SUSUNU TUPE MA OLOA NA GAOIA MAI LE FALEOLOA

O tupe ma meatotino uma na aumai faagaoi e le ali’i o Joeita Fa’aaliga mai faleoloa ma fale o aiga sa ia osofa’i ma talepe i le amataga o le masina nei, sa ia faailoa i leoleo ua uma ona ia susunuina ma faaleaga.

 

O le vaiaso nei na pu’e faapagota ai e leoleo ia Fa’aaliga ina ua faila e le malo moliaga mamafa e fa faasaga ia te ia, ona o le fa’alavelave lea na la osofaia ai ma sana uo se faleoloa i Leone i le po o le aso 16 Iuni, 2013 ae ave faagaoi le tele o oloa e aofia ai ma se tino i tupe e tusa ma le $2,000.

 

I faamaumauga a le faamasinoga o lo o taua ai e faapea, o le po o le aso 16 Iuni na logo ai e le pule o le faleoloa o le D & H Store i Leone le Ofisa o Leoleo i Leone mo se fesoasoani, ona o lona faleoloa ma lona fale ua talepe ae gaoi oloa sa i totonu.

 

Na taua e le pule o le faleoloa i Leoleo e faapea, e tusa ma le $1,000 le tinoitupe sa nana i lalo o le faamalu o le moega ua gaoia, ina ua sasae e le tagata le screen wire o le faamalama o le fale ma aveese faamalama sa i ai ae ulufale atu i totonu o lona fale. E sosoo lava le fale o le pule ma lona faleoloa.

 

Ae o le isi osofaiga o le fale na taua ai e le pule i leoleo e faapea, na toe sasae foi e le tagata le screen wire ma tatala ese faamalama ae ulufale i totonu o le fale ma gaoi oloa sa i ai atoa ai ma se tinoitupe e tusa ma le $2,000 na gaoia ai i le taimi lea.

 

Ina ua maua e leoleo faamatalaga e tusa ai o lenei osofaiga, na taumafai ai loa e saili ni molimau ina ia faa faigofie ai ona saili le tagata sa faatinoina lenei solitulafono, ao pisi leoleo e saili se molimau, sa latou fesiligia ai se alii talavou na ia faailoa e faapea, o ia sa i ai ma Faaaliga i le osofaiaina o le faleoloa ma le fale e pei ona taua.

 

E ui e lei iloa e le molimau le aso tonu na tupu ai le faalavelave, sa ia maitauina o le vaveao o le aso Lua na la osofaia ai ma Faaaliga le faleoloa ma le fale e pei ona taua i Leone.

 

Na taua e le molimau le sasae e Faaaliga o le screen wire o le faamalama, ona ia fesoaosani lea i le una’iaina o Faaaliga i totonu o le fale, e le’i umi ae toe foi mai le ua molia ma fagu uaina se lua ma la o loa ma ave i le fale o Faaaliga.

 

I le taimi lona lua na la osofaia ai le fale na toe ui atu ai foi Faaaliga i le faamalama na oso muamua ai, ma mafai ai ona tatala le faitotoa pito i tua o le fale. Na taua e le molimau i leoleo e faapea, o oloa na gaoi mai e Faaaliga ma tuu atu ia te ia e aofia ai taga alaisa e lua ma pusa saimini, ona faatonu lea o ia e Faaaliga e muamua e ave mea ia i le fale, peitai o lona fefe ina ne’i maua o ia na ia tia’iina ai oloa ia i se togavao e latalata i le nofoaga e i ai le faleoloa.

 

Na taua foi e le molimau i leoleo e faapea, ao tu tu i le auala e faatali le manava atu o lona tina, ae te’i i le tamo’e atu o Faaaliga ma tuu atu le $60 ia te ia ma lana upu, e avea ma ia, sa ia fesili ia Faaaliga poo fea na aumai ai lana tupe ae na tali le ua molia na aumai i lana uo teine.

 

E toatolu isi molimau na talanoa i ai leoleo e uiga i lenei mataupu, ma o latou taua ai lo latou vaaia o Faaaliga i tua o le faleoloa i le po na talepe ai e le tagata le fale ma le faleoloa.

 

Na taua e le isi molimau i leoleo e faapea, sa talo atu le ua molia ia te i latou peitai na oso ona mafaufauga, ai o alu le ua molia e faaaoga le fale taele a le faleoloa, ae o le isi molimau sa ia taua i leoleo e faapea, ao faia le latou faatau ma nai ona tei i le po lea, sa latou faalogoina ai le pao mai o tua o le faleoloa, ae ina ua o atu nai ona tei e siaki latou te lei vaaia ai se tagata.

 

O le asdo 19 o le masina nei na fesiligia ai e leoleo le ua molia e tusa ai o lenei mataupu, ma ia faatoese ai i leoleo e faapea, e tele isi fale sa la talepe ma osofa’i ma lana uo, ma ua lagona lo la salamo e tusa ai o mea leaga sa laua faia.

 

Ae ina ua fesiligia e leoleo o ia po o fea ua ave i ai oloa ma tupe sa ia gaoiina mai i le faleoloa o le D & H Store, na tali le ua molia ua uma ona ia susunuina tupe ma faaleaga oloa.

 

O lo o tuuaia Fa’aaliga i moliaga e lua o le talepe fale i le tulaga muamua atoa ai ma moliaga e lua o le gaoi, ma o lo o taofia pea o ia i le toese i le taimi nei e faatali ai le isi ana iloiloga lea ua faatulaga e fofogaina i le masina fou i luma o le faamasinoga maualuga.

Comment Here