Ads by Google Ads by Google

Solofua moliaga sa tuuaia ai Tuiulua’ai Fa’amausili

Ua talia e le Faamasinoga Maualuga le talosaga na faaulu e le malo o Amerika Samoa i le vaiaso nei, ina ia solofua moliaga mamafa na o latou tuuaia ai Tuilua’ai Fa’amausili.

 

O Fa’amausili na tuuaia e le malo i moliaga o le tuuina atu o siaki e le o i ai se tupe faapea ma le gaoi. Talu mai le masina o Iuni lea na faila ai e le malo lenei mataupu i luma o le faamasinoga, sa tumau pea le teena e Faamausili o ona moliaga, ma ua maea foi ona faatulaga lona faamasinoga autu mo le aso 9 o Aperila 2013.

 

O ni isi o mafuaaga na taua e le tamaitai loia ia Kimberly Hyde lea sa tulai mo le malo. ua mafua ai ona talosagaina le solofua o lenei mataupu, ona ua maea ona toe totogi e Faamausili se tupe e silia ma le $12,000 i le kamupani sa tagi i lenei mataupu, ma ua le toe manao foi le pule o le kamupani e toe faaauau lenei mataupu i luma o le faamasinoga.

 

E le gata foi i lea, ua maea ona tuuina atu e le ua molia sana tusi faatoese i le pule o le kamupani.

 

I le maea ai ona faailoa e le malo i le faamasinoga o le mafuaaga o le talosaga, sa talosagaina ai loa e le tamaitai loia ia Hyde le faamasinoga ina ia solofua le mataupu faasga ia Faamausili, ma aveese mai le kalena o mataupu ua sauni e tuuina atu e iloilo e tagata lautele.

 

Ao faagasolo le mataupu a le ua molia i luma o le faamasinoga talu mai le tausaga na tea nei seia oo mai i le vaiaso nei, sa tumau pea lona usitaia o poloaiga uma a le faamasinoga na tuuina atu ia te ia.

 

Na taua e le malo e faapea, o le mataupu lenei na tofu atu i le ofisa o leoleo, ona o se talosaga na faaulu e le alii o Nie Ming, o le pule a le K & K Corporation, i le masina o Tesema 2011, faasaga i le kamupani a le FTC Corporation lea e pulea e Tuilua’ai, ona o le tuuina atu o ni siaki se tolu i lana kamupani ae le o i ai se tupe i totonu o le teugatupe.

 

Na taua e faapea, sa faatau mai e le kamupani a le FTC Corporation ni mea fale mai le K & K ma le faamoemoe e uma ona toe totogi atu le tupe mo ia oloa.

 

O le solofua ai la e le faamasinoga o lenei mataupu, ua atagia mai ai le le faamaonia o moliaga mamafa sa tuuaia ai le ua molia i lenei mataupu.

 

O le afioga i le alii faamasino sili ia Michael Kruse na iloiloina lenei mataupu, ae o le alii loia fautua ia Fiti Sunia na tula’i mo le ua molia i lenei mataupu.