Suia le igoa ‘Satani’ i le Manulele Tausala

Ua mae’a suiga tetele ona fa’atautaia e ali’i ma faipule o le afio’aga o Nuuuli, i o latou Sa o le a tauva i le tu’uga fautasi o lenei tausaga, ma ua tu’uina fo’i i lalo Sa uma e lua o le afio’aga.

 

O le aso Faraile na te’a sa fa’atautaia ai le sauniga fa’apitoa o le leleiga i le afio’aga, e soalaupule ai ona fa’alupega, fa’asuaga ma le saofa’iga o ali’i ma faipule o Nuuuli, e talia fa’atasi ai e i latou uma le talosaga mai le Au Failotu, ina ia suia igoa o latou Sa.

 

Ua suia mai ia “Satani” i le igoa “Manulele Tausala,” le a’oga o lo’o avea ma pine o le ulua’i asiasiga a se Peresetene o le Iunaite Setete Lyndon Baynes Johnson ma lona faletua Lady Bird Johnson, na afea ai Amerika Samoa i tele ua tausaga ua fano.

 

O ‘Manulele Tausala,’ o le fa’aliliuga lea o le suafa “Lady Bird” ma ua fa’aigoaina ai le a’oga tulaga muamua i Nuuuli, lea na la’ua asia ma o’otia le lipine e tatala aloaia ai lona falea’oga ia Oketopa 18, 1966.

 

O le afiafi o le aso Gafua na te’a nei, sa fa’atulaga ai e le afio’aga e tu’u ai i lalo va’a e lua, ma faia se feiloa’iga a Auva’a ma latou Kapeteni o le a malaga ma i latou i filiga o le tai. Na faia le sauniga pu’upu’u ma sa auai fa’afeagaiga e to’alua mai le afio’aga, o i laua fo’i nei sa tofu sao i apoapoa’iga fa’apea ma le talosaga si’itia mo le fa’amoemoe ua toe amatalia nei.

 

Sa maua fo’i se taimi paganoa lelei mo le saunoaga a le afioga le Ma’opu ia Soliai Tuipine Fuimaono, ma sa ia fa’ailoa ai i le malosi o le nu’u o Nu’uuli, “Aua ne’i outou fa’apea e mama le tapua’iga a le pa’ia maualuga o le afio’aga i punao’o, ali’i ma faipule fa’apea tama ma tina matutua o lo’o fa’aoloolo manu mo se manuia o le taumafaiga lenei, ia tu’u fa’atasi o tatou loto ma ia tatou galulue fa’atasi e fa’atino lo tatou sao, o se ‘ai lea mo le afio’aga i lenei fa’agatama.”

 

Sa faufautua fo’i Soliai i le vasega o talavou, o le malosi o le afio’aga, “Ia tatou usita’ia fautuaga mai le vasega o Ositaulaga eseese ua fa’atalosaga mo le suiga o le igoa o le tatou Sa, e leai so tatou e maua ai le malosi ma le ola, na’o le Atua ma ua tatau ia i taotu ona talia fautuaga leleiua tima’i mai ai.”

 

O le taimi muamua lenei ua fa’ao’o ai le fanoga o le afioga ia Soliai e avea o ia ma Kapeteni o le Manulele Tausala fou.  I le afiafi ananafi, sa lu’ia ai lana afioga le Ma’opu, a’o le Senatoa fo’i o le Itu’au, e Fa’atautaia ona faiva i le Tai.

Comment Here