Ads by Google Ads by Google

Tala o Ta’aloga Kirikiti

O le ‘au malosi lena a le Mosiula, ina ua mae’a le latou ta’aloga ma le Mea’ese i le Aso Toanai, pau lava le mea, o le maua e le fafine muamua le mea lena ua e nofo ai. [ata:THA.]O tama na e ta’a’alo i le ‘au o le Fetulele, ina ua uma le latou ta’aloga ma le Lupelele, ia lea la ua malo ai Fetulele i le Lupelele, ma maua ai fo’i e le Fetulele le fa’alagiga ua pule nei i le lagi ma le vanimonimo.  [ata: THA.]
tusia: THA

Manaia i le vaai atu i le ‘au a Pavaia’i, ina ua sui mai le latou igoa ma ua sui mai i le ‘au tuai, i tama fou mo lenei Afioaga, ua suia mai le ‘Tama o le Samoa Moni’ i le ‘Au a Tupulaga o tama e i ai i so’o se ’autalavou Kerisiano i totonu i Pavaa’i.

Ua fa’aigoaina nei lea ‘au o le ‘Pavaia’i Youth of Churches’ Cricket Team’ po’o le “PYCCT.”

Na fa’apea fo’i le isi ‘au ia e i ai le Tuna’ula, Aga o le Pe’ape’a, na amata ona fa’atu mai i tausaga e lua pe ua tolu talu ai, i le taumafaiga lava lea, ma ua ua o’o nei i le taimi e amata ona selesele mai i faiga mea o le Kirikiti i lenei tausaga.

Ae momoli atu le fa’amalo a le Komiti i le taumafaiga a nai Fa’afeagaiga tau i le Lagi i nei afioaga, mo le fa’amaopoopoina o tupulaga aua aso a sau.

ASO LULU. 

‘MEA’ESE ALOFAU, (I-2) vs PYCCT, PAVAI’AI, (0-1)

E le tele tala e faia i lea ta’aloga, aua o le ‘au a le Mea’ese latou ia ua iloa uma e tagata e fiafia e matamata i kirikiti, o le mea lea o lo’o taoto i le ‘Mea’ese’ latou ia, ua masani i le siamupini i isi tausaga ua tuana’i atu. siampini fo’i e tausaga e tele ua mavae atu nei

Ae o le ‘au lea a PCYCT, e moni lava e to’atele na ta’a’alo muamua, a’o le to’atele lava lea fa’atoa o’o lea i luga o le malae sima, i lenei liki.

E i ai la le Faifeau Metotisi, e fesuia’i a latou ‘aufaigaluega pe’a mavae le fitu tausaga, fa’apena le Ekalesia Katoliko, a’o le EFKAS e i ai fo’i le taimi e fesuia’i ai le Fa’afeagaiga, fa’apea fo’i lea ona suia mai le fa’amaopoopoina o latou ‘au Kirikiti.

Ia na a’e se finagalo ua a’e o Faifeau, o le’a latou nonofo nei e faia se mea fou, o le fai nei e Tupulaga ‘Autalavou se ‘au kirikiti, e afua mai ai i totonu o Ekalesia a le afio’aga.

E le mafai ona tafao solo lea tamaititi e le alu i se Lotu, te’i lava ua auai i Fa’alapotopotoga Kerisiano ona ta’alo i le ‘au Kirikiti a lenei afioaga, ia auai o se talavou i le ‘Autalavou, ona e ta’alo lea i lenei ‘au kirikiti.

Ae fa’amalo le Finagalo ua a’e i lenei Afioaga ae maise o Fa’afeagaiga tau i le Lagi, mo le fa’amaopoopoina o lenei fa’amoemoe i le Tupulaga lalovaoa o le Afioaga.

E tata muamua le ‘au a le Mea’ese, maua ‘ai e 100 ae na’o o le 10 a latou pe, ona tuli loa lea e le PYCCT.

Ona fa’ato’a tata lea o le ‘au a le PYCCT ma latou maua ‘ai e 39 ae 19 pe, ia lea na manumalo ai le Mea’ese i le latou ta’aloga na faia nei.

O tama ia na latou maua ‘ai silia mo le Mea’ese: Faleatua 21, Mulu 23, Iosua 14 ma Nu’uuli e 9. O le ‘aufa’ate’a o Viliamu, Tafa, Nu’uuli na Dan ia ma isi sui te’a

O tama na tele o latou ‘ai ma maua foi le ‘aisilia mo le PCYCT: Lia 11, Sheck 9, ma le Susuga le Faifeau o Vaimoli e 3.

ASO TOFI:

I’A VAI, MALAELOA (3-0) vs ‘TUNA’ULA’, FAGAITUA (1-1).

