Ua mae’a nei le vaiaso atoa o ta’aloga volipolo ua fa’asolo nei mo le Liki Volipolo o lo’o fa’atautaia e le tatou Asosi Volipolo a Amerika Samoa, ina tapena ai fo’i i tatou mo ni ‘au volipolo sili ona lelei ae so tatou sao i le ta’amilosaga volipolo fa’avaomalo lea e tapena i ai mo le tatou Sisigafu’a o lenei tausaga 2012 ia Aperila.

“E le o faigofie i ‘au volipolo ona maua le manumalo, aua ua tau fai lelei le tomai o le fanau i lea fo’i fa’agatama, ma ua iloga lea tulaga, ona o le ivi o ta’aloga o lo’o fa’atautaia nei, ua ta’itolu lava seti e faia i ai, ma ua su’ea fa’alima se ‘au e manumalo i le seti mulimuli o le toe ta’aloga i le po o le aso Tofi na te’a nei.” O se fa’amatalaga lea a le susuga le Peresetene Pio Gaisoa, i le taimi na mae’a ai lea ta’aloga fita i le va o le “Fiafia Boys Mens A” ma le “Side Out Men’s A.”

O nei ‘au e lua, sa leai se faia’ina i le Pool B o le Vaega o A’u Volipolo a le Men’s A, ae o le Pool A lea e tumau ai pea le au a le “Taumafai” i le tulaga e le’i i ai se faia’ina. I lea vaega o le Liki e 12 ‘au ua aofia ai, ma ua fa’atautaia ai nei i Pool e 2 e pei ona fa’ailoa atu i luga, e ta’i ono ‘au voli i le pulu e tasi.

I le vaega o ‘Au Volipolo a Tama’ita’i ua fa’ailoa mai e 6 ‘au o i ai, ma o se tasi fo’i lea o ta’amilosaga manaia, aua i le ta’amilosaga Volipolo Fa’avaomalo i le tatou sisigafu’a, o lo’o ‘auina mai ai le 5 au a Tama’ita’i mai Samoa, ma le tasi mai Brisbane Ausetalia, e tauva ai.

Peita’i, i le vaega o ‘au a le fanau laiti e i lalo o le 19 tausaga le matutua, ua i ai fo’i le 5 au volipolo o i ai ma o lo’o tula’i mai ai le ‘au a le “Filemu” i le tulaga leai se faia’ina o i ai ma o lo’o va’ava’alua ai ma Amouli Boys U19 i lea tulaga.

 O tamaiti nei e i le ‘au a le Under 19 i so’o se Kalapu, e mafai ona ta’a’alo le fanau lea i latou A Team, ae le mafai ona ta’a’alo mai tama o le A Team i le ‘au a tamaiti e i lalo o le 19 tausaga.

O ta’aloga o lenei liki volipolo o lo’o fa’atautaia lea i le Fale Ta’alo a le tafuna High School i aso To’ona’i ta’itasi ae maise o afiafi o aso Lua ma aso Tofi o vaiaso ta’itasi se’ia mae’a lenei liki volipolo.

O le aso To’ona’i na te’a nei na amatalia aloa’ia ai lenei liki ma sa iloga fo’i ona matagofie ta’aloga sa fa’atautaia ai, ma ua ta’itolu nei manumalo o ‘au pe afai e le’i pa’u lava e o’o mai i le afiafi o le aso Tofi na te’a nei. Maimoa i ai i ta’aloga a le fanau, tau sailia ai ni ‘au volipolo lelei lava mo le tatou fa’amoemoe i se Ipu o le Ta’amilosaga Volipolo Fa’avaomalo lea tatou te fa’atautaia ia Aperila 13 ma le 14, 2012.

Ua fa’ailoa mai fo’i e le susuga le Peresetene ma le Laulauatofi o le ASVBA, ua i ai au volipolo mai Tonga, ma Samoa o le a tauva i le Liki a Mens A i lea ta’amilosaga volipolo fa’avaomalo ia Aperila, 2012.

I le ta’aloga vevela na fa’ai’u ai le ta’amilosaga volipolo o le afiafi o le aso Tofi, na tau sailia ai po’o ai le Side Out ma le Fiafia Boys o le a tutumau i le tulaga e le’i i ai se faia’ina. O le ta’aloga na tofu seti, na muamua manumalo le Fiafia Boys i le seti muamua, ae soso’o ma le seti lona lua matua malosi lava le a’a mai a le Side Out, ma fa’apena ona manumalo ai i lea seti. Sailia loa i le afi le ‘auro o le afiafi, sole, na uma lota fatu na ‘aia e manu nini’i ina ua fa’afa lelei ona tau saili ni ‘ai ta’i lua e mafai ai ona manumalo se ‘au o lea filigamaea.  O se fa’apupulaga a le susuga Iose  o le ASVBA, “O le tulafono fou lenei, ia lua lava ‘ai e manumalo ai le ‘au pe a tutusa le ta’aloga ma toe sailia se ‘au manumalo!”

E le’i faigofie le fefinaua’i o le ta’aloga, peita’i, ona e iloga mai e matutua tausaga o e ta’a’alo mai le ‘au a le Fiafia Boys, o lea na latou fa’ato’ato’a ai le vaega a le Side Out ma manumalo ai.

Talosaga atu i aiga ma uo mamae a i latou o ta’a’alo, o ane e maimoa ma tima’i le ‘au ta’a’alo ia tele nisi ‘ai e fa’aopoopo i a latou taumafaiga, ae afai e te silafia e le lelei ai le ta’alo a lau uo, aua e te maimoaina, ae fai se tatalo ma tapua’ia faiva o tama ma tama’ita’i i malae.

O le aso To’ona’i nei o le a amatalia fo’i i le itula e 9:00 ta’aloga masani ma fa’asolo ai isi ta’aloga i le aso Lua ma le aso Tofi o le vaiaso o lumana’i.