O le vaiaso nei sa amatalia ai Ta’aloga o el Liki a Tamaitai i le Aso Gafua, na tatala malas ai ‘Teine o le Asaga,’ mai Aunu’u ma le ‘Mosooipala 2’ mai Leone.

Sa va’aia lava le matafiafia o nai teine ina ua amatalia le latou liki o lenei tausaga 2017 i le fa’agatama fo’i ua laulauvivilu ai le atunu’u.

Sa va’aia i si tina matutua lava i le ta’aloga i le aso Gafua, fa’apea a tagata na maimoaina lenei ta’aloga, ai ua le toe mafafai ona ta’a’alo nai teine ia, ae leai, o lo’o fa’amamalosi mai lava, ui ina ua va’aia ua leaga mea faigaluega!

E le o toe faia lava se fiapoto a’o se fautuaga i tina ua leva i lenei ta’aloga o le kirikiti, ae pei a ua uma le tou taimi kirikiti, ua fai ifo tatou, a’e tu’u ane ia le avanoa i nai teineiti laiti lena e va’aia le fiafia i lenei ta’aloga, e amata ona o a’e e ta’alo.

O sao na o le lumana’i i le fa’agatama mo tatou afioaga, ae aga ane i tatou e faituaina le lalovaoa i a latou taleni. A latou manoamia se fesoasoani, ia o outou e fesoasoani i ai.

Mai le sapoina o le polo, ma le fa’ate’a o le polo, i le mea e tutu mai ai pe a talitua’a, o mea uma na e mana’omia ai le fesoasoani a le ‘au matutua.

O ‘Teine o le Asaga’ olo’o tumau pea le lelei, ua tusa nei o le fa tausaga. 2014 tulaga 3 ai, ona o’o mai lea i le 2015, siamupini loa i le liki o fafine, o’o mai loa i le tausaga ua te’a 2016 na toe su’e siamupini ma faiaina ai, ma na tulaga lua ai i le tausaga ua te’a.

O lona uiga la, o lea lava e i luga le ‘au malosi a ’Teine o le Asaga’ mai Aunuu, e fai o le talavou o nei teineiti, a’o le lelei lava o latou ta’a’alo.

E ui lava ina ua o ‘ese isi teine ta lelei o lea ‘au, e fai mai ‘au a latou nu’u, a’o lea e tumau pea le lelei ma le talenia o lenei ‘au.

O le ta’aloga i le va o le ‘I’a Vai’ mai Malaeloa ma le ‘Seaula’ mai Aoa, o iloa ai se tamaita’i e suafa ia Lei e ta’alo mo le Seaula na ia taina ‘ai e 36, o ‘ai silia na o lenei tausaga.

O le ‘au lenei a le ‘Seaula’ e moni a ua fai si umi a’o lea ua fa’atoa toe o mai. A’o lea ‘au o lo’o va’aia teine tuai, sa ta’a’alo mai i isi ‘au, o lona uiga la, e to’a laiti lava nai teine fou lea o lo’o i ai, ao le tele lea e to’atele lava i teine tuai.

O le I’a Vai, o se tasi o ‘au ua leva lava i le kirikiti, e lavea lava i latou i ‘au maualuluga e fa, e saili ai le siamupini. O lenei ‘au, o lo’o i ai se fa’ate’a pito i sili a ona masau lana te’a mo le sefulu nei o tausaga.

Na amata te’a lava lenei teine ma lelei lana te’a i le 20 o ona tausaga, a’o lea e masau lava lona tauau. O ia lea o Tauia, lea fo’i na 8 ona ‘olo na maua i le latou ta’aloga ma le Sea’ula.

O le lelei o le taumafaiga a lenei ‘au, ona o le to’aga e va’ai toto’a  a’oga a le ‘au ta’a’alo, i taimi e faia ai, e matua ta lava le tagata ia, e le fa’a’ole’olea se taimi e faia ai latou aoga.

O lo’o faia lava e le tina matua, ma o le teine tuai fo’i o le malae sima, o Pula Alaipalelei Custodio. Ia ae o lo’o fesoasoani ai le fetalaiga ia Taufasi Ailao.

A e fesili i so’o teine o le ‘au, o le leaga lava o le sapoina o le polo, pe leaga fo’i o le togi, e te sau loa i tua matua e fiu e fa’asoa au mea lelei, “Ia e te ‘aia mea lelei uma o lenei lalolagi i faiga a le lo’omatua.”

TEINE O LE ASAGA (1-0) v MOSO’OIPALA 2 (0-1).

Na tata muamua lea Teine o le Asaga ae talitua’a le Moso’oipala 2, o le manaia ia o le faiga a fa’ate’a i le ulua’i taimi lava o le ta’aloga, ma le talitua’a, e 5 pe, ae fa’ato’a 3 ‘ai a le Asaga.

Na fa’apea ta ita o se mea mo’i lea o le fai mai e le ‘au numera lua a le Moso’oipala, ae te’i ane, ua savavali mai loa  le isi vaega o “Teine o le Asaga,” matua fa’asolo le solo’ai ae taumafai mai te’a a le Mosoo’ipala 2. Na o le felelei solo lava o polo i le sami, fa’apea fo’i ma uta i le fale lea e tutu mai i uta i Fagaalu.

