Solofua moliaga o le gaoi iPod fa’asaga i leoleo to’alua

O ananafi na talia ai e le fa’amasinoga maualuga se talosaga na faaulu e le loia na tula’i mo le malo, ina ia solofua moliaga na latou ulua’i tuuaia ai ni leoleo se to’alua fa’asaga i iPod sa ave fa’agaoi, ina ua le mafai e le malo ona saili molimau e lagolago ai tuuaiga faasaga i ia leoleo.

 

I le talosaga na faila e le tamaitai loia ia Stiffany Oldfield i le mataupu faasaga ia Seloti Talia ma Siufa’alele Sai, na taua ai e le malo e faapea, talu ai le tele o faamatalaga fou ua alia’e mai faasaga i lenei mataupu, ua manatu ai loa le malo ina ia solofua moliaga faasaga ia i laua nei.

 

Na taua e Oldfield i lana talosaga e faapea, o molimau a le malo o lo o fuafua e tuuina atu i le aso e faia ai le faamasinoga autu o lenei mataupu, e ono le mafai ona fesoasoani i le lagolagoina o moliaga a le malo faasaga ia i laua nei.

 

E le i fa’atuiese loia sa tula’i mo Sai ma Talia, le tamaitai loia ia Sharron Rancourt ma Fiti Sunia, ina ua fesiligia i laua e le alii faamasino sili lagolago ia Lyle L. Richmond e faatatau i le talosaga a le malo, e solofua ai moliaga faasaga ia i laua molia.

 

O Talia na molia e le malo i moliaga mamafa e tolu, e aofia ai le gaoi, ave faagaoi o ni mea totino sa tuuina atu i lalo o lana vaavaaia, atoa ai ma le moliaga o lona faaleagaina lea o mea molimau a le malo, ae o Sai na molia i moliaga mamafa e lua, lea e aofia ai lona ave faagaoi o ni meatotino sa tuuina atu i lalo o lana vaavaaiga faapea ai ma lona faaleagaina o mea molimau a le malo.

 

O moliaga faasaga ia Talia ma Sai na afua mai i le mataupu lea na ave faagaoi ai e ni tamaitai se to’alua ni iPod mai le faleoloa o le ACE Hardware ia Novema, 2010.

 

I faamaumauga a le faamasinoga o lo o taua ai e faapea, o iPod e lua na tuuaia e le malo ia Talia ma Sai na la ave faagaoi, sa gaoi mai e ni tamaitai talavou se to’alua mai le faleoloa o le ACE.

 

I faamaumauga a le faamasinoga sa taua ai e faapea, o le tamaitai o Rocshane Siaki ma lana uo o Catherine Michaels na o i le ACE e faatau, ae gaoi mai ai e Siaki iPod e lua i le masina o Novema 2010, mulimuli ane na la toe faafo’i i leoleo ina ua suesueina e leoleo lenei mataupu, ma tofia ai loa e le alii Ta’ita’i Leoleo ia Sgt. Solova’a Mageo ia Talia ma Sai la te taulimaina lenei mataupu.

 

Ina ua tuuina atu e Sgt. Mageo le iPod e taua o le ‘Namo iPod’ ia Talia mo le faatumuina o pepa e manaomia mo le mataupu ma tuuina atu i le iPod i totonu o le potu e teu ai mea molimau a le malo ina ia malupuipuia ai, sa le i faatinoina e le alii leoleo ia Talia tulaga uma e pei ona faatonuina ai o ia e lona ta’ita’i leoleo.

 

Ina ua fesiligia e le alii leoleo suesue ia Det. Vaina Vaofanua ia Talia e tusa ai o lenei mataupu, sa faamaonia ai e Talia ia Vaina lona taulimaina o se iPod mai lona ta’ita’i leoleo, ona alu lea ma ia le iPod i le latou fale e aunoa ma se ripoti na saunia e pei ona faatonuina ai o ia.

 

Ae ina ua fesiligia e Vaina le tamaitai leoleo ia Sai e uiga i lenei mataupu, sa ia faamaonia ai le tuuina atu e lona ta’ita’i leoleo o se iPod ia te ia, le ituaiga o le ‘blue iPod shuffle’, ona ia teuina lea i totonu o lana loka i totonu o le ofisa o leoleo i Tafuna, peita’i na talepe e se tagata lana loka ae aveese le iPod sa i ai.

 

O afioga i alii faamasino lagolago ia Mamea Sala Jr ma Muasau Tasina Tofili na lagolagosua ia Richmond i le tuuina mai o lenei faaiuga.

Comment Here