Tulaga o ta’aloga handball a tamaita’i & football a tupulaga talavou
![O se va'aiga i le 'au Handball a Amerika Samoa na avea ma sui o le teritori i le ta'amilosaga a Au Handball i le Vasa Pasefika e aofia ai Amerika Samoa, Ausetalia ma niu Sila. Ua tulaga lua nei i tatou ae muamua Ausetalia ma Niu Sila e tulaga tolu. [ata: Leua Aiono Frost]](https://www.samoanews.com/sites/default/files/styles/article_normal_image/public/field/image/SN%20Photo%20Handball.jpg?itok=wznVcY0L "O se va'aiga i le 'au Handball a Amerika Samoa na avea ma sui o le teritori i le ta'amilosaga a Au Handball i le Vasa Pasefika e aofia ai Amerika Samoa, Ausetalia ma niu Sila. Ua tulaga lua nei i tatou ae muamua Ausetalia ma Niu Sila e tulaga tolu. [ata: Leua Aiono Frost]")
![O se va'aiga i le taimi ua fa'atasi atu le ali'i talavou o Louis Murphy, e tupuga atu i Samoa si ona tina, e faia ana a'oa'oga i le fanau talavou sa o'o ane i le Stadium i Tafuna i le aso To'ona'i o le vaiaso ua te'a. [ata: Ete Lutu]](https://www.samoanews.com/sites/default/files/styles/article_normal_image/public/field/image/Louis%20Murphy.jpg?itok=kpV2R1Dl "O se va'aiga i le taimi ua fa'atasi atu le ali'i talavou o Louis Murphy, e tupuga atu i Samoa si ona tina, e faia ana a'oa'oga i le fanau talavou sa o'o ane i le Stadium i Tafuna i le aso To'ona'i o le vaiaso ua te'a. [ata: Ete Lutu]")
![O se va'aiga i le fanau a'oga ua fa'aaogaina tatau le avanoa na fa'asoa atu ai fo'i se iloa o lo'o ta'alo ai le ali'i lauiloa a le 49ers Louis Murphy i le aso To'ona'i ua te'a, fa'atasi ma le tina o Etenauga Lutu. [ata: Leua Aiono Frost]](https://www.samoanews.com/sites/default/files/styles/article_normal_image/public/field/image/Sharkies%20learning%20from%20pros.jpg?itok=ipu71_8W "O se va'aiga i le fanau a'oga ua fa'aaogaina tatau le avanoa na fa'asoa atu ai fo'i se iloa o lo'o ta'alo ai le ali'i lauiloa a le 49ers Louis Murphy i le aso To'ona'i ua te'a, fa'atasi ma le tina o Etenauga Lutu. [ata: Leua Aiono Frost]")
![O se va'aiga lea i le toniga fa'apitoa e ta'a'alo ai tama'ita'i o le ‘au Handball a Amerika Samoa ma ua tusia ai o latou fa'ai'u i le papatua, e lelei e iloa ai le teine ta'alo ma lona tupuaga. [ata: Leua Aiono Frost]](https://www.samoanews.com/sites/default/files/styles/article_normal_image/public/field/image/Leuas%20handball%20team.jpg?itok=RAxL9Bub "O se va'aiga lea i le toniga fa'apitoa e ta'a'alo ai tama'ita'i o le ‘au Handball a Amerika Samoa ma ua tusia ai o latou fa'ai'u i le papatua, e lelei e iloa ai le teine ta'alo ma lona tupuaga. [ata: Leua Aiono Frost]")
Pago Pago, AMERICAN SAMOA — Ua taliu mai i le aso Gafua o le vaiaso ua te’a i fanua le 'au Handball a tama'ita'i a Amerika Samoa e i lalo o le 17 tausaga le matutua i le latou malaga sa masi'i atu ai i Ausetalia e fetaui ma 'au malolosi a le Pasefika.
O se tala fiafia, ana na faia'ina ai le 'au a Niu Sila i lenei ta'amilosaga, ae malo ia i latou le 'au malosi a Ausetalia. O se tala fiafia e le fa'amoemoe i le ta'amilosaga lea le auina atu o lea 'au i le Olimipeka, peita'i ua loa ona maua'a le avanoa lea o le 'au Handball a tama'ita'i talavou, e masi'i lava i le ta'amilosaga a le Youth Olympics a le Lalolagi.
O le susuga Richard deSaulles lea sa maua mai ai lenei fa'aiuga o le taumafaiga a le tatou 'au i Ausetalia.