E atoa ane pe e 10, ua atoa fo’i le 51 o ‘ai, ma fa’asolosolo mai lava lea se’i o’o lelei i le 80 ‘ai, ae fa’ato’a 15 pe.

Le mafaufau na i ai uma i tagata na maimoa, a’i o se mea moni lea na fai mai e le Moso’oipala 2, peita’i ua liliu le taimi i le ta’aloga, e pei o upu o lena pese.

O le tulafono a le liki o tamaita’i, e 80 loa ‘ai, ona tuli loa lea e le isi ‘au ‘ai na pe maua. E le pei o ta’aloga a tamaloloa e fai i le ta’i 100 ‘ai ona tuli loa lea.

Na o ifo nei le Moso’oipala mo le tulina o ‘ai a ‘Teine o le Asaga’ e 80, ae 15 pe.

I se va’aiga i lea ta’aloga, o le fa’afiafia lava le mea sili. Ua toe o’o mai i le malae, ona o le lotonuu lava, ae ua le toe tutusa lava aso.

Na tuli loa e Teine o le Mosoo’ipala (2) ‘ai a Teine o le Asaga, fa’atoa va’ai lava lea i se mea fa’apea, na sili mai lava pe mai le amataga ona tata o le Mosoo’ipala 2, fa’atoa maua lava e ‘ai latou pe, ina ua 16 pe, ae 18 latou ‘ai.

Lena e uma mai a latou pe e 19, ae maua foi a latou ‘ai e na’o le 23. Fa’amalosi pea e u’una’i teine laiti i le malae e koleni ai a latou te’a, ma mulumu, ma le taina o le polo, aua e sau taimi, ona fa’afiafia ai lea o le tatou afioaga i aso o i luma.

O fa’ate’a a le Moso’oipala 2: Laloifi Saelua, Debbie Matu’u, Christina Paopao ma le teine o Deanne Yandall. O ‘ai, e tutusa uma le ‘auta a le Moso’oipala 2.

O fa’ate’a a Teine o le Asaga: Akape (6), Alleluia (3) ma le tele o le sapo na mauaina lea e le talitua-a.

ASO LUA: ‘SEAULA’  AOA (0-1) vs I’A VAI, MALAELOA (1-0).

O se ta’aloga manaia tele, ia na muamua tata Sea’ula ma na va’aia le alualu i luma o le talitua’a a Teine o le I’a Vai, ma e i ai polo sapo e 6, o polo mautinoa i le sapo a le I’a Vai, ae te’i ua pa’u i lalo i le fa’atamala a le tagata lea na tu’u atu iai.

A’o le tuloto, e tau su’e se mea e pasi mai se polo pe’a o’o nei ina poloka ese teine o le I’a Vai polo, manaia tele le tou vaega lena e ta’a’alo i le tuloto.

Na tata muamua le Sea’ula, e o fa’atasi lava pe ma ‘ai, o le isi taimi lena, na oo ai ‘ai i le 10 ae ua o’o pe i le 6, na faifai ai lava le mea lea a le I’a Vai, i le lelei o le latou fa’ate’a.

Ina ua atoa pe e 12, ae tata loa le tamaita’i o Lei ma Simealeaga, o i’ina na oso ai ‘ai a le Sea’ula, ina ua fiu fa’ate’a i le lelei mai o le ta. Na maua e le tamaita’i o Lei ‘ai e 36, ma o ‘ai silia fo’i lea ua i ai i lenei tausaga 2017.

Ana i ai ma se isi teine e fa’apena lona ta lelei e pei o Lei, semanu le I’a Vai e tulaga fa’aletonu i le ta’aloga lenei.

E ‘ese lava le sipili a tamaita’i nai lo o tama, o le ‘happy’ lava latou i taimi uma. Ao le vaega leaga lea o lo’o i ai, o le ‘au tusi ‘ai, i le faiga o tala o nai teine ia e o mai e tata. Fai mai, “E pei e o mai e tata ae le fia tata!”

O nai teine na e tigaina pe’a vaai atu le tusi ‘ai o fa’aletonu mai i luga o le malae, e sili ai le aua ne’i ta’alo. Ae faigofie lava ona iloa e le Komiti le mafuaga, ua le pikia ai fo’i o ia. “Ana lelei, semanu e ta’alo ae malolo si teine ua ta’alo nei.”

O le ta’aloga fo’i lenei na fa’atuina ai e Tauia, le fa’ate’a a le I’a Vai, ia ‘olo silia i lena ta’aloga, e 8 lelei ana ‘olo na maua. O le ta’alo lelei lava lea a lenei teine o Tauia na ta’alo mai ai i lana fa’ate’a, i le sefulu (10) tausaga talu ai.

