Ua fa’ailoa mai e le Asosi Volipolo a Amerika Samoa, [ASVBA], le ta’amilosaga i le Malae o Su’igaula a le Atuvasa i Utulei i le aso, Iulai 16, 2013, e fa’amanatu ai le 113 tausaga o le Fu’a a le Manu’atele.

O le susuga le Peresetene o le ASVBA, Savaliga Afu sa ia fa’ailoa maia lea ta’amilosaga, e tapena atili ai fo’i le ‘au ua mae’a filia mo le Ta’amilosaga Volipolo i le Matafaga o le Mini Games a le Pasefika lea e fa’atautaia i le Malo o Wallis & Futuna i le masina o Setema i le tausaga nei lava.

“O le ta’amilosaga lenei e ta’i $25. le ulufale o ‘au e fia lesitalaina, e faia ai lava i le 8:00am i Utulei, ma fa’atautaia ai lava le ta’amilosaga lea. O se sao lea o le Asosi Volipolo mo le fa’ailogaina o le fu’a a le Manu’atele i lenei tausaga.” O se saunoaga lea a Afu e tusa o lea liki.

“E ese mai lea fa’amoemoega tele, ae o le tapenaga fo’i lea o le ‘au ua mae’a filifilia la te suia Amerika Samoa i le ta’amilosaga volipolo i matafaga a le Mini Pacific Games lea ua talimalo ai Wallis ma Futuna i le masina o Setema 2013.”

O nei fa’agaoioiga uma, ua manatu le Asosi atoa i lana laulauatofi ma sui totino o le Komiti Fa’afoe, “Ia matua iloga fo’i se taumafaiga a le Asosi Volipolo latou e tapena mamao se sao o Amerika Samoa i ta’amilosaga mo le Pacific Games ma se’i va’aia fo’i se suiga lelei i le Volipolo i Matafaga, aua o i tatou e matua tele na’ua matafaga o i ai, ma e fiafia fo’i o tatou tupulaga i lea lava fa’agatama!”

O le to’alua ua filifilia nei mo le ta’amilosaga i Wallis & Futuna o le susuga ia Salvation Mikaele ma Sam Luaiva, afai o le a maua nisi ‘au e iloga mai le agava’a i lea ta’amilosaga nei, o le a amata sipa pe koleni fa’apitoa lea ma le to’alua lea, ina ia mautinoa ua lava tapena i tatou mo se ‘ai i lea fo’i fa’agatama.

I le taimi nei, o le Peresetene o tula’i mai o le Asosi Volipolo a Amerika Samoa o Savaliga Afu, Sui Peresetene Valasi Gaisoa, ae teutupe ma failautusi ai Iose Muasau.