Ads by Google Ads by Google

Ta’aloga Liki Kirikiti o le Fu’a 2017 (10)

Nua ma Seetaga Cricket team. [ata: THA]Faga’alu Cricket team. [ata: THA]
tusia: THA

TA’ALOGA A TAMAITA’I - ASO TOFI SEIA OO ASO LULU:

Ia fa’amalie fo’i i le ‘au kirikiti a Fagasa, fa’apea lava o outou fa’aaogaina mai lava le tou igoa muamua o le ‘Teine o le I’a’ a’o lena ua sui i le ‘Teine o le Fealofani’, ona fa’amalulu atu ai lea i le Afioaga ma le Tapua’iga.

O le aso To’onai fo’i, na maua le ‘ai silia mo le liki a tama’ita’i, mai le ta’aloga aTeine o le Sea’ula ma Leone Mosooipala #2, lea na sui ai le ‘ai silia Kirikiti a Tama’ita’i 2017, i le tama’ita’i o Fatima e 48 ‘ai na ia taina.

O le vaiaso nei fo’i lea na tula’i mai ai le fa’ate’a a ‘Teine o le Moli’ o le tama’itai o Oreta e (8) ‘olo, o lo’o tutusa nei na Tauia Pati, mai Teine o le I’a Vai, e valu (8) fo’i ana ‘olo.

Ae o lo’o i ai Akape i le tulaga lua (7) ana ‘olo i le ta’aloga fo’i ma le Mosoo’ipala #2.

Ana iai semea pueata e pu’eina ‘ata i sapo a teine, e muliga fo’i faiga o le sapoga o le niu fo’i lea e ave ai e inu ai le Tupu, e sa ona taputapu ne’i pa’u i lalo.

Le tele o ta’aloga lea e taumafai lava le tatou pu’e ata, e pu’e  mai ata nei, aua le maimoa ma tagataga’i a tagata i le Nusipepa.

Na toe maua mai le ripoti sa’o, ma na fa’auma lava le ta’aloga a Masefau ma Sinapati, ua mae’a, ua manumalo ai le ‘au a Masefau i le ta’aloga lena, sa fa’amae’a lava i le aso lena.

LUPELELE (1-0) v TEINE O LE MANULELE TAUSALA (0-1)

O le tasi lea o ‘au e malosi fo’i o le ‘au lea a le Lupelele, e fai o le manaia o fa’ate’a a’o le lelei fo’i latou ta. Na tata muamua Teine o le Manulele Tausala na manaia lava, a’o le lelei tele o fa’ate’a a le Lupelele, ma lelei fo’i le latou talitua’a, lea na vave maua pe a le Manulele Tausala.

E 25 ‘ai a le teine o Sofi, e ta’i 5 ‘ai a Siufaga ma Orepa a’o le to’atele, o le fuamoa i le tasi o le ‘ai, lea na maua ai ‘ai e 49 i le 19 o pe.

Na tuli loa e le Lupelele, ma le vaai atu ua lele le lupe i le vaomaoa, e to’alima lava teine na taina le 49, ae mae’a. O le ta’aloga e le iai se finauga, i le fa’aletonu mai o le talitua’a a Teine o le Manulele Tausala.

E le’i umi lava ona fetagofi i ai Ala 17, Faitete 12, ae maea le ta’aloga lenei i lena afiafi i Vaovai, Fagaalu.

O fa’ate’a a le Lupelele; Tali ma Hana. ‘Ai-silia Ala 17, Faitete 12. O  teine e ‘ai-silia a le Manulele Tausala, Sofi 25, Siufaga 5, Orepa 5, a’o fa’ate’a o Orepa ma Sofi.

MOSO’OIPALA #1, LEONE (0-1) v PAGO GIRLS, PAGO (1-0).

I le ta’aloga muamua i le aso Toana’i, na ta’a’alo ai le Moso’oipala #1 ma Teine o le Aeto. O nei ‘au ua iloga i lenei fagatama i le tele o aso, ua leva ona siamupini fo’i i tausaga ua mavae.

E le’i leva ona siamupini atu le ‘au a le Aeto i le 2000, lea na su’e ai ma le Pisisami, lea na ki ai moli o ta’avale ina ua pogisa le aso, ae fa’auma ai le taaga a le Aeto.

O le ‘au a le Moso’oipala ua leva tausaga o fai ma latou le siamupini, a’o lea ua toe tau lalaga mai le kirikiti i nei vaitaimi i le tupulaga fou, ma e sili atu lena i lo’o le o solo i isi mea ae ua tatau ona toe lalaga le ta’aloga e tou te masani ai.

