Ads by Google Ads by Google

Tala i Ta’aloga Kirikiti

O le ‘au malosi mai le alalâfâga o Pago Pago lea sa manumalo i le latou ta’aloga ma le au a le Teine o le Moso’oipala #1 i le Aso To’ana’i ua mavae.  (ata:THA)Au  malosi a Teine o le Seaula i le fa’atinoina o le laulautaimi ina ua maua le pe i le latou ta’aloga ma le ‘au a Leone #2. Manumalo Aoa i le tatou ta’aloga lea.  (ata:THA)Manulele Tausala o le alalafaga o Nu’uuli  (ata:THA)Lupulele o Iliili  (ata:THA)
tusia: THA

TA’ALOGA A TAMA I LE MALAE I GAGAMOE, PAGO PAGO.

ASO LULU.

Ua latalata nei ona tatou fa’amavae atu i nisi o ‘au o le ta’amilosaga, lea ua ta’itolu faia’ina ma le ta’ilua. O le tele o ‘au na fa’anoi mai i le Ofisa o Mataupu Tau Samoa, lea la ua alai ona toe fai se isi aso e fa’ataunuuina ai latou ta’aloga ia sa fa’anoi mai ai.

Ia ua amata lava ona tatafa mai ‘ata o ‘au lelei, ma ‘au feololo ma nai ‘au e le taitai ona lava a latou fa’ate’a. Ae vagana ai fa’ate’a ua masani, e iloa lava e i latou le ituaiga pa’uuga ua tatau ona te’a i lea tagata ma lea tagata.

FETULELE, TULA (3-0)  vs SINAPATI, TAFUNA (1-3)

I le ta’aloga a tama i le aso Lulu, i le malae i Gagamoe, Pago Pago, sa fetaui ai le ‘au malosi a le Fetulele mai Tula ma le ‘au a Sinapati mai Tafuna. Sa muamua tata Sinapati, ma o se ta’aloga e fai o le finau so’o, a’o le fai ia o faiga a kapeteni i nai laufali.

E le tu’u mamaina fo’i e laufali lea na faia le ta’aloga o Tony ma Mo’o.

Na fa’apea le ‘au kapeteni, ‘ai oni laufali ‘tu paelo’.

E uma le tataga a Fetulele ua maua le 101 ae na’o o le 7 pe, ia ua tatou iloa uma le mafua’aga, o le le lava o fa’ate’a, aua o se tama o JR Sale, Tofiga ae fa’ai’u e Kuresa.

Ia na o’o ina alu ifo i ai ma Asiata Galuluefa’atasi Sale, ma le tama lea o Cancer.  Matua masau lava le tau’au, pe ana maua la ma le tomai e fuafua ai le pauuga, ia ua uma upu.

Na o ifo Sinapati mo le tuliina o ‘ai a le Fetulele, lea na fa’aalia ai le malosi o le ‘au a le Fetulele, ina ua 10 pe, a’e fa’ato’a 50 ‘ai a Sinapati.

I le taimi na ta ai Asiata Sale, o le taimi malie lea o le ta’aloga, i tagata ua masani i le kirikiti, ua nofo nei Asiata ma fa’alili le ‘au fa’ate’a a le Fetulele.

Le mea na maua ai, ua ulu le uiga tonu lea na fai e Asiata i fa’ate’a, ua lili ma ua manana’o e pe lava i le ‘olo, ae le manatua e iai fo’i isi mea e pe ai le tagata ta.

Na uma lelei lava ‘au a Sinapati ona tata 19 pe, ae o le’i pe lava Asiata. Peita’i e le’i maua lava ‘ai o le Fetulele, ma ua manumalo ai Fetulele mai Tula i lea ta’aloga.

Le ‘au ta a le Fetulele e sili ‘ai i le sefulu; Lema 16, Eliki 14, Tanielu 14, Pika 12, Birdie 12, Toe 10, Rekili 8. O fa’ate’a o; Sam, Fala, Tanielu.

O le tata e sili atu i le ta’i sefulu ‘ai a Sinapati; Veve 12, Fo’i 10, Eki 10. O fa’ate’a; JR Sale, Tofiga, Kuresa, Asiata Galuluefa’atasi, Cancer.

ASO TOFI.

LUPELELE, ‘ILI’ILI (0-1) v MOSIULA (2-1).

O lea ta’aloga na muamua tata le Mosiula mai Masefau, e 12 pe ae maua a latou ‘ai e 100, ona tuliina lea e le Lupelele.

Fai mai na tata le Lupelele, ia ua maua ‘ai e 100, ae o le ta’aloga lea ua toe 2 pe ona uma lea o le latou ‘au ta, po’o o toe o le masaga ma le tama lea na totoe i luga e le’i pe, ma maua ai ‘ai e 6 ae uma o latou pe e 19, lea ua fa’amauina ai ‘ai o lea ta’aloga e 106, 19 pe.

Ua tu’u ai fa’apea lea ta’aloga, se’i iloa se aso e fa’auma ai lenei ta’aloga. Masefau 100 ‘ai, 12 pe, o le ‘au a le Lupelele 106 ‘ai, 19 pe. O le mea mautinoa, e toe faia i ai se fa’ai’uga i lea ta’aloga.