"O lo'o tumau le lelei tele o le ta'alo a tama'ita'i o le 'au a Amerika Samoa, peita'i na toe lusi atu lava le latou manumalo ia Ausetalia, ae ua sau fo'i Ausetalia i le malosi e gata ai, aua e le o toe fia faia'ina i latou i o latou lava malae. Peita'i o Niu Sila ua tulaga tolu i lenei fetauiga a le tatou itumalo e aofia ai Ausetalia, Niu Sila ma Amerika Samoa. Na faiaina i latou ia Amerika Samoa ma Ausetalia,” o se tala lea a deSaulles.
O lo'o aga atu le tatou 'au Handball a tama'ita'i lenei, i le Youth Olympics lea e faia i Argentina i le tausaga nei.
AUAI "LOUIS MURPHY O LE 49ERS" TA'ALOGA FOOTBALL I LE STADIUM
O se fa'amalosi'au silisili fo'i na maua e le fanau talavou o lo'o tauva i le Football ina ua auai atu le ali'i ta'alo lauiloa o Louis Murphy o le 'au a le San Francisco 49ers i le Malae Taalo i Tafuna e maimoa i tausinioga a le fanau talavou, ae maise e faia fo'i ona a'oa'oga fesoasoani i le fanau, lea sa matua iloga ona fa'aaoga e le fanau talavou i le aso To'ona'i na te'a nei.
O lenei ali'i o le alo o le tama'ita'i Samoa o Filomena Alefosio Bartley, o se uso fo'i o le tama'ita'i o Su'a Lusia Bartley o Tafuna.
"O le malaga mai, e fa'auia mai fo'i se tautua e ta'u ai le igoa pele o si ou tina, ae o le mea sili, ia maua se avanoa e fa'asoa ai le iloa ua maua i le fa'agatama o le Football, i le fanau talavou o lo'o mana'omia se ta'ita'iga lelei. O le pu'epu'e maua lava o nai metotia ma le taumafaiga ia lelei le ta'alo, e mafai ona tua i ai a'o tauva i lea fo'i fa'agatama,” o se tala lea a Murphy.
Na toe i ai fo'i o ia i le Malae Ta'alo i le aso Gafua ina ia fa'aauau lava lana taumafaiga e fefa'asoa'i ma le fanau talavou ao le'i tu'uva'a ese atu i le afiafi. O lana malaga na o'o mai i Samoa ma maimoaina le malo sa soifua a'e ai si ona tina.
"E matagofie lava Samoa ia, e to'atele mamao tagata iina nai lo i tatou i Amerika Samoa peita'i, o iinei e tauva tamaiti i le football, ma e tatau lava ona faia nai fesoasoani nei mo le fanau e auau i le football latou olaga,” o sana tala lea.
O lo'o soifua lava fo'i le tina o lona tina, Seleni Bartley i Tafuna, ma o se tasi lea fiafiaga tele ia Murphy. O lea ua atoa le 89 tausaga o lona tina matua.
Ona o lo ua mae'a ona taumafai na'o ia i lenei malaga, ua ia fa'ailoa ai, "Ua i ai lou naunauta'iga, i le tausaga fou i le vaitau o le taumafanafana, o le a matou o mai ai ma nisi o 'au uo e tafafao mai ma faia se matou fetufa'iga fa'apea ma alo o Amerika Samoa, ina ia fa'aleleia atili lo latou tomai i le Football, ma fa'aosofia atili lagona e fia tauva i lea fo'i fa'agatama i o latou soifua a'o'oga ai i Kolisi ma Iunivesite."
LEAI SE FAIA'INA - AU FOOTBALL A LE BEARS
I le ta'amilosaga o 'au football a le fanau talavou e a'o'oga i le Elementary ua tumau ai pea le manumalo a'ia'i o le BEARS. O lea liki Football ma o le latou ta'aloga i le aso To'ona'i na te'a nei sa fetaui ai ma le 'au malosi a le Steelers, peita'i, e le'i auala taumafaiga a le Steelers i le Bears, e 20 - 6 'ai o lea fetauiga mata'ina.
I le fa'aiuga o lea fetauiga mata'ina fo'i ua tula'i mai ai, e fetaui le Bears ma le Rams i le ta'aloga o le sailiga o le siamupini o le Liki Football i lenei tausaga.
O le Rams sa fetaui ma le Packers ma sa manumalo mai ai i 'ai e 22-14, ma ua iloga ai, o i la'ua o le a sailia le siamupini ma le Bears i le fa'aiuga o lenei vaiaso i le malae ta'alo lava i Tafuna.