Ads by Google Ads by Google

Ta’aloga Faitaulia i le Aso Gafua

Le ‘Auta malosi o le ‘au a le Pisisami. 101 ‘ai sa maua ae 14 pe.  Manumalo le Pisisami 101 (14pe), Sinapati 67 (19pe)  (ata:THA)Talitua’a le au a le Pisisami (Vaitogi) i le tatou ta’aloga i le Aso Gafua ma le ‘au a le Sinapati (Tafuna). Manumalo le Pisisami 101 (14pe), Sinapati 67 (19pe)  (ata:THA) Le susuga ia Uale o lo’o tu mai i le pate mo le ‘au a le I’a Vai. 30 ‘ai na ta ina e Uale, ma e uma ifo lava le ta’aloga e le’i pe lava. Manumalo Malaeloa 94 (18pe) Masefau 93 (19pe).  (ata:THA)
tusia: THA

I le taaloga i le va o Sinapati mai  Tafuna ma le ‘au a le Pisisami mai i Vaitogi, sa faia i le aso Gafua, na iloga ona matagofie aua fo’i o Sinapati o le ‘au na o’o i le Siamupini i tausaga e tele ua mavae,

a’o le Pisisami fo’i, sa sau lava i tausaga uma, e o’o lava latou i ‘au ia e su’e ai ‘au e saili ai le siamupini i le tele o tausaga ta’itasi ua te’a.

I le lua fo’i tausaga na su’e siamupini ai fo’i, ae na faiaina i le tatou ta’aloga o le siamupini i le Mosi’ula. O lona uiga la, ua leva tele tausaga o i ai lava le Pisisami i luga i ‘au malolosi i tausaga ta’itasi.

Peita’i, i le la’ua taaloga i le aso Gafua, na va’aia ai le malosi tele o le ‘au a Vaitogi ‘Pisisami’, e tele a latou fa’ate’a lelei pei o le tama o Marcus, Mao, Wesley, Jr Sitau, e lelei le latou ‘au tata, lelei ia talitua’a, o le lelei lava lea o polo mamao a le Pisisami o lo’o tumau mai pea i le tele o tausaga.

A’o le ‘au a Sinapati, o le mea lena ua leaga ai i le vaitaimi nei, o le leai o ni fa’ate’a lelei, e le pei o aso la, o le tele o fa’ate’a lelei na gasolosolo mai ia Sinapati.

Ae o loo feololo le talitua’a, e ui lava ina fiu e va’ava’ai le taimi e pa’u mai ai se ta a se tama o le Pisisami i totonu, ae maua ‘ae i faifai mea mai i luga o fale i Faga’alu, po’o le sami, ua tauau lava ina a lavevea mai ai va’a o lo’o feoa’i i le gatafale.

E mafua uma nei tulaga fa’apena, ona o le le lelei o te’a.

Talofa i le va’ava’ai atu i le susuga ia  Asiata Fa’atasi Sale, i le naunau i le fa’amaopoopoina o lana ‘au o le Sinapati, o le toe ulutaia lea o lo’o totoe mai nei i lenei vaitaimi i kirikiti, ia ma si tama o Fala. E ui lava ina tautala so’o i taimi o ta’aloga, ae o le la e malie ai ta’aloga.

Fa’apena fo’i Logovae o e au malosi mai Vaitogi, o lo’o va’aia lava le vae mo’emo’e o lea uso, malo lava le fa’amaopoopo o le tupulaga.

‘PISISAMI’ VAITOGI (1-0) vs ‘SINAPATI’ TAFUNA (0-1).

Le malosi o le ‘au lea a le Pisisami, ua atoa lelei mea o i ai nei, fai o le manaia o fa’ate’a a’o le lelei o le talitua’a, toe lelei fo’i ia latou ta, pe ana fa’apea la o le aso Gafua o le su’ega siamupini o lenei tausaga kirikiti. “O le Pisisami lava le siamupini i lenei tausaga pe’a fua atu i ai i le latou ta’a’alo i le ta’aloga  lenei i lea afiafi.”

