Ads by Google Ads by Google

Tapena ‘au handball U18 Amerika Samoa - Youth Olympics 2018

The nine-member Women's Under-18 Handball American Samoa team that will be competing in the 2018 Youth Olympics in October, in Buenos Aires, Argentina. The team is pictured with the American Samoa Handball Association president and coach, Carl Sagapolutele Floor Sr. (far right) at their new handball field next to Night Hawk Maliu Mai Resort.[photo: Leua Aiono Frost]

Pago Pago, AMERICAN SAMOA — E to'aiva tamaita'i ua mae'a ona faia koleniga fa'apitoa mo le 10 vaiaso ina ia matua atoatoa se tapenaga mo ta'aloga faitaulia sa feagai ma i latou i le vaitau ua tuana'i, peita'i o lo'o fa'aauau pea a latou koleniga fa'apitoa e ao ai ina tapena mo le Ta'amilosaga a le Youth Olympics lea e faia ia Oketopa 2018 i Buenos Aires, Argentina.

O lea avanoa fa'aauro na mautinoa lava ona ua latou fa'ato'ilaloina le 'au malosi a Ausetalia i le ta'amilosaga e sailia ai 'au mo le Youth Olympics i le World Beach Handball Chapionships i Mauritus, ia Aukuso 2017.

I koleniga ua mae'a nei sa fa'atautaia lea e le ali'i faia'oga mo Ta'aloga Afeleti, Clayton Mahuka, ina ia lava le manava, ia le mafai ona toe fa'aletonu le taumafaiga a le 'au Handball filifilia lenei.

"O tamaita'i nei ua i ai lo latou loto e fia manumalo mai i so'o se latou ta'aloga faitaulia, ae peita'i, i a latou ta'aloga i ta'amilosaga ua mae'a, na va'aia lava e matou sa avea ma faia'oga, ua le lava le manava. Afai e o'o loa i lea tulaga, amata ai loa ona sese fa'ai'uga e faia ma le maua ai se 'ai, pe sao mai ai fo'i le osofa'iga a le isi 'au ma sikoa," o se tala lea a le ali'i faia'oga Carl Floor Sr. e tusa o le mana'omia ona lava le manava a le 'au, ma ua afua ai ona koleni fa'apitoa tamaita'i ta'a'alo mo le 10 vaiaso soso'o ua tuana’i i le Malae Ta'alo Veterans Memorial Stadium.

Ona o le koleniga fa'apitoa i le tamo'e sa nafa lea ma Mahuka, na fesiligia ai fo'i o ia, pe ua lava lea mo le 'au ia tapena ai mo le fa'amoemoe.

"Ua iloga ua matua lava tapena tama'ita'i ta'a'alo nei mo le vaega lua o le koleniga fa'apitoa mo Oketopa, aua o le tele o le ta'aloga e faia i le malae oneone, e fa'aauau ai lava ona fa'alava ai iina le latou malosi o le manava, ae ia iloa fo'i ona fa'agaoioi le tele o fegi e manuva ai le polo ma sao atu ai mai le puipuiga a le isi 'au o latou fetaui. O le matua faigofie lava ona a'oa'o ma fa'atonutonu o tamaita'i o le 'au lea, ua iloga lo latou naunau i le malo,” o se tala lea a Mahuka.

O le tatou 'au lava lea e tasi sa masi'i i Niu Sila e ta'a'alo ma le 'au fili o tama'ita'i matutua a Niu Sila, ma sa manumalo a'ia'i mai ai ia Fepuari 2018. O se tasi lea e pine fa'amau, ua loto nei tama'ita'i talavou U18 e toe taliu mai ma se manumalo mai le Youth Olympics.

O le to'aiva lea ua kolenia fa'apitoa e aofia ai: Naosi A'asa, Roselyn Faleao, Danielle Floor, Stephanie Floor, Jasmine Liu, Frances Nautu, Imeleta Mata'utia, Luava'a Tofaeono ma Salatupumasina Toilolo. O i latou fo'i nei, ua mautu o le 'au fili a Amerilka Samoa mo le U18 Women's Beach Handball Youth Olympics.

O le ali'i peresetene o le Handball Association i Amerika Samoa, Floor, e malaga lava ma lenei 'au i taimi uma e masi'i ai, ae o ia fo'i lea o lo'o lalamua i le taumafaiga ina ia mautu le latou malae Handball ua mae'a fa'atuina i le Night Hawk Maliu Mai Beach Resort ma ua avea fo'i ma latou igoa i le taimi nei, Night Hawk Handball Team. O le malae ua fa'aigoaina o le Night Hawk's Nest, ma ua fa'ailoa mai fo'i le latou fa'afetai tele mo le sapaia pea e le tofa Tanuvasa Vailoatai Levaula ma le faletua o Sina o le latou taumafaiga.

O aso To'ona'i ta'itasi o lo'o faia ai koleniga fa'apitoa ma e mafai fo'i ona maimoaina e nisi o fia malamalama i le faiga ma aga o lea fo'i ta'aloga.

O le ala fo'i lea o le fa'atulaga o le taimi lenei, e a'otauina ai le 'au atoa i le ta'a'alo fa'atasi, iloa patino o ala e fepasia'i ai le polo ina ia mati'e se latou taulimaina o le polo mo se 'ai. O ala o lea fo'i ta'aloga o le mata'alia ma le lava o le manava i taimi uma e ta'a'alo ai. O le vaega lua lea o le koleniga ua amatalia nei.

O aso Gafua ma aso Faraile e auai atu ai Mahuka i le malae oneone ina ia mataituina le manava ia lava a tama'ita'i ta'a'alo, fa'atasi ai loa ma Floor mo le mataituina o le ta'alo ia manuva fa'atasi ma le agaga e tasi ia manumalo.

Ua iloga le masau o togi a tama'ita'i, ma ua fa'ailoa mai e le tama'ita'i o Stephanie Floor, "E le manatu fa'amaualuga i le ta'aloga, ae ia maualuga le manatu ia maua se malo! O le ala lea o le tausinio i le mea e gata ai le iloa ma le malosi."

E tusa ai ma le tala a Floor, "Ou te mana'o ia matua lava le malosi ma le iloa o le 'au lenei e tauva ai i le Youth Olympics, aua e leai se taimi e toe maua ai se isi avanoa sili mo le tatou 'au nai lo Oketopa 2018 i Argentina, ia mautinoa lava ua avatu uma i ai le malosi ma le iloa i lea ta'aloga, ona o se sao lava ia maua mo le tatou atunu'u i lea fa'agatama."