TULAGA O TA’ALOGA: PINE SILIVA MAI AUSETALIA & LIKI VOLI


Jerold Papu (itu tauagavale-mamao) o Amerika Samoa sa maua le pine siliva i le vaega o e Physique mo tama talavou, [Men's Jr Physique], i le tauvaga Sailiga Siamupini Bodybuilding i Ausetalia. [ata foai]
TALIU MAI SAUIA IFBB BODYBUILDING MA PINE SILIVA

Pago Pago, AMERICAN SAMOA — O le tatou au Teuteu Tino a le Sau Ia IFBB Bodybuilding lea sa malaga mo le Sailiga Siamupini i Ausetalia ua taliu mai le to'atolu na malaga ma le 2 Pine Siliva.

O le to’atolu mai Amerika Samoa na tauva i le vaega mai le 41 tausaga se'ia o'o i le 70 lea na tauva ai Floyd Scanlan ma o ia na tulaga lua ma le pine siliva.

O le isi pine o le susuga Jerold Papu na tauva i le Physique mo le vaega o tama talavou, [Men's Jr Physique] le tauvaga lea e na'o le manava e aga'i i tau'au e sailia ai le tino lelei.

Peita'i o le tama'ita'i e to'atasi sa malaga ai mo le tauvaga a le Women's Jr Physque na maua ai e Titiula Manuma le tulaga fa. O se ta'amilosaga e le'i faigofie lea na faia ia Mati 15-18, i Sydney ma sa malaga faatasi le au teuteu tino lenei a Amerika Samoa ma le latou fa'amasino e to'atasi mai le Sau Ia IFBB Body Building o Sala McMoore.

Fa'ailoa mai e Scanlan, "O le matou vaega e faigata tele aua o loo matou tauva fa'atasi ma tama talavou e na'o le ta'i 41 tausaga, ae o lea o le ua atoa le 61 tausaga le matua, e matua eseese lava tino i le taimi nei, pe afai e te va'aia i ai, ae o le taumafai lava le mea sili, ua fa'afetai ua lautogia is e pine. Ae tatau ona finaua lenei mataupu i le va o Asosi Teuteu Tino ina ia tu'u eseese mai nei vaega a le Masters i le Jr Master - 41-50 Tausaga; Masters Senior i le 51-60+, aua e le taitai tutusa tino i lea vaitau o le soifua."

O se mataupu e tatau lava ona mataala ai fo'i tatou Asosi nei, ina ia mautu ona tapena ia talafeagai ma tausaga nei tauvaga, aua o le tino e vave mou ese atu le malosi pe a o'o ina atoa le 50 tausaga ma faasolo atu ina matutua fo'i.

AMATA FILI 'AU VOLIPOLO FA'AVAOMALO A AMERIKA SAMOA

E ui le'i mae'a le ta'amilosaga Volley Ball a le Sisigafu'a 2018 lea e fa'atautaia i aso To'ona'i ta'itasi, ae ua toe fa'alauiloa i Kalapu Volley Ball uma o lo'o auai i le Asosi Volley Ball a le atunu'u, ina ia utagia le fa'aaliga ua mae'a piki ni tama ma teine ta'aalo e amata ona kolenia mo le fa'amoemoe e tu'ufa'atasia ai ni 'au fa'avaomalo a le atunu'u, ae le'i fa'amauina atoatoa lea tulaga.

O lona uiga, o lo'o maua pea sou avanoa pe afai o le a fa'aauau ona e ta'alo lelei pe pa'au ane fo'i i koleniga a i latou ua mae'a auai mo lea fa'amoemoe.

Ua fa'alauiloa mai fo'i e leai ni ta'aloga e faia i le aso To'ona'i nei, ae fa'aauau ona faia Koleniga nei i tagata ta'a'alo, ma o iina fo'i o le a piki ai loa Au Fili ma koleni fa'atasi ai loa sui uma ua piki ia maua le ta'a'alo fa'atasi.

Ua leai fo'i se fonotaga e faia i le aso Tofi nei, ae ua talosagaina le mamalu o sui uma e masani ona auai i fonotaga, ina ia pa'au ane i le aso Lua i le afiafi mo le fonotaga masani ai.

O le a toe fa'aauau ta'aloga fa'atulagaina ia Aperila 7, 2018, ASCC Gymnasium, mo le sailiga o au Volley Ball to'avalu maualuga, ma agai atu ai le ta'amilosaga o le sisigafu'a 2018 o lo'o fa'aauau nei, i le sailiga o 'au siamupini 2018.

SILIA 25 'AU TAPOLO TA'AMILOSAGA GOLF A LE ROTARY

Ua fa'ailoa mai le matagofie o le tauvaga a le silia ma le 25 Au Tapolo na lesitala i le latou Ta'amilosaga Tapolo  a le Rotary e saili tupe ai mo a latou galuega fa'atino mo le mamalu lautele o le atunu'u.

Ona o lenei fo'i le Kalapu sa latou fa'atupeina ma fa'atino le Poloketi ua sili ona fiafia ai le fanau ma le mamalu o le atunu'u i le taimi nei, le Pala Lagoon Swimming Pool, o lea e le motusia ai latou sailiga tupe, aua e aoga tele nei taumafaiga mo galuega e atina'e ai le atunu'u atoa o Amerika Samoa.

E ese mai lea tauvaga sa fa'atino fa'atasi ai ma le Se'i ae na tofu kamupani, o pa'aga a le Rotary na tauofo mai ai fa'ailoga.

O fa'ailoga o le se'i na muamua le fa'ailoga a le Hawaiian Air 110,000 maila i lou sui ina ia maua ai fo'i sau pepa malaga i lea va'alele. Lona lua o fa'ailoga o le Televise e foa'i e le Cost U Less, Lona tolu o fa'ailoga o le Moa Vao mai le Tool Shop, ma le lona fa o fa'ailoga o le X-Box mai lea Tropik Traders. Ae tele fo'i ma isi fa'ailoga peita'i o le fa'ailoga silisili lava sa tapena i ai le Neil's Ace Home Care o le Masini Talavalava o le ituaiga o le Whirlpool.

Ua le mautu pea lava se tala o le latou seleni, ae ua fa'afetaia le pa'ia maualuga o le atunu'u ae maise i 'au ta'itasi sa tauva ona o le sapaia o le latou fa'amoemoe i lenei tausaga.

Comment Here