ASO FARAILE.

SEAULA, AOA (3-0) v MEA’ESE, ALOFAU (1-3).

O le ripoti mai malae o le ta’aloga lea, ua alualu a le Seaula mai Aoa i le vaitaimi nei, lea ua tolu malo ae leai se faiaina (3-0), ae o le ‘au lenei a le Mea’ese o se ‘au o lea e tau atia’e tamaiti laiti i le kirikiti.

I le va’ava’ai atu, e toe itiiti lava a lelei le to’atele lea ua amata ona vaaia i le matamata ua lelei mai le ta’a’alo. Ua latalata ona tatou fa’amavae lea i le Mea’ese i lenei tausaga, ae e i ai le fa’amoemoe a le o le tausaga lea, po’o le tausaga i tua atu, o le a tele fo’i suiga o le toe sau ai o le Mea’ese i le tatou fa’aagatama.

O le Seaula, lea e lelei lava le latou sau, ae o le pona lava, e le’i fa’afetauia lava e se ‘au e malosi, pei o Fetulele, I’a Vai ma le Mosiula.

O ‘au nei o lo’o tumau pea i le leai ni faiaina, e tolu lava, Fetulele, I’a Vai ma le Seaula, ae la e fa’apepe mai lava le sau a le Mosiula i le tasi lea na maua i le I’a Vai, i le ta’aloga muamua.

O lo’o taofiofi pea le latou i’umaea i le tulaga lea olo’o i ai nei. Ua lata fo’i ina tatou fa’amavae ma isi ‘au ia ua atoa le tolu o faiaina i lenei tausaga.

O le fa’ate’a lava le mea muamua e ao ina a’o i le tamaiti talavou, e iloa lava le tamaitiiti e tago e fa’ate’a, ae iloa fo’i tamaiti e le lelei le fa’ate’a, ia toaga e a’o le ta ma le talitua’a.

O le faiga lava lena o se ‘au e fou tama, e taumafai lava, aua e eseese mea e lelei ai ma agava’a ai tama ta’a’alo, afai o oe lea ua a’o lau te’a, ia toaga e fai, te’a i taimi e fai ai le saka, te’a i le taimi e te alu ai e ta mai se ’aufa’i. E iloa lava le mimita o le tou afioaga i ni aso a sau, pe a e lelei i lau pitola’au, ae manatua fo’i  “E le’i fausia Roma i se aso e tasi.”

TA’ALOGA A TAMAITA’I, MALAE VAOVAI FAGA’ALU - ASO LULU.

SEETAGA, TEINE O LE MOLI (1-0) vs FAGASA, TEINE O LE I’A (0-1)

O le ta’aloga lea na maua mai le ripoti a le Komiti o lo’o feagai ma le liki a tamaita’i, na manumalo teine o le ‘au a Se’etaga/Nua poo “Teine o le Moli” i “Teine o le I’a,” mai Fagasa.

Fai mai, o le tele o teine fou lea e i ai i le ‘au kirikiti lea, ae a fai e moni tala ave mai Fagasa, “E le o le taimi nei, a’o le lumana’i le mea lea e vaai i ai!”

E talie nei, ae ‘ofo i lea tausaga…o le afioaga lava ua mana’o moni lava i lenei ta’aloga ma fa’amautu i ai a latou mafaufau i le taimi o i luma, o le taimi lenei e fai ai se fuafuaaga.

Mitamita lava i tala a le komiti e uiga i le ’au a Fagasa, fai mai le komiti, “O le tele o le ’au atoa fa’atoa va’ai lea ua o atu e kirikiti, a lelei la teine Fagasa, o lona uiga, o le to’aga e fai le kirikiti, e mapuna mai fo’i se mea malosi i le tausaga a sau.”

“Pe a uma le liki, o le a vaevae lea o ‘au e ta’i to’asefulu ma fai ta’amilosaga a teine i aso Toana’i uma, ua lava tama o le nu’u e o e alo le Fautasi, ae o teine, toaga nei e fai le kirikiti.

Na manumalo teine o le Moli i le latou ta’aloga ma Fasaga.” O se fuafuaga lea ua talanoa mai ai le sui o lea ‘au malosi.

ALAO (0-1) v FAGAALU (1-0).

O le ta’aloga a Alao ma Fagaalu, fai mai na tata muamua Alao, maua a latou ‘ai e 63, o ifo loa Fagaalu e tuli. E tata le ‘au a Fagaalu, ae vaai atu o le i si fa’amasino, ua sau sa’o lava le isi sui Faga’alu i lalo ae alu atu lona sui,.va’aia e pei ua tau fa’aletonu mai.

Ua fa’ailoa fo’i i lea ‘au le tulafono o le ta’aloga, e ao ina fa’anoi pe afai ua fa’alogoina se fa’aletonu. Ua fa’ailoa mai ua lafo le malo ia Faga’alu, ona ua solitulafono tama’ita’i ta’a’alo o le isi ‘au.

O  nisi ta’aloga ma latou fa’aiuga o le a soso’o atu i le tala Kirikiti o olumana’i i le aso Tofi a sau nei.