O le ‘au a Sinapati o le ‘au ua masani ona siamupini i tausaga e tele ua tuana’i, ae o’o mai i le tausaga nei, lea ua tau su’e ni fa’ate’a lelei o i ai, vagana si tama o Kuresa lea e fa’atau pepe mai lava i le latou ‘au, manaia fo’i le malolosi o tau’au a ona tama o Kansa, Ionatana, Pisia, Jr ma isi lava e iloa faate’a na fa’aaoga mai i lena aso.

Na tata muamua le Pisisami, o le fa’atama lava o le ta, le tagata lava ia na alai ona ia maua ‘ai se tele mo ia, e to’alima lelei lava le ‘auta na ova ma le sefulu o latou ‘ai, o Ben 17, Eldon 13, Renzo 12, BJ 16 ma Patty 12.

O le mea lena na tupu i le aso Gafua, a tata mai le ‘au a le Pisisami, e ta mai lava, ta mai lava fa’atoa maua se pe, e fitu ia pe ae ua ova ‘ai i luga i le 86.

 Peitai, o le isi tama na sauni e o atu e tata, e tata atu lava ae pei ua le maua le sipili na sau ai le latou ‘auta i le amataga.

E 14 pe ae maua loa e le Pisisami le selau ma le tasi (101) o ‘ai.  Na faia loa le fa’aiuga e sauni mai Sinapati e tulia ‘ai o le Pisisami.

 O le ‘floor-show’ a le ‘au fa’ate’a o Marcus ma Mao, na fai mai le amatala o le latou tutu ai i le pate. Na manaia le tagataga’i atu a le ‘au maimoa i lena afiafi, ua sui mai le matamataga a tagata i le tauvaga a Mao ma Marcus lea na fai mai i le taimi na fa’ate’a ai. Uma lena ae fai le tauvaga i ‘olo e maua, soso’o ai ma le tauvaga i polo sapo, lea na maua le i’uga a fa’amasino e tutusa uma le auvaega lena.

E ta’i lua polo sapo a le toalua lena, ae tutusa ia ‘olo e ta’iono, ua pei lava o na’o laua ma tauva ma le ‘au a Sinapati, ua tele lava ina tutu mai tama o le latou ‘au, ae tu’u e faitalia i laua ma te’a ma toe taufetuli ane e sapo ia la polo.

Ia ua umi ta’aloga i le finau so’o o nei fa’amasino ma kapeteni o le ‘au, i le le malamalama lelei i le mea ua mafua ai ona pe lea tagata ma lea tama ta a le ‘au.

E toe itiiti lava afa le ono i le afiafi, o toe tau fa’amalamalama le mafuaga o le pe o se tagata ta.  Na lelei fa’aiuga a le fa’amasino lea o Pili, e iloa lelei le mafuaga na pe ai le tagata, i se se’e, e lelei pea ave ane e fa’amasino aua e lelei lava lana va’ai, e vave.

O e na ‘ai silia a Sinapati a Asiata Fa’atasi e 18 ona ‘ai, Fo’i  na maua le 16 ai ma Kuresa e 15. O se va’aiga a le aumaimoa, o loo lelei lava le ta’a’alo a Sinapati, ae toe lava o fa’ate’a, o le fa’amoemoega lena o se ‘au.

Pestai sua lava nei tu’ua i se mafaufau, ua uma le liki, lea fa’ato’a amata, e tauau e faliu le la i le isi ta’aloga o soso’o mai, emo se ata lelei, ua toe tutu mai fo’i Sinpati i lana masani.

Ta’aloga o le Aso Lua:

‘MOSI’ULA’, MASEFAU (0-1) vs ‘I’A VAI’, MALAELOA (1-0).

Ou te taua le ‘au ta’a’alo ia o le ta’aloga mua lava lea i le matamata ma le maimoaga a le autapua’i mai afio’aga e lua, o le ‘I’a Vai’ mai Malaeloa ma le Mosi’ula mai Masefau.

