Ads by Google Ads by Google

SOLOFUA MOLIAGA FA’ASAGA I SE FAFINE MAI SAINA

O le fafine mai Saina lea na tu’uaia e le malo i lona totogi tupe o se tagata faigaluega a le Ofisa o Femalagaaiga, ina ia faa faigofie ai ona maua ID nofomau a ni isi tama’ita’i mai Saina se to’alua, ua solofua e le fa’amasinoga maualuga i le vaiaso nei, ina ua talia e le ali’i faamasino ia Elvis P. Patea se talosaga na fa’aulu e le itu a le malo, e solofua ai le moliaga e tasi sa faia faasaga i le fafine Saina sa molia, ina ua le mafai e le malo ona fa’aauau lenei mataupu i luma o le fa’amasinoga.

 

O Jin Hua Sullivan na molia i le moliaga mamafa o lona ofoina atu lea o ni taui tupe i se tagata faigaluega a le malo, ma sa molia faatasi i laua ma se alii faigaluega sinia a le Ofisa o Femalagaaiga, le susuga ia Savea Polone, lea o lo o molia i moliaga mamafa e lua o le faia lea o faamaumauga tau faasese, atoa ai ma le moliaga mamafa e tasi o le faaaoga lea o lona tulaga o se tagata faigaluega a le malo na te maua ai ni taui i ni auala fa’a alatua.

 

Na taua e le loia a le malo ia Camille Phillipe sa failaina lenei talosaga i le faamasinoga e faapea, ua mafua ona talosaga le malo e solofua lenei mataupu, ina ua malaga i fafo le molimau autu o lenei mataupu, ma ua le mafai e le malo ona toe maua se fesootaiga ma le molimau.

 

E tusa ai ma faamaumauga a le faamasinoga o lo o taua ai e faapea, o le mataupu lenei na suesueina e le Ofisa o le Loia Sili a le malo i le masina o Aokuso 2011, ina ua alia’e se mataupu faasaga i ni ID sa tuuina atu i ni tamaitai Saina se to’alua, ae o ia ID ua maea ona tuuina atu i ni isi o tagata mai fafo.

 

Na maua i faamaumauga a le Ofisa o Femalagaaiga, o ID sa tuuina atu ia Hulying Guo ma Meinu Nie, o ni tagatanuu o le malo o Saina, o lo o manino i faamaumauga a le Ofisa ua uma ona tuuina atu numera o ID nei i isi fo’i tagata mai fafo.

 

E tusa ai o faamaumauga a le faamasinoga, o le aso 11 Setema 2011 na tuua ai e Nie ma Guo le teritori ae malaga atu i Samoa, ona la toe ulufale mai fo’i lea i le teritori i le aso lava lea, i lalo o le igoa o le la sponsor o Liumanu Seuma’ala.

 

Ina ua fesiligia e le ali’i su’esu’e le sponsor e faatatau i lenei mataupu, na taua ai e Seuma’ala e faapea, sa ia faia lenei mea mo le ua molia, o Jin Hua Sullivan.

 

O Sullinvan e nofo mautotogi i le fanua ma le fale o Seuma’ala e pei ona taua i fa’amaumauga a le fa’amasinoga.

 

Na pau le itu na faamanino e le sponsor i le ali’i su’esu’e, na pau lana vaega sa fai o lona sponsor ina lea o tamaitai Saina e to’alua, ae na te le iloaina pe na faapefea ona vave maua ID nofomau a i laua nei.

 

O lo o tuuaia e faapea, ina ua faalogo le sponsor o le aso 14 Setema 2011 e toe malaga ese atu ai tamaitai Saina nei ma le teritori, sa ia faatonuina ai loa se Supavaisa o le Ofisa o Femalagaaiga i le malae vaalele, ina ia taofi ID o lo o malaga ai tamaitai ia e toalua.

 

Ina ua fesiligia po o fea ua ave i ai ID, na tali le sponsor ua maea ona ia tuuina atu i le vaega o lo o su’esu’eina lenei mataupu.

 

I faamaumauga a le faamasinoga, o le masina o Me 2011 na faila ai e le sponsor lana talosaga mo ni pemita e ulufale mai ai tama’ita’i Saina ia e to’alua i le teritori.

 

Ina ua fesiligia Sullivan e tusa ai o lenei mataupu, sa ia faamaonia ai i le ali’i su’esu’e e faapea, o ia e mautotogi i le fale o Seuma’ala, o le mafuaaga lena na talosaga atu ai Yanxiong Li ia te ia, mo se avanoa e talosaga ai ia Seuma’ala pe mafai ona ia talosagaina ni pemita e malaga mai ai Guo ma Nie i le teritori.

 

Na tuu atu e Sullivan kopi o tusi folau, ata o tamaitai Saina ma le $80 mo pemita ma tuu atu ia Seuma’ala, mulimuli ane tuu atu e Seuma’ala pemita e lua ia Sullivan mo tamaitai Saina e to’alua.

 

Na teena e Sullivan tuuaiga sa ia tuuina atu se taui tupe ia Polone mo ID o tamaitai Saina e toalua, ona e le masani o ia ia Polone.

 

Fai mai le malo, na musu Sullivan e avatu Nie ma Guo i le Ofisa o Femalagaaiga mo le pu’eina o la ID, ae ina ua fesiligia e le ali’i su’esu’e ia Polone e tusa ai o lenei mataupu, sa ia ioeina ai le tuuina atu e Sullivan o se $200 ia te ia, o ia fo’i lea na o atu ma tamaitai Saina mo le pu’eina o la ID.

 

O le masina o Ianuari 2014 lea ua faatulaga e amata iloilo ai e se vaega iloilo iuga le mataupu a Savea.