Ads by Google Ads by Google

Tony Finau - alo o Amerika Samoa & Tonga - Tauva Tagapolo

Le ali’i o Tony Finau, i lona fiafia tele i le aso Lulu, Aperila 4, 2018 i le taaloga Tapolo a le Masters i Augusta, Georgia, ona e tasi lana ta ae maua le manuia.  [ata: AP/Carlie Riedel]

Augusta, GEORGIA — Masalo e to'atele e le o taumulimuli i taumafaiga a nisi o fanau i le Fa'agatama o le Tapolo po'o le Golf, peita'i e mautinoa e gafatia e le ituaiga malosi e maua i a tatou fanau ni pine mai lea fo'i fa'agatama, pe a o'o lava ina matua'i tapena lelei fanau i lea taaloga.

O le ali'i o Tony Finau, o se atali'i e tupuga mai Amerika Samoa ma Tonga, ua ta'uta'ua lana taumafaiga i lea fa'agatama, ona o lana ta na tasi lava ae ulu i le Ta'amilosaga PGA Tour lea e ta'a'alo ai tagata Polofesa i le Tapolo, "The Masters”, i le aai o Augusta, le setete o Georgia.

I se lipoti fa’asalalau e faapea, o lana ta na tasi lava ae ulu, ona matua fa'atumulia lea o lona fiafia, tamo'e mai ma le fiafia, ae mapeva ai lona vae, peita'i, sa ia taua, "Ou te mafaia lava ona fa'aauau le ta'amilosaga a le Masters!"

Ua fa'ailoa i ata tapu'ea e le au fa’asalalau le taimi tonu lava na mapeva ai le vae o Finau, ma lana ta fou ua logologoa nei, ma ua avea fo'i ma tala tutasi i le taimi nei i mekasini ma nusipepa uma i tala o ta'aloga.

O lona tala'aga ua fa'alauiloa mai i ona fa'amaumauga, o se atali'i e usita'i ma fa'alogo i ona matua i fautuaga fo'i ina ia i'u manuia ana aoaoga. I le 17 o ona tausaga, ua filifilia ai e ia le Tapolo e avea ma ta'aloga e fesoasoani mo le lumana'i o sailiga o le atamai ma ona fa'ailoga i le Kolisi. O le tausaga lava lea na amata ai ona tauva fa'apolofesa.

Na soifua o ia ia, Setema 24,1989, i Salt Lake City, Utah ma o lona umi lea ua i ai nei 6"4inisi ae 200 pauna le mamafa.

O lana ulua'i PGA Tour i Kanata o le tausaga e 2013, lea sa maua ai e ia le tulaga tolu ma sa tutusa i la'ua ma se tasi ua loa ona ta'alo i lea lava fa'agatama. Mai lena ta'amilosaga sa ia mauaina ai sona avanoa i le Web.Com Tour i le 2014 ma sa maua ai e Finau le manumalo i le Stone Brag Classic, lea na toe tauva ai ma maua ai e ia le tulaga 8 i le fa'aiuga o lena tauvaga.

O iina fo'i la na toe mausali ai lana Card e ulufale ai i le PGA 2015, lea ua fa'aauau mai ai pea ona lautogia e ulufale i Ta'amilosaga uma a le PGA Tours e o'o i le Masters.

E ese mai nei ta'amilosaga tetele, ae le mafai ona ia tu'ua ai lona auai fa'atasi ma lona uso laititi, Gipper Finau i le ta'amilosaga a le Big Break i le tausaga 2009.

E ui la ina o lea e faaauau mai lava ana taumafaiga e o'o mai i lenei tausaga, ae o le fa'ai'uga o le ta'amilosaga a le PGA Tour 2015, lea sa ia tulaga 8 ai, na maua ai e ia le aotelega o ana fa'ailoga e $2,071,921. Ua avea le atali'i ma milionea i lana ta'aloga o ta'alo fa'apolofesa ai.

Ae o lea lava la e taumafai i le taimi nei, ua 28 ona tausaga, ua iloga e tagata maimoa ma i latou e naunau i lea fa'agatama, e le toe fa'avaivai le aga'i mai i luga a lenei alo talavou, ua tali tutusa ma le ala sa uia mai e Tiger Woods ma le tama fo'i mai Fiti o VJ.

O le tala mai na ofo tagata uma, aua e moni lava na mapeva le vae o Finau, ae na ona toe se'i lava o le vae fa'aauau ma le ta'aloga, ae fa'ato'a faia mulimuli ai lana talavai e va'ai tonu ai se afaina o lona vae o i ai.

"O se aso ua ese, grazy tele, ae ou te fa'afetaia le tapua'iga uma a ou aiga ma ou tagata o lo'o maimoa mai, o nisi ua fa'ao'o mai a latou fe'au fa'amalulu ona o lo'u fa'amanu'alia ai fo'i, fai si fa'atamala, ae aua o a outou tatalo lea e lagona ai le malosi, tusa po'o le a e fa'aauau lava le auai o le tou atali'i i le ta'amilosaga o loma nei,” o se tala lea a Finau ua fa’asalalauaina e le au tusitala i Amerika.

Ua lipotia e faapea, afai e le mafai ona fa'aauau e Finau lana ta'aloga lea, o lona uiga o le a na'o le to'a 86 tagata o le a fa'aauau ona tauva, ma o se toeititi lava lea ua mafai ona ta'a'alo i lea Masters, talu mai le tausaga e 1997 lea na umia ai e Tiger Woods lona malo i le na'o 12 ta ma fa'amau ai i le taua'aoina atu ia te ia o lona jacket lanu Meamata o le PGA Tour o lena tausaga.