O le ta’aloga lea e iloa ai po’o fea le ‘TUNA’ e manaia i le taumafa, fai mai poo le TUNA lea e maua i Fagaitua, po’o le TUNA ua e maua i le vai i Malaeloa.

E fai mai nisi ua masani i le i’a lea e i Fagaitua, e silisili atu le taumafa i lenei tuna ona o le lelei o vaitafe ia e tata’a ai, ae fai mai fo’i tagata Malaeloa, e sili atu le latou i’a ona lelei.

O nei mau e lua na saili po’o a manumalo, o le mau fa’a-Malaeloa e sili atu le manaia o le latou i’a ai lo’o se isi i’a. Peita’i, o lea se mumufalo na faia e fa’atusa i ai le ta’aloga matagofie a Malaeloa I’a Vai ma le Tunaula mai Fagaitua.

Na muamua tata le tama o le ‘I’a Vai’ mai i Malaeloa, o le mea e ofo ai le to’atele na maimoaina lea ta’aloga, e 10 pe a le ‘I’a Vai’ mai i Malaeloa, ae fa’ato’a 38 a latou ‘ai.

Ona o le fa’atamala lava i le afa mulimuli o le Tunaula, na alai ona toe oso mai ai ta a le ‘auvaega lea ma o’o ‘ai i luga i le 100 ‘ai ae toe tasi lava le pe lea na su’e atu e le ‘aufa’ate’a ma le talitua’a.

Ia e foliga mai, e i’u a ina sa’o le mau a Malaeloa i le latou i’a (tuna).

E ui lava ina manaia fa’ate’a ma le talitua-a a le Tunaula, ae ina ua mase’ese’e le tuna e o mai i le vaitafe lea i Malaeloa, ua amata ona se’e atu i se tulaga faigata, e faigata ona toe pu’e mai.

Ae sa le fa’avaivai ai le Tunaula, i le latou taumafai atu e ta’u mai e sili le latou tuna, ia ae ua le tutu’a’ai le I’a Vai i le taofiofiina ma le puipuiga o latou ‘ai e 100 ae 18 pe.

O le tama Faga e suafa ia Lua, e ta’alo mai i le ‘au lea o le I’a Vai, na ofo ai le to’atele i le tilotilo i le isi pito, ae alu lana ta i le isi itu, na ia maua ‘ai e 6, a’o le taulealea e pe le isi a’ao.

Na tulia loa e le Tuna’ula ma na maua ‘ai e 75 ae uma loa o latou pe e 19, ma ua fa’ailoa ai la i’i, e sili lava le TUNA a Malaeloa nai le Tuna lea e maua mai i Fagaitua.

Na maua e le tama lea o Garmaine ‘ai e 12, soso’o ai ma ‘ai a Rodney 10, Utusi’a e 9, le tu’ufa’atasiga e 75 ‘ai ae ma’ea loa pe e 19, lea la na ma’ea ai le ta’aloga.

O le mataina ia o fa’ate’a a le Tuna’ula, o le tama o Va’atofu, Viliamu, Tafa, Nu’uuli ma Dan, e o’o lava ina mafai e nei tama te’a ona te’a uma i se ta’aloga atoa, e le pei o tama matutua o loo te’a i le kirikiti.

Manaia a latou mulumu, le tama o Kosi ma Salesa. O tama o le I’a Vai ia Uale ma Logi, e le’i suia lava, a’o tama na ‘ai silia o Uale 26, Ave 17, Rev. Faigata 10.

ASO FARAILE.

PYCCT, PAVAIA’I (0-2) vs ‘SINAPATI’ TAFUNA, (1-2)

E le afaina o le mea sili ua toe fo’i mai le ‘au a le Autalavou o Pavaia’i, lea na fetaui ma tama matutua i le kirikiti o Sinapati, e ui lava ina vaai atu i le ‘aufa’ate’a, ae a o’o ina feitaia’i ma nai tamaiti laiti, ona pau lea o le mea e o’o i ai, ‘o le sasa i le fusi pa’u, ia maini le pa’u’.

O sa’u fa’amataga e fai i le latou ta’aloga, na o se mea e fa’amanatu atu, vaai fa’alelei le ‘au a le PYCCT i tausaga o lumana’i nei, o lenei e ta’a’alo ai Faifeau, ua uma fo’i ona fa’amanuia i le ‘au, ia pogisa a latou tino ae malamala a latou mata, ma manuia i lenei taleni.

E le o le taimi nei, a’o tausaga o lumanai.E manatua fo’i o ‘au nei ua tele matati’a na faia mai e le Tama Samoa Moni ma le Sinapati. Ae maise lava le Sinapati ua tele matati’a na latou fa’atutuina, e pito i tele o latou siamupini soso’o mo le 5 tausaga, mai le 1991-1996.

