Ua i ai ni sui o le atunu’u ua vala’au mai, ae maise i latou sa tutu mai i le foe i taimi o tapenaga mo le sisigafu’a a le tatou malo, e ala lea i le sa’iliga o tapenaga o taumafa i fale’aiga ese’ese ae maise o le tulaga mama ma lelei ona tapena o fale’aiga uma, aua o le a to’atele mai tagata e asiasi i le tatou atunu’u, ma o le a fa’apea fo’i ona si’itia le tulaga e tausia ai lo latou soifua laulelei e ala i na tautua.

Ua litaea le sui, peita’i, o lona va’ai atu i lea tulaga ua afua ai ona vala’au mai ma fa’ailo ona lagona lotonu’u, sa ia fa’atautaia mai ai le faiva o tapenaga ia mautu ma lelei le taligamalo. “Aisea ua le fa’asalalau fa’alaua’itele mai ai i luga o le televise, leitio ma nusipepa ina ia to’aga uma tagata o le tatou atunu’u e tapena o latou maufale ma autafa ae masie tuafale, ia leai se mea e ‘opu ai le silasila ma le maimoa a tagata ma malo mai fafo?”

O lea ua ala ai lenei tala, ua saunia mo se ta’ua ‘ai ae a le silasila a tatou malo asiasi mai, ia ta’uleleia fo’i si tatou teritori i ana malo fa’aaloalogia i lenei tausaga i la tatou Sisigafu’a.

Ua va’aia e le’i tapenaina lava autafa o le alatele i le tele o afio’aga. Ua fa’apea fo’i ona fa’atalitali aiga ina ia o’o mai le Matagaluega o Paka ma Malae Ta’alo, peita’i, ua va’aia le tele o autafa o alatele i Tafuna ua amatalia ona moa mai le vai ma ua teuina la’au tu auala.  Ua gaoioi mai le paka ma Malae ta’alo, ae o se isi galuega sili ona matagofie, o le tatou Maota Samoa i Utulei, i le malae o le Si’ugaula a le Atuvasa fa’afetai ua toetoe lava a mae’a lelei, ma ua fa’atulaga mo le ‘ava o le feiloa’iga o lenei sisigafu’a.

O lona atufalega ua mae’a ona fa’apola fa’atasi atu ai ma isi fale samoa laiti, ae o lo’o totoe le tolu sa tatau lava ona toe atolau mo lenei suiga fou o se va’aiga matagofie i le galuega atoa. Fa’afetai galulue i le Ofisa o Mataupu Tau Samoa i lea galuega tele ua mae’a mai. O le alatele i le aga’i mai i le Malae va’alele ua toeititi mae’a lelei, ma e fa’afetaia lava le Konekarate ona ua amata ona fa’afaigofie le agai mai i totonu o le taulaga, peita’i, o tuafale o le tatou maketi e fa’asolo atu aga’i i le pamukesi a  Scanlan i Malaloa, ua tatau ona fa’ao’o vave i ai le punipuni ‘omo’omo a le tatou matagaluega o galuega lautele mo se galuega alofa.

O le aso Gafua amata loa le tatou  sisigafu’a, ae o le vaiaso nei i le aso Lulu e amata ai tatou pesepesega, ua tatau ona sui mai le tatou Kia i le kia malosi ma le televave e fa’ata’alise ai mea nei o totoe.

Saua fo’i i le fa’alogo, e i ai fale’aiga tetele na tapunia e le vaega pasia fale’aiga, ae na vave lava ona toe fa’aleleia mea sa fa’aletonu, toe tatala ai loa lea fale’aiga i Nu’uuli. Ua ese fo’i la’u va’ai i tagata i afiafi ta’itasi, ua tutula’i tafa ala ina ia maua se maimoaga i le fa’asologa o gaoioiga a ‘auva’a, ae le faigofie lava i le faiva i le tai o lenei tausaga. Ua tele va’a, ma ua tau fai lelei uma fo’i sa, ae le taulia ai, ua matua malolosi fo’i ‘auva’a. O le tala lava i lenei fa’agatama, sa sasi mai lava tai, ae ia tonu lava uta! O le va’a lava e muamua mai, o ia lava lena!

Ua ‘ese fo’i lenei tausaga, i le oso a le Lakapi lea sofa’i mai ai e le Malisi, ae ua fesoasoani malosi i ai le Asosi Fa’atina o le Lakapi i Amerika Samoa, ae o le fa’atupega malosi fo’i a le Kamupani a le TMO i lenei tausaga, fa’afetai tele le lagolagosua ma le lotonu’u e fia talimalo lelei ai, ma toe si’itia ai le kia e fa’atautaia ai le Lakapi i le tatou  malo nei.

Ua fa’alogo atu, ua muamua mai tama ma teine mai Ausetalia, Tonga ma Niu Sila i Amerika Samoa, ta’a’alo iinei i le Volipolo ma le Lakapi, ae mulimuli ai fa’ato’a sisi’i atu foe i Samoa e fa’ailoga le 50 tausaga o le malo Tuto’atasi. Se fa’afetai, ua e tulaueleele uma ia Samoa na lua, aua afai e te asia sasa’e ae le o’o i sisifo, e te le’i va’aia samoa atoa!

E i ai le tama ua ofuvae ae e i ai lava le tama o lo’o sulu’ie pea, pule oe po’o ai e te fiafia tele i ai, ae o aga a tama nei e lua, e ese a la’ua agaifanua, ae tasi le la’ua anava tausi i le la aganu’u e aotelega i le la’ua gagana e tasi ai o la’ua loto.

O a nei tapenaga uma ua tatou i ai ma Sa e valu ua tao’oto mai a’o se i’a i le moana, e fili ai se agava’a i le tai, e le tuvae pe afai ae le auai le Atua e mafutaina o ta’ua fa’amoemoe. Ia i ai le ola taupulea e salani ai nei teuteuga uma a le tatou malo mo lona aso fa’ailogaina fa’aletausaga. Pe tua ma ni a taumafaiga a lou Sa, po’o lau Kirikiti, po’o lau Au Volipolo, po’o lau ‘au Pasiketipolo, po’o lau ‘au Lakapi, ia e fiafia sa e taumafai i lenei tausaga e fa’ailoga ai le Sisigafu’a a lou malo.

O le manumalo o le mea e se’e fa’a-Tausala i lea tausaga ma lea tausaga, ae o Uso o le mea e tumau lea, aua na faia lava i la’ua ia tasi lo ta anava e le Silisili Eese o le Foafoaga.

Lea la ua saili Samoa i ana tama fanau ia matua tapena i ala, uiga ma tu e mafai ai ona malupuipuia tagata o le a asiasi mai i ona laufanua. E le o se tiute faigofie, ona faia lea o a’oa’oga i vaiaso e tolu mo Malu uma o le Malo o Samoa, e toe a’otauina ai i latou i tomai eseese, fa’aleoleo nana ma leoleo su’esu’e, ia matua mautinoa ua faia o latou tiute e puipuia ai tagata mai fafo, lea e masalomia, e tauau ina o’o mai ma ni faiga fa’aterarisi i laufanua o Samoa, ia malutia i latou uma i lo latou nonofo ai i Samoa i le Sisigafu’a e fa’ailoga ai le 50 tausaga o lana faigamalo.