Ua talia e le Faamasinoga Maualuga le talosaga a le malo ina ia solofua moliaga na faasaga i ni alii se to’afa, ona ua i ai le faamoemoe i le malo e latou toe failaina lenei mataupu i luma o le Faamasinoga ma ona moliaga talafeagai.

O Peni Levi (21 tausaga), Lewis Lokeni (25 tausaga), Anthony Sioka (20 tausaga) ma Tavita Mariota (27 tausaga) na molia i le faia o uiga mataga faasaga i se tamaitai e 14 tausaga le matua.

Ae i le maea ai ona iloilo e le alii faamasino sili ia Michael Kruse ma ana faamasino lagolago le talosaga a le malo, na faia ai loa la latou faaiuga e solofua moliaga faasaga ia i latou nei.

O le mataupu lenei na tofu atu i le Ofisa o Leoleo i le tausaga na te’a nei, ina ua maitauina e se sui o le Aoga Tulagamuamua a Lupelele ni vaaiga le manuia e pei o ‘love bite’ i le ua o le tamaitai e 14 tausaga o lo o aafia.

Ina ua fesiligia e leoleo le tamaitai na aafia, na atagia mai ai e le toatasi le tagata o lo o aafia ai ae toafa e pei ona taua i faamaumauga a le faamasinoga.

O le alii o Lokeni lea o lo o tuuaia i faamaumauga a le faamasinoga, o ia na faia ‘love bite’ i le ua o le tamaitai na aafia ina ua maea ona la momoe i le aso 28 Aperila, 2012 i lona fale i Fagaima, ae ina ua fesiligia e leoleo Lokeni na ia taua ai e faapea, e le o lona fale na la momoe ai a’o tua o le faleoloa o Mose i Fagaima.

Na faailoa foi e le tamaitai na aafia i leoleo e faapea, ina ua maua e le faiaoga ‘love bite’ sa i lona ua, na pau lava le mea na oo atu i lona mafaufau o le pulea lea i lona ola.

O Levi o lo o tuuaia e le malo i lona faia o uiga mataga nei i le tamaitai na aafia ae faatoa 13 tausaga o lea tamaitai.

Na taua e le tamaitai lea i leoleo e faapea, o le aso 12 Aokuso 2011 ina ua la faatoa masani ma Levi, o le aso fo’i lea na la momoe ai, ma o ia le ulua’i alii na la momoe, lea fo’i na la toe momoe faalua i le masina o Oketopa 2011, peitai ina ua fesiligia e leoleo Levi, sa ia teena ai tuuaiga e faapea o ia na muamua momoe ma le tamaitai.

Fai mai Levi, sa faamatala atu e le tamaita’i ia te ia, e i ai le isi alii sa la momoe muamua. Na faailoa fo’i e Levi i leoleo, e na o le faatasi fo’i ona la momoe ma le tamaitai lea i totonu o se fale tuufua i Tafuna.

O Mariota na ulua’i fesiligia e leoleo e faatatau i le mataupu lenei, ina ua alia’e lona igoa i tuuaiga a le tamaitai na aafia, ma taua ai le faatele lea ona la momoe ma lea tamaitai.

Na taua e Mariota i leoleo e faapea, o le ulua’i taimi na la momoe ai ma le tamaitai lea, o se taimi o le sisiga fu’a o le tausaga 2012, ae o le isi taimi e faatolu ona la momoe i lona fale, ae ina ua fesiligia e leoleo le tamaitai na aafia sa ia taua ai e faapea, o le masina o Mati 2012 na la amata momoe mai ai ma Mariota.

Ae na taua e le alii o Sioka i leoleo ina ua fesiligia o ia e faapea, e le’i talitonu lana vaai i le laititi tele o le tamaitai lenei i le ulua’i taimi na la feiloa’i ai, peitai e ui i lona laititi, ae sa ia manatu o lea ua maua lona avanoa e mafuta ai ma ia.

Na faamaonia e Sioka i leoleo sa la momoe ma le tamaitai na aafia i le va o le masina o Aokuso ma Oketopa 2011, ma pe tusa foi ma le faatolu ona la momoe ma lea tamaitai.