Ona toe siamupini fo’i lea i le isi lua tausaga (1997-1999), ma le tausaga e (2011).

A’o le ‘au a Tama Samoa Moni, e pei ona fa’amatalaina e le Fetailaiga a Tulau’ulu, “I le tausaga e amata mai i le 1969 e o’o mai i le tausaga e 1974, e lima foi tausaga, o siamupini pea lava i Tutuila i le taimi o le liki o le Sisiga Fu’a.”

Na muamua tata le ‘au a le ‘autalavou PYCCT mai Pavaia’i, lea na maua ai ‘ai e 31 ae 19 pe, ia na’o o le to’afa pe, ia ae maua uma ‘ai a lea ‘autalavou e le Sinapati.

O se taimi muamua fo’i lenei o le fa’ate’a a Sinapati, o JR Sale ma Tofiga, e le suia ai a laua te’a, na iloa lelei e Asiata Moefa’atasi Sale, e leai se mea e  toe suia ai fa’ate’a a ana tama ia.

Na fai mai Asiata, “E le ‘ai fasimoli fo’i te’a a la’u fanau nei, o JR Sale ma Tofiga.”

ASO TOANA’I

FETULELE (3-0) vs LUPELELE (0-1).

O le tasi fo’i lenei o ta’aloga na su’e ai po’o ai e mamao lona lele i lea ta’aloga, ua iloa nei, e mamao le mea e lele ai le Fetu nai lo le Lupe, ae felelei uma e pei o le la natura.

Na muamua tata le ‘au a le Fetulele ae talitua’a le Lupelele. O se ta’aloga e le iloa po’o taeao po le a e mafua ai ona mase’ese’e le mutia, ae sa alolofa lava le ‘au matamata isi ‘au a le Lupelele.

A’e ane ua pei o se masani lava a le Lupelele ia, ina ua fa’asolosolo ane ina ta le 9:00 i le taeao, ae pei lava o se mea e fai e le isi itu talitua’a, e feita pe’a a leai se latou polo e le pa’u.

E maua lelei le 23 o polo pa’u a le talitua’a a le Lupelele, po’o le isi mea, ai ona ua fia ‘aai nai tama, ae usu po mai i le malae i Fagaalu ona o latou e tatala malae ma Tula…’ o le mea fa’apea e tupu, pe’a le faia se malu o le taeao.’

Na maua lelei le 100 ‘ai a le Fetulele ae fa’atoa 15 o latou pe, ona o ifo lea o le Lupelele e tuli, ma o le mea na tupu, na fai ai faiga a le fa’ate’a lea o Sam i le 9 lelei o ana ‘olo na maua i lea ta’aloga.

E 72 ‘ai ae atoa maua loa pe 19 a le Lupelele, ma ua iloa ai le lele a le Fetu nai lo’o le Lupe, e gata lava i luga o moso’oi ma le malili si Lupe, ae o le Fetulele i lenei tausaga, e ta’ata’a mai i le vateatea.

O le ‘au ‘ai silia a le Fetulele: Pita 14, Fala 13 ma Kasa 12, o le latou ‘au fa’ate’a o Sam (9) ana pe, e Tanielu (2), Kasa ma Paki.

O le manaia ia o le fa’ate’a a le Lupelele, e ta’ita’i mai e si tama o Enoka, Lapana, Setu, Sipa ma Kelly, a’o Lapana 24 ‘ai, ma o ia lea na maua le ‘ai silia a le Lupelele.

MEA’ESE (1-2) v MOSIULA (2-1).

Oka se ta’aloga ina a manaia, o se ta’aloga a ‘au ua masani i le kirikiti, leitioa a fesili le toeaina tauaso i lona atali’i, ‘Sole o ai la e ta’a’alo nei i Fagaalu?’

Fai atu le atali’i, “O Fagaitua ma Masefau.”

“Ae o a fea e ta’a’alo ai le Mea’ese ma Mosiula?.”

Fai atu le atali’i, “O le Mosiula le igoa o le ‘au a Masefau, a’o le Mea’ese le igoa o le ‘au a Alofau…fai mai fo’i na e ta’alo kirikiti.’

Fai mai le toeaina, “Se ua sui igoa o ‘au, na ou ta’alo o fa’aigoa ai. Ae sau loa e alu, savali loa manu lea fa’atoa ta le valu, e fetaui lou o’o ma le ta o le tolu.”

Na tata muamua le Mea’ese maua lelei o latou ‘ai e 100 ae fa’atoa 18 ia pe, na tuli loa lea e Mosiula a latou ‘ai, na tupu fo’i i lea tausaga ua te’a, i le liki a le Moso’oi, le vevela o le ta’aloga a nei ‘au e lua.

