Tala i Ta’aloga Kirikiti

tusia: THA

O lea o le a fa’aiuiu lava le liki kirikiti o le 2017, a’o lenei e fai lava le tautua a le kamupani o le Bluesky Communications i le atunu’u, mai  le amataga o lenei ta’amilosaga e o’o lava i le vaiaso mulimuli, ae o loo fa’atino pea le tautua matavela i le atunuu.

O lea e momoli atu ai le fa’afetai fa’alelava ma le fa’amalo fa’ale’au’au i la outou kamupani. Ia manuia lava faiva, ma ia fa’amanuia fo’i le Atua o manuia i le tou taumafaiga ma le auaunaga i le atunu’u.

O lea ua uma nei ona su’e siamupini le Seaula ma le I’a Vai i le aso Toana’i i le 8:00 i le taeao, na o uma tagata mai nei afioaga e tapua’i faiva i malae mo a latou ‘au na ta’a’alo i lena aso, ae le gata i afioaga ia, peita’i na fa’apea fo’i le ‘au matamata.

E uma ane le tataga a le I’a Vai, ua maua ai e 88, ma o le tele o teine ta lelei a le I’a Vai, e le’i lelei mai a latou ta i le taimi lea.

Se’i vagana ai le teine ta lele lea o Mona, Tina, Taiua ma Joella, ma Fia na lelei mai latou tau’au i lea ta’aloga.

Ae pei lava e i ai se mea na taofiofia mai ai le taumafaiga a teine o le I’a Vai, i le taimi lea na tuli ai le ‘ai, lea na tamoe atu ai si teine o Fia, alu atu ma alu sa’o i lalo i le mutia.

I le talitua’a a le Seaula, fa’atoa ou vaai a lea i ai i le manaia mai i le su’ega siamupini, e fai o le manaia o a latou sapo, a’o le lelei fo’i o a latou fa’ate’a.

E le masau tele e pei o fa’ate’a a le I’a Vai, ae sipasipa lava ae te’i i le sa’o atu sa’o ma pepe ai le ‘au a le I’a Vai, ae a tu’u ane fo’i i mulumu a Fatima, ia e tolu lelei i latou na pe ai.

Na fa’amatala ia te a’u le tulafale mai Aoa, susuga Olomua, “E kasi lava le leo e fa’alogo ai keige o le a’u, o Fakima, ae lagolago sua aku i ai si fafige o Lei, ma isi auvaega i le faiga o le lakou a’u.”

I le manaia le ‘au lea a le Seaula, i le tele o ta’aloga, ona o lo’o iai teine e matutua ia e fa’alogo ai le ‘au, e pei o Fatima Sua, Lei Ta’ase, ia ma Sela Isaleli, ma isi nai teine e fesoasoanai i ai i le taumafaiga o le latou ‘au.

E iloga lava le teine e laititi ae fa’alogo, o ia foi lena e sasa’a uma atu mea o le kirikiti ma pu’emaua mai, pe a naunau i ai e fa’atino.

I le taimi e tuli ai e le Seaula ‘ai e valu sefulu valu o le I’a Vai, na o le tolu ‘ai na maua i le amataga lava, ae pe loa Fatima i le te’a a Tauia (le fa’ate’a a le I’a Vai).

Alu ifo loa Fatima, ua fa’atonutonu le ta a lana sui-tamua lea o Sitina Talosaga, ia ma leai se sasau a Sitina na misi, e sefulu lava ta o le aofaiga foi lena o ova lua. Lea na maua e Sitina ‘ai e 31.

Ia a’o le tutu mai o le tamaita’i o Simealeaga Tofi, i le fa’atalitali mai te’a o le isi itu malae, i le taimi atoa lena, na maua ai e le tamaita’i o Simealeaga ‘ai e 22.

O le tataga a Sitina ma Simealeaga, na maua ai ‘ai e 53, ia na savali atu loa ma teine sese na o le o atu lava ta’u le feau toe o mai i lalo.

Na’o Sela lava na maua ona ‘ai e tolu, ia toe alu atu fo’i le isi tamaita’i, ta’u le feau toe sau i lalo, ae vagana ai si tamaita’i o Fa’asili Taimi, lea na taina ona ‘ai e 11, ma e uma lava ‘ai a le I’a Vai, o ta lava.

O le teine fa’atino iti fo’i lea na ta mai o Olivia Ta’ase, lea na ta fo’i ona ‘ai e 15, o le mea lea ua ou iloa nei, pei a o le ta’aloga siamupini e fai e nai tama’i teineiti.

O le ‘ese’esega lea o teine laiti ma teine matutua, e fai atu loa o taeao le ta’aloga, o loa le ‘aulaiti momoe loa, ae o le ‘aumatutua, la lava e le’i maua lava e ‘au o le paipa, e ta lava le 1:30am, ae o le la lava e tau fa’amotu le tosoga o le ‘ili, na ona fai atu ai fo’i!

Ia na alu atu loa Ruta Gasio lea na tataina lava ‘ai ma Fa’asili, ma maua ai loa ‘ai o le I’a Vai.

Ua manumalo ai nei le Teine o le Seaula i le Siamupini Kirikiti a Tama’itai 2017.

Fa’amalo atu ai i le Malae o Lalotavai, e fa’amalo atu i le tapuaiga mau i lau Susuga Aumoe’ualogo, Susu mai Te’o o le Anavaotaua; Susu mai Mamea o le matua, Afio mai Luafalemana o le Aloali’i, ua outou pale i lenei tausaga i fa’agatama i malae a tama’ita’i o le atunu’u.“Fa’amalo tele mo le tapua’iga mau.”

