Ta’amilosaga Volipolo a le Asosi Islandwide

Ua tula’i mai o le isi lenei mea sa matua mafuli le to’atele e maimoaina i le aso Gafua malolo, o le fa’aauauina o le Liki Volipolo a le Asosi Islandwide. E ono au volipolo a tamaitai, 8 Au Volipolo ‘B”Ali’i, ma le 14 A Ali’i o lo’o aofia i lenei ta’amilosaga o lo’o fa’agasolo pea.

 

O ta’aloga lautogia mo le aso Gafua malolo sa fa’asolo mai ai i ta’aloga a Tama’ita’i na fetaui ai le Teine Fetuao na faia’ina i le ‘ai a le Blockaretes i le lua seti i le 0. Na soso’o lea ma le fetauiga a le Teine Fetuao ma le All Natural na manumalo ai fo’i le All Natural i le lua seti i le 0.

 

O le ta’aloga mulimuli a tama’ita’i na fetauia ai le Teine Fetuao#2 ma le All for 1 ma sa manumalo ai le All for 1 i le talita a tama’ita’i.

 

Ta’aloga a le B Ali’i na mua’i fetaui ai le au a Uso ma Saimanulua.  All Natural na fetaui ma Fetulele Boys ma manumalo ai le All Natural. O le ‘au a le Sea Breeze ma le SOS Central na le faia se ta’aloga ona o fa’aletonu le ma’alofia. Sa leai se ‘au e ta’a’alo ma le ‘au a le SOS East.

 

O ta’aloga faitaulia a le A Ali’i sa mua’i ta’a’alo ai le Nua Se’etaga ma Fetulele Boys ma sa manumalo ai le Fetulele i le 2seti i le 1seti a Nua Se’etaga. O le ta’aloga a West Point ma le Peace Maker na manumalo ai le Peace Maker i le 2 seti i le 0. O le ta’aloga i le va o Seabreeze ma Fagatogo na manumalo ai le Seabreeze i le 2-0.

 

O le ta’aloga o le Talita a le A Ali’i sa fetaui ai Finau ma le Alii Taoso. Na fa’atautaia lea ta’aloga e le susuga i le Faipule o le Vaifanua, Fatulegae’e Mauga, o ia fo’i lea o le Peresetene o le Islandwide Villeyball Association, ina ia mautinoa e leai se fa’ai’uga e faia e fa’aletonu ai le ta’aloga faitaulia o le afiafi.

 

O lea ta’aloga e matua pulu lava, ma sa mata’ina le tau fai fetaui o le finau mai a ‘au e lua i le manumalo. O le talita sa umia e le Finau, peita’i na fa’ao’o atu ina ia mafai ona fetaui ai i latou ma le Alii Taoso.

 

I le seti muamua sa matua faigata ona maua se ‘au e manumalo, peita’i sa muamua pa’ia e le Ali’i Taoso ‘ai e 17 i le 16 a le Finau. Matauina fo’i le lelei o le sofa’i mai a le Ali’i Taoso le ali’i numera 11 o Jake ma le isi ona fesoasoani lelei fo’i le ta’alo o Iosua le numera 7, o le ali’i o Molesi sa ia kapetenia maia le Ali’i Taoso. Soso’o le seti lea ma le seti lona lua, peita’i, o le ali’i o Salvation, o se tasi e lauiloa i le Volipolo, sa iloga fo’i lana taumafaiga i lana ‘au o le Finau. Tele o taimi o le seti lona lua sa muamua ai ‘ai o Ali’i Taoso, peita’i, mo le toe ‘ai lava e manumalo ai Ali’i Taoso, sa toe tulia mai lava e Fina’u i le na o le 6 latou ‘ai, 13 loa ‘ai o Finau ae fa’ato’a maua le ‘ai mulimuli o Ali’i Taoso e manumalo ai i le latou seti lona lua, ma se’ia ai le talita e le a Ali’i Taoso i lenei vaiaso.

 

O le ta’aloga na soso’o ai o West Point na fetaui ma Tausala ma sa mata’ina ai le fika a le #11, e la’ititi lea ali’i ta’alo ae o le matua lelei lava o le tau’au. E ui na muamua 16 ‘ai o West Point ae na’o le 14 ‘ai o Tausala, ae na sau lava fo’i Tausala maua le 17 ‘ai ae le’i toe minoi ‘ai o West Point i le latou seti muamua.

 

Soso’o mai le latou ta’aloga lona lua ma manumalo ai West Point i ‘ai e 17-13, soso’o loa ma le latou seti mulimuli toe mao mao tetele ai fo’i le Numera #11 a Tausala ma manumalo ai i le 15-13 a West Point.

 

O le a toe fa’aauau fo’i nei ta’aloga i le vaiaso nei i le aso To’ona’i ma e fa’afetaia le ta’alo lelei o tama ta’a’alo uma ae maise o le ‘au maimoa sa auai i le Gym a Samoana.

Comment Here