Na tata muamua le Moso’oipala maua ‘ai e 54 ae 19 pe, ona o le lelei o le talitua’a a le Aeto, i le mata’alia o le talitua’a i taimi uma e alu ai se polo i luga, e fo’i mai ua fa’atalitali atu Teine o le Aeto ma ato i le sapoina o polo.

O le isi mea na fiu ai le Moso’oipala, o le te’a fa’atoga lea na fa’aaoga mai e le Aeto o Vasa, na manaia fo’i le to’ato’a atu a le teine o To’a.

Toe fa’atasi loa le lelei o le talitua’a, tu’u loa i ai ma te’a a le vaega lena, maua ‘ai e 54 ae 19 pe.

O le mea malie lava lea i le naunau atu o teine o le Mosoo’ipala i le taimi na talitua’a ai, ua ta vaai atu ua maua lava le lelei o latou te’a o lena aso, fai o le fiu o Mellisa e tau togi lana pa’utasi, ae le maua.

Ua fiu fo’i si teine o Ana ia, ae ua leaga lava lana te’a i lena aso. E leiloa e i tatou pe ona o le lelei lava o le ta a Rosa, lea na ia taina ‘ai e 35.

O ‘ai silia a teine o le Mosoo’ipala o Divine 14, Mina 10, tu’ufa’atasi uma ‘ai e maua ai le 54 ‘ai ae 19 pe.

Ae o le teine na fiu ai le Mosoo’ipala o le teine o Rosa lea na mauaina 35 ‘ai, ae pe a’e ua tasi lava le ‘ai atoa le 54 ma le ‘ai fa’asili.

O fa’ate’a a le Aeto o To’a ma Vasa. O fa’ate’a a Leone, o Mellisa, Ana ma isi vaega na te’a.

SEAULA, AOA (1-1) v MOSOO’IPALA #2, (0-2).

O le ta’aloga lea na ‘ai silia ai Fatima lea e tamua mai i le Seaula, 48, ia lea ua ‘ai silia ai nei Fatima (Seaula)i le taimi lenei i le liki a tama’ita’i 2017, ae o le a fa’ailoa atu le fa’asologa i se taimi o i luma.

O teine o le Seaula, e to’afa lelei teine ta lelei lea e ta’a’alo ai, o le mea lea e iloa ai, e i ai le tulaga lelei o le Seaula i le tausaga nei, pe’a mae’a lelei le alumaga o le liki o lenei tausaga.

O ‘au nei e le’i i ai lava ni faiaina, o Teine o le Asaga, I’a Vai, ma le Lupelele, ae o lenei e taotao atu lava le Seaula ma le latou faiaina e tasi i le I’a Vai (Siamupini o le 2016).

Na tata muamua le Seaula ma maua latou ‘ai e 80 ae na o le 7 pe, o le taimi tonu lava lea na pe ai loa le tama’ita’i o Fatima lea na ‘aisilia, ae atoa loa le latou 80 ’ai.

Ia e le’i umi ona tuli ‘ai o le Mosoo’ipala #2, ae fa’amavae ua uma le ta’aloga, ina ua maua ‘ai e 35 ae 19 latou pe.

O teine na maua ‘ai a le Seaula; Fatima 48, Ana 10. O fa’ate’a o Vi’i, Lei, Christina ma Fa’asili.

FAGAALU (1-1) v TEINE O LE MOLI (2-0)

O se ta’aloga na fa’apea ai se pe, a’e te’i ane, o se ta’aloga manaia tele. Na tata muamua le ‘au a le Teine o le Moli, maua a latou ‘ai e 69 ae 19 pe, ona tuli loa lea e Teine Autalavou a Fagaalu, e afa ifo le ‘au, ae afa fo’i ‘ai na tuliina, 10 pe, ae 35 ‘ai.

Na fa’apea lava ‘au ia, ai o le a vave nei ona o mai nei pe, ae te’i ane, ua matua manaia lava o le ta’aloga i lau matau, i le ta a le fa’alaititi o Moana,o lona laitiiti ae ua fiu ai fa’ate’a a Teine o le Moli e tau tape.

E le iloa pe ana le pe lava Moana, e maua ‘ai a Teine o le Moli, i le ta’aloga fo’i lea, na tutusa ai ‘olo a le tamaita’i Oreta e fa’ate’a a le ‘Teine o le Moli’ e tutusa ai ma Tauia o le I’a Vai, e 8.

