Ads by Google Ads by Google

Ta'aloga: Aso Fiafisa Fanau A'oga - Manumalo Baptist Academy

Mataina le ta'amilosaga 'au ta'ito'alima sa faia e le fanau vasega matutua i le Manumalo Baptist Fun Day of Sports i le aso Faraile na te'a nei.  [ata: Leua Aiono Frost]Matagofie le fa'ase'e a le tama'ita'i level K5 lena ua fiafia ma ua le toe fia alu ese mai ai i le fa'ase'e.  [ata: Leua Aiono Frost]O le vaega a le 'au lalafi mai le vevela o le la, toe oso i fafo i le tauvaga pe a mae'a ona fa'amalu i le vai'aisa.  [ata: Leua Aiono Frost]Ua o'o i le sailiga o le siamupini o le Tosoga Maea ma e le'i fa'avaivai lava le Green Team, a'o le Blue lava ia e le faigofie ona faia'ina.  [ata: Leua Aiono Frost]O se va'aiga i le vaega sa pasipasi le polo Volley Ball ma o latou faia'oga na va'aia a latou ta'aloga.  [ata: Leua Aiono Frost]

Na fa'afiafiaina fanau a'oga ina ua fa'afuase'ia ona fa'alauiloa e le Pulega a le latou a'oga, Manumalo Baptist Academy i Malaeimi, o le a faia le aso o Ta'aloga Eseese i le Aso Faraile atoa na te'a.

Na ala usu le fanau, tapena latou suiga o lavalava o lo'o fiafia i latou e laei ai pe a ta'a'alo, e le faia se toniga, ae o le toniga e tasi e laei ai i latou.

Na va'aia le pisi o le fanau a'oga, ua galo atoa ai ma le tele o afaina i lotoifale o nisi o i latou. O nisi o motusia le tautua lautele a le Eletise ma ua leai ai lea iutilia mai o latou falenofo, ae ua le toe manatua ina ua faia ta'aloga ma ua mafuli i latou e ta'a'alo fa'atasi ma isi o latou uso a talavou.

"O lenei le fa'amoemoe o le fa'atonu o le a'oga i Manumalo nei, Papali'itele Lauli'i Alofa, aua ua ia va'aia le pogisa o le atunu'u ua le atoatoa le tautua a le eletise i lotoifale o nisi e to'atele o aiga, ma ua fa'anoanoa atu ai ma le ala usu o nisi o fanau i a'oga. Ua a'afia lotoifale, ma e tatau ona fa'afiafiaina le fanau, le lumana'i o le atunu'u, ina ia le muta le fa'amoemoe, ae matua una'ia le loto ia ola fiafia pea, tusa poo le mea e o'o mai, ae o lo'o soifua ma malosi e ola fa'atauva i taleni ua ia te'i latou,” o se saunoaga lea na faao'o mai e se tasi o tama'ita'i faia'oga a lea Laumua.

"O le aso ta'alo lenei, o se toe fafagu ma se fa'ailoa lea i le fanau, e tumau lo latou agava'a, tumau lo latou fiafia i le ola ma le malosi o lo'o ua mae'a fa'asoa mai e le Atua ia i latou e ola ai. Aua ne'i tu'u i puapuaga, ae fa'afetaia meaalofa ua ia te oe a'o e tuputupu a'e fa'atasi ma lou auuso i so'o se mea o e i ai, i lau ekalesia, lou nu'u, ma lou aiga,” o se tala lea a le tama'ita'i faia'oga ia Dorothy Fuiava.

O ta'aloga sa faia e le'i fa'atauva, ae ua faia ina ia fa'afiafiaina le fanau. O lea aso na muamua lava ta'imua le fanauiti, e faia lava latou ta'aloga i totonu o potu ea malulu o le a'oga, e le o mai i latou i fafo i ta'aloga o pisi ai le to'atele i malae eseese. O iina fo'i e fa'aalia ai latou cartoons e fa'afiafiaina atili ai i latou.

