E to'a 16 au a Tama i le Lakapi 7 i le Ta'amilosaga World Cup 7s i Hong Kong e amata i le ta'aloga a le Manu Samoa ma le au malosi a Sikotilani i le itula e 11:42 i le po anapo.

O le ta'amilosaga lenei o le Ipu a le Lalolagi i le Lakapi 7 ua atoa i ai le lona 17 o ta'amilosaga o le lakapi fitu mo le 2019, ae 16 'au ua agava'a e ta'a'alo ai, e sailia ai le Siamupini.

I le taimi nei, ua tula'i mai le Au Lakapi Fitu a USA i le tulaga muamua i togi e 113, soso'o ma NZ i le tulaga lua i le 106, ae lona tolu ai Fiti i le na'o le 101 togi, Rusia soso'o mai e 89 togi, Egelani e 80, Ausetalia e 65, Samoa e 59, Argentina e 56, Scotland 47, Falani e 44, Spain 42, Kanata 35, Wales 18, Kenya 18, Japan 14, Chillie 6 Tonga 5 ma Zimbacque 2.

I le taimi nei o lo'o taumafai Fiti e soso'o le fa'alima ai ona maua e i latou le Siamupini o le Hong Kong 7s, a'o Niu Sila fo'i latou o lo'o latou mana'omia ona soso'o le latou Malo i le 2018 i le ta'ito'afitu lea, manatua o Fiti lava fo'i lea e feoa'i solo ma le Pine Auro o le Olympic 7s.

I se lipoti fa’asalalau, o lo’o taua ai e le kapeteni a le USA Eagles 7s Team, Madison Hughes, sa ia fa'ailoa mai ai, "I le taimi lenei ua fa'afiafiaina i matou i le taumafaiga, peita'i e le faigofie ona nofo ai pea i le tulaga muamua i mea uma, e matua sili atu ona malosi le una'iga e tatau ona faia e i matou, ina ia tumau ai pea i le tulaga muamua. O le maua ai le Ipu i Las Vegas ma le toe lautogia fo'i mo le sailiga o le siamupini i Vancouver, o le ki lea o le i ai i le tulaga o i ai nei. E le'i moe miti o le vave lea ona lele le Aeto, peita'i e faigata fo'i le Pool lea ua milo atu ai mo le Hong Kong 7s, ma e le o mama fo'i le taumafaiga e puipuia le tulaga muamua lea e i ai i le taimi nei. O lo'o ua i ai le loto ma le fatu i le mea e tatau ona fai, USA, tatalo ma tapua'i mai mo matou."

E tolu aso o le a fa'atautaia ai uma ta'aloga o lenei ta'amilosaga mai le aso Faraile se'ia pa'ia le aso Sa ma ia tapua'ia o tatou faiva i malae Tama Samoa uma o lo'o ta'a'alo, mai le 'au a le Manu Samoa se'ia pa'ia le 'au a le USA lea fo'i e i ai nai o tatou fanau.

E le o mamao ese atu le to'afa i luga ae foliga mai afai ae manumalo Samoa ia Sikotilani, ua amata se'e mai fo'i Samoa i le laualuga o le fa'amoemoe.

Pool A lea e i ai Samoa, tulaga lua i le 7s a Las Vegas, ua fetaui ai fo'i iina ma South Africa lea sa manumalo i le Canada Sevens i Vancouver ia Mati 2019; Scotland ma Iapani. O i latou na e muamua lava le latou ta'aloga e tatala malae ai Samoa ma Sikotilani.

Pool B - Falani, Argentina, Canada ma Portugal, o le 'au fa'ata'ita'i. Pool C - Niu Sila, Fiti, Ausetalia ma Kenya. Pool D - USA, Egelani, Wales ma Spain. O le au lea a Spain lea o lo'o tula'i mai le latou ulua'i matati'a talu ona ta'a'alo mai, ona ua manumalo i latou i le All Blacks Sevens i le ta'amilosaga ta'ito'afitu a Vancouver ia Mati 2019.

Mafai ona e maimoaina le ta'amilosaga lenei o Lakapi Fitu i luga o le Uepesite @WorldRugby7s po'o le www.world.rugby/sevens.