E uma ane na tuli ‘ai Teine o le Autalavou a Fagaalu, ua 64 ‘ai ae maua a tatou pe (19). Teine Fagaalu na maua ‘ai silia, o Moana 15, ma Ruby e 7 ona ‘ai.

Na va’aia fo’i le fou o nai teineiti i le ta’aloga, ae ua amata ona lelei mai ta’alo, o le fa’ate’a o le Autalavou a Fagaalu, o Regina lea na o’o i le 7 ‘olo, Sipoloa 2, Moana 2, Lagi ma Winter sui fa’ate’a.

TEINE O LE FEALOFANI (0-2) v SEAULA (2-1)

O se ta’aloga na fai sina fa’ate’ia ai o le au maimoa, aua na tu’u e ta’alo Nu’uuli ma Pago Pago i le aso lea, ae na fa’aalia le fa’asea o le ‘au a Pago Pago, e le talafeagai aua o le aso foi lea o ta’a’alo ai le ‘au a tama i Gagamoe, Pago Pago.

“O ‘ai o le a o e tapua’i ta’aloga a tama, a’e o ai e o mai e tapua’i le ta’aloga a tama’ita’i o le nu’u, toe fetu’unai mai muniao ma le tofa, ma fai fa’alelei ai loa le fa’asologa o ta’aloga.” O se tala aloaia lea na talosaga ai Pago Pago e suia le ta’aloga lea mo i latou.

O le ala lea na fa’atonu ai loa le ta’aloga a “Teine o le Seaula” ma “Teine o le Fealofani” e tu’u mai i luma i le aso Lua, a’o le ta’aloga na tu’u e fai i le aso Lua, o Teine o le Aeto ma Nu’uuli, o le a faia lea i le aso Faraile.

O le ‘au a tamaita’i, e tau lagona se leo ae o lava e fai le fa’atonuga ua fai atu, a nai ‘Teine o le Fealofani’ na ona iloa lava o le aso lea o le latou ta’aloga, ‘Tutu loa i luga ma savali e faia le fa’atonuga’.

Fa’apena foi le Seaula, fa’ailla mai, na taofi uma mai le ‘au faigaluega, e o mai e sauni i le ta’aloga faitaulia lea.

Na tata muamua Teine o le Seaula, manaia lava filiga i le malae ae toe emo ane le ata ua au ‘ai i le 80 ‘ai ae 16 pe, ina ua leaga taofiga o pe.

Le ta’aloga lea ile taimi na tuli ai le ‘ai a Teine o le Fealofani, na ‘oso ai i luga le teine o le Seaula, fa’alavelave i le tuliga ‘ai, ma taia ai le teine tuli ai, ae fai mai le fa’amasino ua pe le teine Fealofani.

Ia na fa’asao mai i le laulau o le komiti, “E leai se pe, e sese le teine o le Seaula lena na alu ane ma fa’alavelave i luga o le malae sima a’o tuliina le ‘ai a Teine o le Fealofani.”

O nai mea na e fai fo’i ma fa’a-alamata o teine ta’a’alo, po’o ola le vaega o fa’amasino i se ta’aloga e fa’ate’i ai le ‘aumatamata ua tautulimoe i lena aso.

O lena e lelei Teine o le Fealofani, ua umi le tou malologa, ua atoa nei le 10 ma ona tupu tausaga ae o lea ua toe atina’e le faiga o le kirikiti.

Teine na maua a latou ‘ai: Fatima Su’a 18, Simealeaga 14, Dora Ta’ase 10, Vi’i Leaoa 14 ao fanate’a o Vi’i, Lei Christina ma Fa’asili.

O TA’ALOGA TAMA NA FAIA I GAGAMOE, PAGO

O le ripoti lea na maua mai i le malae i Gagamoe, i Pago Pago, i le ta’aloga a le Mosiula ma le Lupelele, na tata muamua Mosiula maua ‘ai e 100 ae 12 pe.

Ona tulia lea e le Lupelele, maua ‘ai e 100 ae toe ta ia latou ‘ai e fa’asili, uma lelei le ‘au na tata, e na’o 6 a latou ‘ai mama na maua.

Ia e le’i umi se taimi na tulia ai ‘ai na e 6 ae maua, manumalo ai loa le Mosiula i le latou ta’aloga lena.

