Ads by Google Ads by Google

Su’esu’e le mafua’aga o le manu’a o se ali’i leoleo

O lo o fa’agasolo i le taimi nei su’esu’ega a le Matagaluega o Leoleo, i le mafua’aga o le fa’alavelave lea na manu’a ai se ali’i leoleo mai le Ofisa o Leoleo i Leone i le taeao ananafi, lea o lo o taofia i le falema’i o le LBJ i Fagaalu i le taimi nei, mo le fa’agasoloina o ona togafitiga.

 

O molimau eseese sa mafai ona maua e le Samoa News e uiga i lenei fa’alavelave, o lo o masalomia ai le manu’a o le ali’i leoleo i se pulu fana, peita’i na taua e le afioga i le ali’i kovana ia Lolo Matalasi Moliga, lea fo’i sa i ai i le falema’i i le taeao ananafi e fa’apea, o le taotoga a le ali’i leoleo o lo o fa’agasolo i le taimi nei, o lo o taumafai ai e aveese tioata o lo o a’afia ai lona ao atoa ai ma isi vaega o lona tino.

 

Na fa’amaonia mai fo’i e le alii kovana i le Samoa News le tau fai galulue uma o vaega o le Ofisa o Leoleo, i le su’esu’eina o le mataupu atoa lenei, atoa ai ma le tau sailiina o i latou o lo o masalomia le a’afia i le fa’atinoina o lenei solitulafono.

 

Saunoa Lolo e fa’apea, e o o mai lava i le taimi nei e le matua manino mai tulaga o su’esu’ega a le Ofisa o leoleo o lo o faia e fa’atatau i lenei fa’alavelave.

 

O feso’otaiga i luga o upega o feta’ilagi i le ‘Facebook’ na mafai ai ona silafia e le to’atele o le atunu’u lenei fa’alavelave ananafi, ma amata ai loa ona tu’u fesili le to’atele i le mafua’aga o le fa’alavelave.

 

I se fa’amatalaga e le o mafai ona fa’amaonia mai e leoleo, sa tu’uina mai e ni molimau i le Samoa News, sa taua ai,  o le ali’i leoleo ua manu’a sa malaga ma ni isi ali’i leoleo se to’alua i totonu o le ta’avale a leoleo PS-24, lea sa ta’amilo i se vaega o Lepuapua i le taeao ananafi, mo le fa’atinoina o a latou tiute masani.

 

O ali’i leoleo e to’atolu sa i totonu o le ta’avale a leoleo i le taimi na tupu ai le fa’alavelave, e aofia ai ni leoleo sinia se to’alua fa’apea ai ma le ali’i leoleo laititi sa manu’a.

 

Na taua i ripoti e fa’apea, sa tu’u avanoa le ta’avale a leoleo i se tasi o ta’avale sa aga’i atu i luga o le auala tele i Lepuapua, i se taimi o le taeao sesegi ananafi ae lei malamalama, ae tula’i mai ai loa le fa’alavelave ina ua fana mai e le ta’avale lea le ta’avale a leoleo ma manu’a ai le ali’i leoleo na a’afia.

 

Na asia e le Samoa News le falema’i i Fagaalu i le taeao ananafi, ma molimauina ai le to’atele o leoleo o lo o tiute ai i le falema’i.

 

Na fa’amaonia mai e se tagata faigaluega a le falema’i e le fa’ataga ona ia talanoa i tusitala i mataupu fa’apenei e fa’apea, o lo o i ai se ali’i leoleo o lo o faia ona togafitiga i le vaega a le ER, ona o manu’a e mafua mai i mea ma’ama’ai na a’afia ai lona tino.

 

Na pau le molimau a le tagata faigaluega lea, “o lo o fa’asolo lava ina manuia le ali’i leoleo, e le o i ai fo’i ona manu’a i se tulaga e ono lamatia ai lona soifua, talu mai lava i le taimi na taunu’u mai ai seia o o mai i le taimi nei, o lo o fa’atino pea lava galuega a foma’i mo ia”.

 

E le i mafai ona maua se fa’atalatalanoaga a le Samoa News ma le Sui Komesina o Leoleo sa i ai fo’i i le falema’i ananafi, i le tulaga tonu e fa’atatau i lenei mataupu.

 

Na pau le saunoaga a se tasi o ali’i leoleo sinia i le Samoa News, e le mafai ona maua se fa’amatalaga atoa e tusa ai o le mea sa tupu, ona o lea fa’atoa tau amata a latou su’esu’ega i le taimi nei.

 

Ae na taua e se molimau fa’atuatuaina i le Samoa News ananafi e fa’apea, o lo o matua pisi leoleo i le tau sailiina o le ta’avale lea o lo o masalomia na fana mai ai le pulu na a’afia ai le ta’avale a leoleo, ma mafua ai ona manu’a le ali’i leoleo.

 

O lo o masalomia fo’i, o le ituaiga fana o le .22 lea sa fa’aaoga i le fa’alavelave lenei, e ui o lea tulaga e le i mafai ona fa’amaonia mai e se sui o le Ofisa o Leoleo.

 

Na taua e se molimau e fa’apea, e masalomia le i ai o se feso’otaiga o le mataupu lenei ma le isi mataupu lea na tuli ai fo’i e leoelo se ta’avale a se ali’i i le po o le kerisimasi na te’a nei, lea e oo mai fo’i i le taimi nei e lei maua lea ali’i.

 

O le tutupu mai ai o mataupu fa’apenei e a’afia ai leoleo ma tulaga o ‘aupega malolosi i le atunu’u, na taua ai e ni isi o tagatanu’u sa i ai i le falema’i ananafi, le tatau loa lea ona fa’a ‘aupega leoleo ina ia mafai ai ona puipui lo latou saogalemu i le taimi e tutupu mai ai fa’alavelave matuia fa’apenei.

 

E pei ona silafia e le atunu’u, e o o mai lava i le taimi nei o lo o fa’aauau pea su’esu’ega a le Ofisa o Leoleo i le fa’alavelave lea fo’i na tafana ai e se ta’avale le Ofisa o Leoleo i Leone i le amataga o Novema.