TULAGA TAALOGA LIKI VOLIPOLO O LE FU’A

O ta’aloga volipolo sa faia i le faleta’alo o Malisi Tuai i Malaeloa i le afiafi o le aso Tofi na te’a nei sa mua’i fetaui ai le Seven Flow ma le West Point, manumalo le West Point i a latou ta’aloga e lua na tatala malae ai i lea afiafi. Ta’aloga a le Seven Flow ma le BTI na manumalo le BTI.

I le amataga o ta’aloga a Tama sa fetaui ai le Loco Motion ma le Ghost Town na tofu ‘au nei ma le seti e malo ai, ona fa’ato’a toe fetaui loa lea i le lona tolu o seti e saili ai le manumalo ma toe maua e Loco Motion. O ‘ai o nei ta’aloga e 17-13. 16 - 17 mo le Ghost Town Boys ae fa’ato’a toe maua ai le ta’aloga lona tolu e 15-12. Matagofie lea fetauiga faigata.

I le ta’aloga i le va o Tama Uli ma le All Sevens, sa fai si faigata ona sekiseki mai tama o le Sevens i lea ta’aloga. Na manumalo le Tama Uli i le seti muamua i ‘ai e 17-13, toe fetaui mo le ta’aloga lona lua 13 Tama Uli i le 17 All Sevens.

Oso loa le ta’aloga mulimuli e saili ai le manumalo, na tauivi tele lea ta’aloga mai le amataga se’ia o’o i le fa’ai’uga. O le sasi lava o poloka ma le poina o le polo, maua ‘ai fa’aopoopo o le isi ‘au, peita’i, e ui ina fita le ta’aloga ae na fai lava i le ‘ai e tasi ina ua tutusa, maua e le Tama Uli le ‘ai mulimuli e malo ai: 15-14.

Ta’aloga faitaulia i le va o le Ghost Town ma le “Saumalu” mai Aoloau, o le isi lea ta’aloga, ua iloga mai le fita, aua e tau fai lelei fo’i ta’a’alo a tama o ‘au e lua. Peita’i, sa va’aia lava le lelei tele o le tau’au o le tama o Alex mai le Saumalu, o lana serve ma le sipaika e tusa lava nei mea e lua.

O ‘ai o le fetauiga muamua e 17 Saumalu i le 13 Ghost Town ae o ‘ai o le ta’aloga mulimuli e 17-12 ma ua manumalo ai fo’i tama o le Mauga o Aoloau. Sa fa’atautaia fo’i ta’aloga Volipolo o le soso’oga o ta’aloga nei i le Fale Ta’alo i Kanana Fou ma o le a fa’alauiloa atu na i’uga i le lomiga a taeao.

TA’ALOGA PESIPOLO AOGA MAUALULUGA

O ta’aloga faitaulia e saili ai ‘au e ta’a’alo mo le sailiga siamupini i le ASHSAA Baseball na fa’atautaia lava lea i le Malae o Tony Solaita i Tafuna i le taeao o le aso To’ona’i na te’a nei.

O le ta’aloga faitaulia i le va o Crusaders a Fa’asao Malisi ma le Lions mai Leone High na tatala malae i lea taeao. O se mea na maofa ai, o le ‘au a Leone Lions sa matua iloga ona sofa’i mai le latou itu ma sa muamua tau ’ai i le fetauiga lea. E o’o ane i le tataga lona tolu, o lo’o maualuga lava ‘ai o Leone e 5 i le tasi a le Crusaders.

Ua ese fo’i le fa’alogo atu i le tima’i a faia’oga o le Crusaders i latou tama ta’a’alo, “O le tausaga lenei o matou e tatau ona umia le siamupini, o le faitauga lava lena sa tatou fa’atula’ia mai le amataga, aua ne’i suia o outou lagona, o le taimi nei e mo’omia le tutumau ma ta’u ia te oe, o le Siamupini a tatou!”

Na toe va’aia le fa’amalosi o tama fa’amoemoeina o le Crusaders, le toe ta ma le tuli ‘ai fa’atini a tama na, ua masani fo’i i le fikaina o le taumafaiga i taimi ua tinou mai ai le isi ‘au e fa’atumau ‘ai.

Na soso’o ma le taumafaiga na fa’atini ai ‘ai ma tutusa ‘ai i le ta’i ono, ona toe o lea i totonu o le Crusaders ma taumafai tasi lava maua ai le latou ‘ai e tasi.  E ui ina sa totoe le 3 minute o le ta’aloga, ae leai, ua latou filifili e taoto ai fa’apea le latou ta’aloga. Tula’i mai ‘ai o le ta’aloga Crusaders 7 - Leone Lions 6.

O le ta’aloga lona lua na saili mai ai e Tafuna ma Samoana po’o ai e malaga mai i luga e fetaui ma le Crusaders mo le Siamupini 2015.

Na iloga mamao lava le manumalo i le ta’aloga atoa mai le amataga ona e 17 Tafuna i le 4 fa’atini a le Samoana. O lea ua fa’ailoa mai, o le ta’aloga o le Siamupini o le a fa’ato’a faia lava i le aso 11 Aperila, o le aso To’ona’i lea o le vaiaso a sau i le va o Crusaders ma Tafuna.