Ads by Google Ads by Google

Su e le tiamaa le faili a le RSA i le pueina o a latou pese

Ua faaulu le tagi a le aufaipese lauiloa o le Tiamaa mai Toamua e faasaga i le pulega ma le faili a le RSA mo le tapueina o a latou pese ma faatau atu i le atunuu lautele.

O lo o i Samoa i le taimi nei le taitai o le aufaipese o le Tiamaa, le susuga Nuualiitia Fafo Aulalo mo feutagaiga ma le latou loia. Na faaalia e Nuualiitia, e pe a ma le 10 a latou fatuga na pueina i kaseti ma CD e le faili a le RSA ma faatauina atu e le gata I Samoa ae faapea foi i tagata Samoa o lo o alala I atunuu I fafo. E pei ona silafia, o totino o le aufaipese o le Tiamaa e aofia ai Nuualiitia Fafo Aulalo, o lona uso o Fale Aulalo ma le susuga Pagamalie Iopu Faivalu ma o le tele o a latou fatuga i le vaitaimi na faatoa amata ai, sa pueina i le uaealesi faasalalau o le 2AP.

O le aso la ananafi na asiasi atu ai Nuualiitia ma Pagamalie i le 2AP e saili ni kopi o ia pesega tuai na pueina i le vaitaimi ae lei faaaogaina ni kitara e alu i le uila, ina ia faamaonia ai le latou mau i le faamasinoga. O lo o molimau mo le Tiamaa nisi o alii faasalalau iloga sa faigaluega ai i le 2AP i lena vaitaimi, le tofa Apulu Laneselota Polu ma le tofa Vaasiliega Iupati Lagaaia lea o lo o faigaluega lava i le 2AP e oo mai lava i le taimi nei.

O le vaiaso fou o le a amata faagasolo ai lea mataupu i le faamasinoga.