ASO FARAILE:

SEAULA (3-0) v MEA’ESE (1-3).

O le ta’aloga foi lea na tata muamua ai le Seaula, maua ‘ai e 100 i le 13 pe, ona o a’e lea o le Mea’ese e latou te tulia, ia e maua lava pe e 19, ae fa’atoa 63 ‘ai.

Ua se’e atu nei le Seaula i le tolu malo ae leai se faiaina (3-0) ae se’e mai le Mea’ese i le tolu faiaina ae tasi le malo (1-3), o ‘au lelei a nei i le tau atina’eina o nai tama laiti. E i ai le tausaga e toe sau ai le Mea’ese ua lelei atoatoale vaega o tamaiti nei ua amata tapena, ae le iloa po’o le tausaga fou ua tele fo’i se suiga i lea ‘au.

ASO TOANA’I:

AGA O LE PE’APE’A (1-3) v PYCCT (1-3)

O ‘au nei e moni ai upu a le isi toeaina tapua’i, “O nai ‘au lea fa’atoa toe tau amata mai le latou fa’avaeina, e aua la le televave ni a tatou tala e faia i tama na.”

“Pau lava le mea ua o mai e fai le ‘au, e alolofa i ai, aua o le kirikiti latou ia, e iloa lava le tagata ua leva ona ta’alo ma le taule’ale’a lea fa’ato’a ta’alo lava ia i se kirikiti, lea e taumafai e a’o le ‘u’uina o le pate pe’a ta. Ae fai fai lava lelei!”

E 100 ‘ai a le Aga o le Pe’ape’a ae fa’atoa 13 pe, ia tuli loa e Pavaia’i PYCCT, maua na’o le 59 ae 19 pe, manumalo ai Tama o le Aga o le Pe’ape’a i le latou ta’alofa faitaulia lea.

FETULELE (4-0) v TUNAULA (1-2)

I le ta’aloga faitaulia i le va o le Fetulele ma Tunaula mai Fagaitua, lea ua manual fo’i le Fetulele, ma ua se’e nei le Fetulele i le 4 manumalo, ae leai se faia’ina.

Peita’i o le Tuna’ula, ua tasi lava le manumalo, ae 2 faia’ina ua i ai nei. Ua matauina fo’i le tulaga lelei mai o fatate’a a le Tunaula, ae mataulia, e le’o lava mai sui te’a pe a o’o ina taia le ta.

ASO LUA:

TAMA O LE AETO, PAGO (1-3) v LUPELELE (1-2).

E manaia le maimoaga pe a ta’aalo nei ‘au e tutusa malolosi pei la o Aeto ma le Lupelele, e i iloa ai lava le ‘au e lelei i le latou ‘aupaga.

Ua matauina o le to’atele o i latou e lelei ta’a’alo i le Kirikiti e matele ina latou sailiilia fo’i ‘au e to’atele ai sui e lelei ta’a’alo ina ia ulu i ai ma ta’alo ai. Peita’i, o isi sui e le’i atoatoa le iloa lelei o le fa’agatama, e tasi lava le mea o saili se ‘au e ta’alo ai, lea la e fetaui lelei ai tama nei e a’a’alo i le Lupelele mai Iliili ma Pago Eagle Boys mai Pago Pago, e paga lelei lava la’ua.

Na tata muamua le Aeto maua ‘ai e 100, 17 pe, ia tuli loa e le Lupelele, maua ‘ai e 100 ae 16 pe, na fa’aauau pea le taaga, maua ‘ai e 22, ae uma pe e 19.

Ona tuli leae le Aeto ‘ai nei e 22 se’i atoa latou pe e 19, peita’i, na’o le lua ‘ai na maua ma ua fa’amau ai le ta’aloga lea, manumalo le Lupelele.

O ta’aloga tamaitai i Fagaalu i le Aso Tofi: I’a Vai ma Mosoo’ipala #1, Aso Faraile: Teine o le Manulele Tausala vs Teine o le Aeto, Aso Toana’i: 1st game; Teine o le Asaga vs Autalavou Fagaalu; 2nd game: Teine o le Moli vs Lupelele, 3rd game: Alao v Aeto.

Ta’aloga Tama Malae i Pago Pago: Aso Tofi: Tunaula vs Mosiula, Aso Faraile;E le’i mautu mai! Aso Toanai: 1st game: Lupelele vs Mea’ese, 2nd game: Pisisami vs Lega, 3rd game: Aga o le Pe’ape’a vs Mosiula.