A’o lea fo’i ua toe fai, na matua’i faigata lava i le Mosiula, ona ta

 te’a fa’atelegese a le Mea’ese. O le manaia o le togi atu o te’a fa’asilou a le ‘pe’a’ lea o Viliamu, a e vaai i ai, e pei oni tamaiti e lei iloa ta le polo kirikiti.

O le mea lea ua ou iloaina i le ‘au a le Mosiula, e valelea tele e ta te’a fa’atelegese.

Se taualu fo’i se taimi o tau fa’afetui mai le taaga o se polo, ae i ai le taimi ua fa’aaoga mai ai te’a masau e le Mea’ese, ia talie foi le Mosiula e te’a na ma e fiafia tele i ai.

A vaai atu le Mea’ese ua taulavea i latou i tele o ova lua ia, ona toe aumai fo’i lea o silou te’a ia.

Ia o le malie ia o taimi o luluti le ta’aloga, na finau ai le ‘au a Masefau e lua ‘ai ia na tuli i le taimi na pa’u ai le polo, a’o le mea na tupu, ua taufai tilotilo uma fa’amasino i le mea lea e i ai le polo, ae galo ona tilotilo le tasi o i laua i le tuliga o le ‘ai.

Na finau loa fa’amasino ma le ‘au a le Mosiula, ia a’o le taimi lena e sauni ta ai le kapeteni a le Mosiula, na savali mai loa le kapeteni fono mamao mai loa i le Komiti, “E sili ona ave ‘ese le fa’amasino le la ona o le le mafaufau mai i le latou tapuaiga”.

Ae ua iloa lelei lava o le taimi lena ua le iloa se ‘au e malo, lena ua o’o mai ai i mafaufau o tama ta’a’alo le fa’alogona lena, o le popolevale, talu le finau o le ta’aloga.

Ia sa toe solosolo malie lava lea, ma na mae’a le ta’aloga o mai loa ‘au e lua, ia fautua loa i ai le Komiti Fa’afoe i le kapeteni a le Mosiula. Na toe teuteuina mea na pisa ai ‘au e lua.

Malo le Mosiula ina ua maua le 100 a le Mea’ese, ae o loo tata lava le latou pe lona 19, ia ta loa latou ‘ai fa’asili mai ai ma ‘ai e 112 ae uma le latou pe.

Ia na toe o mai le ‘au a le Mea’ese e toe tuli ia ‘ai ia e 112 a le Mosiula, ae toe tasi lava o le masaga lea a le Mea’ese, e tasi lava le te’a, ma ta mai loa e le tama ta, ma se’e ma sapo mai ai i tua ma malo ai le Mosiula i le Mea’ese.

O se ta’aloga foi lea ua fa’aali uma ia fa’ate’a laiti a le Mosiula, le tama o Tuvalu ma Selu, ao le fanau laiti foi lea na aumai e le Mea’ese, o Tu’u Tanielu po’o JD.

O tama na ‘ai silia o le Mea’ese: Nu’ulelei 25, Iosua 14, Faleatua 13, ma fa’ate’a o Chen, Viliamu, Iosua ma Vito, ma mulumu o Pago, ia Vito ma isi tama na fesoasoani i le mulumuina o polo.

E lua (2) na maua e Vito.

O tama na ‘ai silia a le Mosiula, o Loia (16), Kris (12), Tom (11), Sefo 10, Sofa’i 14, ma a latou fa’ate’a o Tuvalu, Vaitogi, Faresa, Sililo ma Selu.

AETO (0-2) v SEA’ULA (2-0).

O se mea fou ua iloga mai, o le au a le Aeto ua fa’atonutonu atu le taimi e te’a ai e latou fa’ate’a latou polo, ma ua fai si umi ai o le ta’aloga faitaulia i le va o le latou ‘au ma le Sea’ula mai Aoa.

O lo ua matauina fo’i ua i ai le isi suite’a a le Aeto, le susuga Savaliga, ma ua amata mai fo’i si ona tau’au.

Ona ua umi lea ta’aloga, sa va’aia le tu’uva’a ese atu o tagala mamita, ae tutumau lava isi ona o le fia iloa o se i’uga lelei i lea fetauiga.

Na tata le Seaula, mai i Aoa, e 45 ‘ai ae na o le to’afa tagata ua pe.

Ua laki lava ua oo pe a le Seaula i le sefulu tasi (11) ae na o le to’alima na pe a le Seaula, ae maua ‘ai e 100, le mea lea ua ta’ape ai le to’atele o tagata na fia maimoaina le ta’aloga a le Seaula.

Ia ma manumalo tama o le Seaula. 

O tama na latou maua ‘ai silia mo le Seaula, Apiuta 21, Lautasi 21, Sione 15, Lauasa 14 ma Ariani 10, o le ‘au te’a, o Asovalu ma Logi, o le ‘au a le Eagle, e le maua se fa’amauga.