AP - Na feita le vaega suesue a le malo o Syria ina ua taunuu atu i le vaega na pau i ai le vaalele mai Take sa latou tafanaina i lalo, toe lava o pulou ma seevae o alii pailate o loo taatitia mai ai, ae ua leai ni pailate ua sosola.

I ripoti na salalau fai mai ua matua malepe lava le tino o le vaalele, peitai ina ua taunuu alii suesue, e leai ni pailate o i ai. Na taua foi i le ripoti a le Hurriyet Daily fai mai, “Ua le maua fo’i ni palasuti, ae na o se’evae o tama ua maua!” O se fa’amatalaga lea a le Palemia Recep Tayyip Erdogan.

Fai mai Erdogan, “Ua le iloa e ia pe o le mea na muamua fa’aoso ese e pailate a la’ua nofoa mai le va’alele a’o le’i tulau’ele’ele i le mea na fana ma pa ai le va’a!” O le ituaiga va’atau ia a Take e fa’aigoaina o “Phantom,” ma o le latou saoasaoa e fa’aluaina le saoasaoa o le “leo.”

Fai mai le alii pailate ua litaea o Steve Ganyard, “Afai ua maua se’evae ma pulou, e le o se mea fou lea i le ituaiga va’alele sa fa’afoe e nei pailate, ona o le saoasaoa e malaga ai va’alele tau o le F-4Phantom, e pei lava e feto’ai le pailate ma se pa sima malosi pe a pa’u i le sami”

Fai mai foi Ganyard, “Tusa pe ua mae’a fa’aoso ese nofoa o ali’i pailate nei, e le taitai ona feola i la’ua aua e mafai ona matala ese se’evae ma pulou o i la’ua ona o le saoasaoa na’ua o le va’alele.

E le o tu’ua ai lava le sailiga lea, ua fa’aauau ona o le naunau o Take e sailia o latou pailate. E ese mai lea, ua i ai fo’i feutaga’iga fa’alemanuia ua mae’a feagai ai ma malo nei e lua. Ua mae’a tusi atu Take i le malo o Syria ma le Malo Aufa’atasi [UNO] ona ua fia malamalama i le mafuaga o le tafanaina fua o latou va’a e Syria, ma ua soli ai e Syria le aiaiga o tulafono tau le va fealoa’i a Malo Aufa’atasi.

“O le matou va’alele tau lea, e le o fa’aau’upegaina, ma o lo’o faia sana malaga su’esu’e, sa lele i le sone e fa’ataga mo atunu’u uma e feoa’i sa’oloto ai, ae fa’ate’ia pailate i le tapulu mai o i la’ua e Syria.

Peita’i, ae le’i fa’ao’o lea tusi i le UN ma Syria, sa fa’amatala mai e Syria, ua uia atu e le va’alele lea o Take le latou sone faasaina, ma ua okometi lava ona fa’aosofi ai latou osofa’iga. O se tala mai a Jihad Makdessi, o se sui o le Va i Fafo a le Malo o Syria, “Ua uia atu e lenei va’alele le sone sili ona fa’asa ona uia e so’o se va’alele mai isi malo a le latou malo, ma ua leai se isi mea e faia e le latou matagaluega, ae o le tafana loa i lalo.”

O le taimi nei, ua le toe mama nei le fa’amalosiga o tulafono ma lapata’iga i le va o nei malo e lua fa’atasi ai ma le NATO, ia fa’amalosia ai le nofo filemu ma tau sailia ai le tonu o lenei faalavelave, peita’i, o le tama o se tasi o nei pailate ua ia fa’ailoa i le vasega a le televise i Take, “E le tau faia se taua i se va’alele e tasi pe 50, pe faia fo’i se taua i se pailate e to’atasi ua oti, ae ona o au o le tagata ola fa’atuatua, ou te talitonu, e le oti se maturo!”

saunia: Leua Aiono Frost