O lenei tausaga,2017, ua mua’i tata ai le Mouilla, ona ua malo i le fikiga o le tupe, ae muamua le ‘I’a Vai’ e latou te talitua’a.

Na manaia lava le alumaga o le ta’aloga, ae na vaaia fo’i fa’ate’a a le ‘I’a Vai’ Logi ma Uale o tau fa’asa’osa’o mai o la lima ile amataga. O pe tomua a le Mosiula e tolu sa maua i le sapo lelei tele o le talitua’a a le ‘I’a Vai’.

Toe fesoasoani i ai ma le fa’ate’a a le To’afa o Alataua o Nu’utofia Ieru, ia ma le taule’ale’a o Aki. Peita’i o le sui na mata’ina i lena afiafi i le ta’aloga lea, o Faleupolu Kitiona, lea sa ia sapo releía ana polo e tolu, le tama na tu mai i le se’eulu a le itu’olo e pito i le faleva’a a Manu’a.

Na maua muamua lava le ‘olo a le tama o Logi, lena la na atoa ai loa e fa o ona ‘olo i le ta’aloga atoa, ia ae o le tele lava o pe, o le polo sapo lava, i le mata’alia o le talitua’a a le ‘I’a Vai’.

O le ta a tama o le Mosi’ula e leai se isi e ama mai, e mananaia uma lava ta, ia o le aso fo’i lena na fa’ata’a’alo mai ai ‘alualu toto’ e to’alua i le latou ‘au.

A’o le malosi lava o fa’ate’a a le ‘I’a Vai’ i le su’e mai pau’uga e tu sa’o ai ta, ia ae fa’aaoga le talitua’a mo le sapoina, ma maua ai loa le ma pe.

Ae e i ai lava le taimi e te’i lava le tagata ta, ua sunui atu le te’a saoasaoa a le tama o Logi, ma pe ai i le ‘olo pe’a sa’o lelei lava. Ia e uma a’e le tataga a le Mosi’ula ua maua le iva selufu tolu (93) ‘ai.

Na sauni atu loa le ‘I’a Vai’ i le tuliga o ‘ai nei.

O le tamua a  le I’a Vai o le faifeau Rev. Faigata ma Sakai, tulai mai ai, pe le faifeau ua tolu ona ‘ai.

Peitai e ui ina timuga, ae le’i fa’atalitalia ai le ta’aloga, sa faia lava, e o’o ane i le ‘afa le ‘au tata a le ‘I’a Vai’, ae fa’atoa fa-sefulu lua (42) ai. O le taimi lea na fa’ato’a tutu ai loa Logi ma Uale, o i si lava ia tama fa’amoemoeina a Malaeloa.

O i la’a nei na fiu ai fa’ate’a a le Mosi’ula o Vaitogi ma Sililo lea na itu’olo mai i le mea lea e ta atu ai Uale. Uma i la’ua na, ae soso’o mai fo’i Ofu ma Elvis i le itu’olo e ta mai ai Logi ina ua pe Logi.

Fa’asolosolo mai lava le ‘autata a le ‘I’a Vai’, se’ia oo mai ia AJ Custodio.

I le ta’aloga lea, na maua e Uale le tolu sefulu o ‘ai ae le’i pe lava. I le toe sefuluvalu (18) pe, ae maua le 94 o ‘ai o le I’a Vai, ma ua manumalo ai le ‘I’a Vai’ i lea ta’aloga amata o le liki i lenei tausaga.

Oi latou na mauaina ai silia mo le ‘I’a Vai’ o Uale (30), Sakai (13), Fa’amanu (10), AJ (9). O fa’ate’a o Logi e fa ana ‘olo, o Uale e tolu.

O le Mosi’ula e lua sefulu tasi (21) ’ai o le tama o Ofu, Faresa e (16), o fa’ate’a o Vaitogi e (5) Elvis (2) Ofu (3).