloa ai, ua agai atu i le 4 masina o lona ma’itaga.

Fai mai le molimau, soo se taimi lava e oso ai le ma’i aitu a le mafine lea, e viga ai i lona ulu fai mai o le a malepe, o isi taimi e fiti solo ma fai mai o le aitu o lo o nofo i totonu ia te ia, a le o lena foi, e fasa solo ma ta’u le igoa o le faifeau ma fai mai, “faamolemole faamalolo mai a’u, faamolemole faamalolo mai a’u.”

“Ae o lea la ua manino le mata o le vai, e le o se aitu o lo o nofo i totonu o le manava o le maula lea, ae o lana pepe,” o le tala ata lea a le molimau.

E le’i faailoa e le maula o lo o aafia le tama o lana pepe, ae o se tasi o lona aiga sa ia faamatala i ai le tala e faatatau i le la mafutaga ma le Leoleo Mamoe, na alu ma faasalalau le tala ma taia ai le faafofoga a le faifeau, ma amata ai loa ona vaaia e le aulotu se suiga tele i le latou mafutaga ma le faifeau, o isi o taimi ua alo i tagata ekalesia, o isi o taimi ua le alu atu i aso Sa, ma faai’u ai lava i le maua o tala fai mai ua sola i Apia.

Na taumafai le Samoa News e fesiligia le alii faifeau o lo o tuuaia i lenei mataupu i sona finagalo, peitai o lana tali na tuuina mai, “aua kou ke fiafia e ka kusi kala e faakakau i auauga a le Alii,” o le saunoaga lea a le alii faifeau ona ia tuu lea i lalo o le telefoni.

Ina ua tuana’i ni nai minute sa toe taumafai le Samoa News e vili le numera a le faifeau, ona toe tali mai foi lea o le alii faifeau e faapea, “O a’u o le leoleo mamoe ga kofi e le Alii e leoleo ma kausi laga lafu mamoe, kou ke malaia i le kou kusia o kala le mogi e aafia ai le aufaigaluega a le Alii, pau la’u kala ia ke oukou, kusi kala mogi ae aua le kusia kala pepelo e akagia mai ai kou ke ula i le aufaigaluega, iga ge’i kukusa oukou ma kamaiti na ai ola e magu feai iga ua ula ia Isaia le auauga a le Alii.”

Na ona uma lava o le saunoaga lea a le alii faifeau, tuu loa i lalo ma le telefoni, ma na iu le Samoa News e toe vili le numera lea ae ua tape mai.

E le’i faia se faaiuga a le Ekalesia atoa faatatau i le alii faifeau, ae na taua e se tasi o molimau e faapea, afai ae faamaonia tuuaiga faasaga i le faifeau, o le a faamalolo e le toe avea o ia ma faifeau.

Fai mai le molimau, talu lava ona vevesi le aulotu e uiga i le mataupu lea, e lei toe oo atu le Leoleo Mamoe e vaai lana lafu mamoe sa tausi, ma ua avea lea vaaiga ma itu ua atili faamautuina ai manatu o le aulotu, e moni tuuaiga faasaga i le alii faifeau.

O se tasi o itu faaeteete gata ua maitauina i totonu o le aulotu, ua avea le mea sese ua tulai mai ma itu ua lua ai vaega a le aulotu, ma ua faaigoa ai e tagata ekalesia vaega ia e lua, o le vaega lelei ma le vaega leaga.

O le vaega lelei o loo faasagatau i le faifeau ma lana mea sese ua fai, ae o le vaega leaga e au i le faifeau ae faasagatau i le mafine lea o lo o tu’uaia sa ma’ito i le alii faifeau, ma o latou tuuaia o ia fai mai, o lona faatilotilo i le leoleo mamoe ua mafua ai le faaletonu.

Fai mai isi o le aulotu, ua mafua le sese ona ua fia ai le mamoe i le leoleo mamoe, peitai fai mai isi o le aulotu, ua mafua lava le sese ua toe fia ai le leoleo mamoe i mamoe o lana lafu mamoe.

Fai mai molimau, o le tele o taimi e alaga ai le faifeau i luma o le aulotu ma fai mai, o ia o le leoleo mamoe lelei, peitai o le faafitauli ua tulai mai ua alalaga ai loa tagata o le aulotu ma fai mai, “e le o oe o se leoleo mamoe lelei, ae o oe o le ai mamoe leaga.”