Pago Pago, AMERICAN SAMOA — I le liki mo Talita a vaega ta'itasi a le Asosi Volleyball i Amerika Samoa ua fa'ailoa mai ai le i'uga o lea Liki mo le ta'amilosaga i le 2018.

O ta'aloga nei sa faia i fa'aiuga o vaiaso ta'itasi ae maise o aso malolo ma sa fa'atautaia mai ia Setema e o’o i le fa’aiuga Novema.

I lea ta'amilosaga, o le 'au Manumalo i le talita a Ali'i o le Annex, tulaga lua ai le Laumuatasi mai Pago Pago, ae tulaga tolu ai le Filemu lea na faiaina ai le Sinapi. O le sui na ia mauaina le Tama Ta'alo lelei o le ali'i o Daniel Tsi Fereti.

I le vaega o Tama'ita'i ua umia nei e le 'au a le Mizuno le talita, ae siamupini lava le BTI i le liki atoa. Tulaga lua ai le 'au a le Mizuno ma le 'au a le Crew Cuts na tulaga tolu fa'atasi ma le Amouli Girls i lea ta'amilosaga a tama'ita'i mo le talita 2018. O le tama'ita'i ta'alo lelei i lea liki o Aiga Seneti.

O le vaega o ali'i U19 ua umia ai e le Ali'itaoso le talita ae maua e le Annex le Siamupini, tulaga lua ai le Laumuatasi, ae tulaga tolu le Lupelele ma le Ali'itaoso. O le latou sui na maua le ta'alo lelei o Baker Moalele.

O le vaega o tama'ita'i U19 na maua ai le Talita e le 'au Crew Cutz, o i latou fo'i na Siamupini i le latou vaega, tulaga lua ai le Lauli'i Girls ae tulaga tolu le BTI ma Lady Vikings. O le tama'ita'i ta'alo lelei o Beauty Epenesa.

I le Liki na faia mo le Kerisimasi na toe pale fo'i lava le taumafaiga a le Annex i le Pine Auro i le vaega o Ali'i. O le pine siliva ua maua e le Laumuatasi ma le pine apamemea ua nofo lea ma le FIlemu.

I le ta'amilosaga a tama'ita'i ua maua ai e le BTI le Pine Auro, o Lona ua latou maua le pine SIliva ma le pine Apa Memea ua maua lea e le Mizuno Girls.

O lenei liki sa faia lea i aso e lua o le vaiaso na te'a nei. Tesema 7 & 8, 2018 ma fa'atautaia lava mai le Malaeloa Gymnasium.

NOFO LE IPU I APIA - "FEALOFANI CUP" - TU'UGA ALO VA'A

E to'a 13 ali'i folau na malaga ma o latou fa'atonu e to'alua ma le to'atele o matua na tapua'ia faiva o le "Sailing Association of American Samoa".

Ona sa ia i tatou le ipu o le Ta'amilosaga "Fealofani Cup" o lea sa masi'i lava ma le fa'amoemoe e toe manumalo, ae ua nofo lea Ipu i le 'au tauva a Samoa.

O 'ai na maua e le tatou aumalaga e 209, ae o 'ai o le taumafaiga a Samoa e 256. E ui la i lea, ae sa i ai nisi na tu mati'e a latou taumafaiga mai le tatou 'au alo. O le ali'i o Victor Chen na ia mauaina le Pine Auro i lana taumafaiga i le Olympic Class Open Laser, ma o ia lea o lo'o i ai le fa'amoemoe o Amerika Samoa e malaga atu i Ta'aloga a le Pasefika i le 2019 e tauva ai i lea lava fa'agatama.

O le alogava'a ua avea ma se tasi o ta'amilosaga e mua'i iloilo ai tama ma teine ta'a'alo a malo na lua, mo Ta'aloga a le Pasefika 2019 ia Iulai.

Peita'i, o ta'aloga fo'i lea e fa'atauva ai malo fa'aatumotu o le Pasefika, ua avea lea ma ta'amilosaga e agava'a ai nisi o malo uma e auai e ulufale ai i tauvaga o Ta'aloga eseese a le Olimipeka. O sui e manumalo i le Pacific Games 2019, ua gafatia ona ulufale e tauva i le Olimipeka i Tokyo Japan i le tausaga 2020.

Ua le gata ai la i tama ma teine tauva i alogava'a, ae ua fa'apea fo'i ona agava'a matua ma faia'oga o le aumalaga e auai i a'oa'oga fa'apitoa o kosi ua ofo mai e avea ai i latou ma faia'oga agava'a i le Pacific Games i lea lava fa'agatama.

Ua fa'ailoa mai e le ali'i faia'oga Matt Erickson, "O se avanoa lelei lava lea mo tatou tama ma teine alova'a, ina ia fa'amasani i le ogasami lea o le a fa'atautaia ai le tu'uaga mo Ta'aloga a le Pasefika ia Iulai 2019. Ua tatau ona tatou lava tapena ai mo lea avanoa taua, e agava'a ai fo'i e tauva i le Olimipeka 2020."

O le ta'amilosaga lenei mo le Fealofani Cup ua mae'a ai fo'i ma tu'uga lautogia i le va o Asosi Alogava'a i le va o Samoa na lua, ae le muta ai le fa'amoemoe e koleni pea lava le fanau lea ua agava'a mo le Laser Class, ina ia matua lava saunia i latou mo isi tu'uga o lumana'i.

FA'AMAVAE FA'ATONU O LE KOMITI TOFIA - TA'ALOGA A LE PASEFIKA

Ua toe 8 masina o'o i le taimi o ta'aloga a le Pasefika ae fa'amavae mai le ali'i fa'atonu na tofia e galulue fa'atasi ma lana Komiti na filifilia e fa'atautaia "Ta'aloga a le Pasefika" lea e talimalo ai Samoa.

Peita'i, e le o fa'avaivai ai le aga atu pea o le Komiti tofia ina ia mautinoa ua tapena nofoaga uma e fa'atautaia ai ta'aloga lautogia mo lea ta'amilosaga o ta'aloga eseese i Samoa.

O le ali'i na tofia e avea ma fa'atonu o le Komiti o Aveau Niko Palamo, na tofia ia Me o le tausaga nei, peita'i ua fa'amavae i le fa'aiuga o Novema.

O le susuga le ta'ita'ifono o le Pacific Games Loau keneti Sio sa ia fa'amautu maia lea fa'amavaega ma ua fa'ailoa mai, e le mafai ona fa'aauau se tiute o se tasi, pe afai e le maua le agaga galulue fa'atasi.

Ona o lea ua tula'i ese le ali'i fa'atonu na tofia, o le a fa'aauau pea lava galuega ua mae'a fuafuaina ma agai i luma le taumafaiga a le Komiti tofia ina ia lelei taumafaiga uma ma agatonu mea uma e tapena mo le fa'amoemoe o malo uma o le atuvasa.