Ao le taimi la na tuli ai e le I’a Vai ‘ai e 78 ae 19 pe a le Seaula, e le tele a ise pito, na’o le to’alua tagata o le latou ‘au na sapoia ae le’i maua ni ‘ai, ae o le ‘au atoa, e ta’i lua i le ta’i tolu ‘ai na maua.

Sa maua ‘ai ia e 78 ae fa’atoa 16 pe a le I’a Vai, e faigata ona ou faia se tala i lenei ta’aloga, leaga e lelei uma ‘au nei na ta’a’alo.

Sa ma talatalanoa ma le fetalaiga ia Ta’ase o ia o lo’o nafa ma le ‘au kirikiti i Aoa, “La’u peti ia oe, e i ai ‘au lelei e fa’atamala loa i le tou ‘au, e faiaina mataga i le sau a le Sea’ula lea e va’ai atu i ai.”

Ae fai mai le tofa Ta’ase, “Ioe, pe a fa’alogo teine ma fai le mea e tatau ona fai, ae lelei lava, toe a o mea laiti e tatau ona fa’alelei tail nei.”

O le tamaita’i o le Seaula na ’ai silia: Lei Ta’ase 36, Simealeaga 12, Fia Pulu 12. O fa’ate’a; Lei ma Vi’i (3), Christina ma Fa’asili e ta’itasi.

O le ‘ai silia a le I’a Vai o Lela 12, Fitilagi 11, Fa’afao 10, Rosie 10, o fa’ate’a: Tauia (8), Lela (2), Rosie Fia (2).

LIKI KIRIKITI A TAMA:

‘I’A VAI’ MALAELOA, (4-0) v TAMA O LE AGA A PE’APE’A, AMAUA/AUTO (0-2)

O le ta’aloga a tama ua suia nei i Pago Pago i Gagamoe, sa ta’a’alo ai i le aso Gafua le ‘Tama o le Aga a Pe’ape’a’ ma le I’a Vai.  O le I’a Vai lea e le’i i ai lava se faiaina, ma ua fa o latou ta’aloga (4-0) ao le “Tama o le Aga Pe’ape’a” lea faato’a fa’alua ai lea ona ta’a’alo i lenei Ta’amilosaga.

O se ripoti na maua mai i le Komiti a Liki a Tama, sa fa’apea mai, na muamua ona tata le Aga o Pe’ape’a ma maua o latou ‘ai e 57 ae atoa loa latou pe e 19.

Ona tulia lea e le I’a Vai, ma e 10 pe ae maua loa ‘ai, ona mae’a ai lea o ta’aloga i le aso lea. Ua tulai mai nei ai o ‘au pitoaluga i le Liki a Tama:  “I’a Vai” (4-0) ma le Fetulele (3-0) ma le Seaula (2-0).

O le ta’aloga na tu’u e fai i le aso Lua, lea na tu’u e ta’alo ai Tuna’ula ma le ‘au a le PYCCT a Pavai’ai, e le’i o’o mai le ‘au a le Tuna’ula, ona e fai mai latou, “Matou te le iloaina e matou e ta’a’alo i le aso Lua.”

 O le mea leaga ai mea fa’apenei, e le iloa ai e le ‘au kirikiti po’o ai na ave i ai, po’o le pulenu’u po’o ai? Ae tali mai le Komiti, “E le o le fa’asologa fou, ae o le fa’asologa tuai lava lea e fa’auma ai ta’aloga i le tou ‘au ma le ‘au a Pavaia’i! Lea fa’atoa avatu nei a le fa’asologa fou ae ua leva lava ona i ai.”

O ituaiga mea nei e fa’afaigata ai manatu o nisi i le taimi mulimuli, ae o le fa’alogo lava i le Komiti ma fesili sa’o fo’i i le Komiti e maua ai le tonu ma le fa’atautaiga sa’o o le tatou Liki Kirikiti mo lenei tausaga. O lo’o lava le taimi e toe mapuna mai ai le malosi o ‘au ua masani i le fa’agatama.

O lo’o loma nisi o ta’aloga e matua matagofie i le maimoa, ae maise pe afai o le a tau fai tutusa le lelei o talitua’a ma le ta a au e lua e fetaui i le malae. O le ituaiga ta’aloga lena o lo’o olioli mai ai le ta’aloga faitaulia i le va o le Mosiula mai Masefau ma le Fetulele mai Tula ia Mati 18, 2017 - o le aso To’ona’i.

E i ai fo’i le isi ta’aloga manaia lea i le aso Faraile nei, o le a ta’alo ai Seaula ma le Mea’ese, e le iloa e tatou, pe te’i ua fiti le laki i’ina a le Mea’ese, ia ona faigata ai lava lea ona mautinoa se ‘au e siamupini o lenei liki, po’o le ta’amilosaga.

O Fa’asologa nei o tulaga o ‘au, I’a Vai (4-0), Fetulele (3-0), Sea’ula (2-0), Pisisami (1-1), Mosi’ula (2-1), Sinapati ((1-2), Mea’ese ((1-2), Tuna’ula (1-1), Eagle (0-2), Lega (0-2), PYCCT (0-2), Lupelele ((0-1).