Susu mai fo’i Afusia ma Samoa, Alalata’i lo outou to’afa (Lavea, Olomua, Mapuolesega, ma Aioletuna.) Alalata’i le fetalaiga a Maui’a ma le mamalu ia te ‘oe le Atimanutui e fa.

O le Mamalu lava lena o le Afioaga, ae le tuua ai le Mamalu o Susuga o Fa’afeagaiga tau i le Lagi, ona o le Atua ma lona Suafa, o fa’afeagaiga uma o le Afioaga ua malo i le tou tapuaiga.

Ua outou si’i le tapuaiga a le Afioaga i luga, ua outou fa’aeaea le alalafaga ma lana tapuaiga, lea ua sasa fala o poula e pei o le upu e fai ia Salamasina.

Ua musamusa fiafia Sagalala aua ua ‘au’autetele le tapuaiga, lea la ua atu e ai le faga i Lalau, ae fa’amalo le faga i Foa, ona o le tetele o le agalelei o le Atua!

Le Afioaga i Malaeloa, le Malae o Aniutea, le mea o Afifio ai le Malota ma Ulutu, o le Malu o le Fale. Alalata’i ai Tama Matua, alaalata’i ai le Toafa o Alataua. Ma le tou Aiga Fa’alagilagi, o Aitulagi.

Ia i le isi itu o le Afioaga, Le mea o lo’o fa’aafio ai le Falefia o Ali’i, o Amituana’i, Susu ai le Susuga i le Launatausala Toilolo; Susu ai le Matua Taulapapa; Susu ai le Suafa Tuileata.

Sosopo ai Tauto’oto’o o Taleni’aueafe ma Nanai, ma le paia lena o le Fale-Ituau o Tofiga.

Ua fa’amalo le tapuaiga mau ia te outou o Fa’afeagaiga a Aitulaga ma Ituau, fa’amalo le tu’i pea o le mulipapaga i aso e fai so’o i le taimi e ta’a’alo ai ‘au a au tama fanau.

Ia ua le tau le mea na mana’o ai le teine o Sina, na mana’o i le siamupini, ia e pei lava ona fai atu, o le aso ma le filiga o le aso fo’i ma ta’iga ti’a.

E le o se togi ma lavea, e le o se matematega fo’i ma le sa’o, ia e toe oso fo’i le la, e maua lava e le ‘au e fa’amaoni i lenei tausaga le mea e lelei, o le manumalo, la ua sape ai nei “Teine o le Seaula.”

Sue’ga Siamupini Alii - Kirikiti Sisigafu’a 2017

E fa’amanatu atu pea, i e fiafia e maimoa i ta’aloga kirikiti, ua maua nei le tasi au mo le fa’afitiga o aleaga, ua mae’a nei le su’ega o le tulaga fa ma tulaga tolu, i le aso ananafi, e o’o mai i le taimi e lolomia ai le nusipepa ma le isi aso, e le’i uma lava.

Ua finagalo ai le Tofa o le To’oto’o po’o le sui Failautusi o le Mataupu tau Samoa ma le komiti, o le aso o le a faia ai le su’ega siamupini a tama.

I le va a le Fetulele mai Tula, ma Pisisami mai i Vaitogi.

O le ’au a le Fetulele lea e mau ai le siamupini i le tausaga lea ua tuana’i, a’o lenei fo’i o le a toe su’e siamupini fo’i i lenei tausaga 2017.

O a’u ia e lua, na faiaina Vaitogi i le latou ta’aloga lona lua o le liki i le ‘au lea a le Seaula mai i Aoa, i Fagaalu, ae ole Fetulele na fa’atoa faiaina mai lava i le Pisisami, i le malae lea o Gagamoe, i Pago Pago.

I le matau atu, e malolosi uma nei a’u e lua, i le fuafua atu i ai i fa’ate’a, e lelei e tutusa uma fa’ate’a e (B+), ae a pa’u mai i le mea tautalitua’a e (A) uma ‘au nei.

Se’i vagana ai le polo lea e tamo’e na tau sapo, ona iai lea o le fa’ailoga fesili, e (C+) le ituaiga sapo lena, a tu’u mai i mulumu ia e (A) uma ‘au e lua i le tulaga lea.

I le itu i le ta, o lo’o mau pea le ‘ai silia ia Marcus o le Pisisami e 59 ona ‘ai, ma maua i le ta’aloga ma le Lega, o lo’o tumau pea na ‘ai e o’o mai i le taimi nei.

E fa’apena fo’i le ‘au lea a le Fetulele, e tele naua tama ta lelei lea e folifoli mai i lea ta’aloga faitaulia, i le suega siamupini o le Sisiga Fu’a 2017. E pau lava le mea e le fiafia ai le to’atele o le malae lea e i Vaovai, o le malae a tama ta, ae le’o se malae i le fa’aaliga o le talitua’a.

E fa’apena fo’i fa’ate’a a le Pisisami, o Marcus, Mao, Wesley ma isi latou sui fa’ate’a, ua leva tele fo’i ona faia lenei galuega o le fa’ate’a.

Ia o le a tu’u pea i ‘au e lelei le latou mate i le aso, ma le ‘au e le tele ni mea sese, o le ‘au lena e maua le mea lelei ma maua le manumalo i lenei aso. Ia manuia le ta’aloga o le su’ega siamupini o le Kirikiti!

Comment Here