Soso'o mai lea ma le Level 1 &2, i tosoga maea, lape ma ta'aloga e le so'ona tamomo'e pe fa'atauva. Ua va'aia le popoto fo'i o le fanau i nei ta'aloga o aso anamua a Samoa. Peita'i, o le ta'aloga na silisili ona mataalia ai lea vasega o le fanau, ina ua tatala le fa'ase'e setele sa fa'atulaga mo i latou le fanau i vasega laiti.

O iina sa le toe fa'atali le fanau ua leai se isi e fia malolo, ae ua fa'asoloatoa le a'e i luga ma fa'ase'e mai i lalo ma toe goto ane i le vai ta'ele fa'ato'a toe sau i le atoa e tu i le laina e toe a'e i le fa'ase'e.

O se vaaiga fiafia ma le fa'afiafia loto le suia atoa o le olaga a'oa'oina o le fanau, ina ua faamalie lo latou naunau i taaloga i lea aso. I vasega matutua sa fa'asolo i le togi ia pe i le polo. Lelei alo a isi, ae lelei fo'i togi a isi. E i ai nisi e agava'a i lena fa'agatama, ae o nisi e vave ona pe, e le lelei le 'alo.

Fa'asolo lea i tu'uga tamoe ma toe fo'i fa'amolifu'a sa faia a'o loma le o'o i ta'aloga basketball i 'au ta'ito'a lima.

Soso'o lena ma le Volley Ball e faia ina ia iloa pamu le polo ma ia lelei le pasi i taimi o fa'agatama fa'atauva i le voli. A sese le pasiga o le polo pe le au, ona pe lea o lena tama po'o le teine ta'alo. O se mea e lelei ai, sa lava ma totoe faia'oga sa latou faatautaia ma va'ai toto'a ta'aloga a le fanau i ona vaega uma.

Peita'i na tomuli fo'i le fanau matutua i le latou fa'ase'e tele sa fa'atula'ia i lumafale o le Ofisa Autu o le a'oga. Na matua iloga fo'i ona toe fa'amalu mai ai o latou tino mai le vevela o le la sa ta'a'alo mai ai i le amataga.

O le fa'ase'e a le fanau matutua, e tele ma fausia lava mo le vasega o fanau ua mamafa pauna ma ua u'umi fo'i. Matagofie a latou ta'aloga, ma sa fa'ailoa mai e le tama'ita'i o Miracle Leovao o le vasega 7, "Matua'i seki lava le faiga o le aso Faraile lenei, ua galo atu ai le leai o se eletise ma le tau pulapula o le moliga'o lea e faia ai ata meaa'oga. Fiafia pe a fa'apea uma aso malolo!"

I le fanau uma sa auai i le a'oga i lea aso, sa sapalai lava e le a'oga le vai malulu mo le fanau ma latou mea'ai fa'apea ma snacks fa'avai'aiga ina ia mautinoa o lo'o fagaina i latou, ae le na'o le naunau e ta'a'alo.

I nai matua sa o'o atu ma maimoaina lea aso fiafia, sa fa'aalia e le tina ia Sia Pearson, "Fa'afetai i lenei a'oga aua e le o tu'u i le afa o Gita ma lona fa'atama'ia o le tatou atunu'u, ae o lo'o faia pea a'oga i lenei vaiaso, ae fa'ai'u mai i se aso fiafia o ta'aloga, e fa'agalo ai i le fanau taimi fa'aletonu, ae fa'aosofia lagona fiafia ma le ola pea e fa'afetauia fa'afitauli faigata."

Ona e le'i i ai se afaina tele o le lotoa i le ‘afa, o lea sa faia ai latou a'oga mai le aso Gafua ua te’a se'ia o'o i le aso Tofi, ae o le aso Faraile o le aso fiafia o le fanau.