E ala i tusitusiga feso’ota’i ma tagata Samoa i Anchorage Alaska, ua manino mai ai le auai o nisi o tagata Samoa i lea a’ai i solo tete’e e fa’asaga i le Vaega o Leoleo ona ua mafua ai ona maliu se tasi o alo o le atunu’u, Tasi Fatu mai Nu’uuli, Amerika Samoa.

O se tala mai le solo tete’e ma se isi fonotele o le a faia i le va o le Pulenu’u ma lana taupulega fa’apea ma isi sui o le Matagaluega o Leoleo i Anchorage ua fa’ailoa mai e se tasi o alo o le atunu’u e fa’apea,

“Fa’afetai tatalo, fa’afetai fa’amalosi’au mai ia i matou uma i’inei ina ia malosi le loto ma galulue ina ia amana’ia nai o tatou tagata ma latou aia tatau a’o nonofo ai i lenei setete. Ua i ai le avanoa matagofie e toe feso’ota’i ai ma feutaga’i fo’i ma le Pulenu’u ma isi sui o lenei a’ai i le Faletusi tele o Loussac i le itula e 5:oo i le afiafi o Iulai 17, 2012. Toe maua atu se isi soso’oga o lea fonotaga ma ona fa’ai’uga. Alolofa atu uma i matou i Anchorage mo matou aiga i Samoa.” Kaneyo Hirate Mahe.

Peita’i o le solo tete’e i le fa’ai’uga o le vaiaso na te’a, e pei ona fa’ailoa mai a le abn.com sa iloga ona faliu lagona o’otia o tagata uma ua auai, ona ua fa’ao’o le oti ia Shane Tasi e na’o le 26 tausaga le matua, ae o le la’au sa i lona lima i le faalavelave na tupu i le aso 9 Iulai, ma le ali’i o Harry Smith e 59 tausaga le matua na ia iloiloina se fana ituaiga o le BB ia Iulai 1, 2012. Peita’i, ua mae’a nei le su’esu’ega a leoleo i le fa’alavelave na fasiotia ai Tasi ua le sala le leoleo sa ia fanaina o ia, ae o lo’o fa’aauau le su’esu’ega o le leoleo na fasiotia Smith.

Ua mae’a fo’i ona feiloa’i le vasega o ta’ita’i o le Sosaiete a Tagata Polenisia ma le vasega o Leoleo i le aso Faraile talu ai, ua mae’a fa’ailoa fo’i ia i latou le afuaga o lenei solo tete’e filemu o le a latou faia o se fa’ailo o latou lagona fa’alauaitele e tusa ai o fa’afitauli ua alia’i mai e ao ina suia i le tulafono mo le “tafana ia fasiotia” o tagata e leoleo i taimi e lamatia ai le ola o se leoleo.

O le ta’ita’i leoleo Mark Mew ma le Pulenu’u o Anchorage, Dan Sullivan, sa la’ua fa’aalia mai ni o la manatu e tusa o nei mea ua talosagaina e Tagata Polenisia, “E le mafai ona taofia le fa’aaogaina o auupega malosi e leoleo pe afai o le a lamatia o latou ola i taimi o fa’alavelave matuia, peita’i, e le te’ena e i latou feutaga’iga e ao ina faia i le va o tagata lautele ma le Ofisa o Leoleo ina ia mataituina le nofo saogalemu ma le filemu o tagata uma i le a’ai.”

O le afuaga la lea, ua sau soli ai le Sosaiete a tagata Polenisia e sapaia le mau ua latou manatu e ao ina fa’alaua’itele le fa’amamafaina, ia fa’ailoa i le Iunaite Setete atoa, e ao ina fa’asa’o lea faiga ua alia’i mai o le a fiafia pea Leoleo e fai.

“E matou te mana’omia ona lagona mai e le Malo tele o matou fa’alagona o’otia ma le tiga!” “Fai se so’otaga!” E ao ina toe va’ai toto’a i le tulafono, ma ia faia se suiga taolafeagai mo le tausiga o le filemu moni.

O se tasi o manatu na fa’aalia, sa tatau i le ali’i Leoleo na fanaina Tasi ona fa’aaoga se spray e fana ai mata o Tasi, ae le o le fana ia oti i le taimi lava lea, aua o lo’o ia savali mai ma le la’au, ae le o se fana!

O le tama’ita’i Samoa Miriama Aumavae, o le Fa’atonu o le Asosi a tagata Polenisia i Anchorage na fa’aalia sona taofi, o le latou latou solo tete’e, o se ala lea e amata mea i le feutaga’iga o le a fa’aauau pea mo le aia a tagata uma i le ola filemu ma le saogalemu i le a’ai o Anchorage Alaska.

“O le vaega e fa’amalosia le tulafono e ao ina mua’i mataituina nisi o mea ua lape i le fa’atinoina e ali’i leoleo o latou tiute, e le taitai ona tu’umamaina le mataupu lenei, e ao lava ina lagona o matou leo e le Malo tele o le Iunaite Setete ia fa’asa’o mai lea mea!”

O le tama’ita’i o Marilyn Stewart Richardson, fa’atonu o le Ofisa o Aia Tutusa sa ia feutaga’i ma le Asosi a Tagata Polenisia sa solo tete’e, ona o lo’o malaga le ali’i Pulenu’u o Anchorage i Hawaii e faia ai lona fa’atautoga mo lona ofisa i le vaiaso na te’a.

“E ui in ua mae’a feutaga’i, fesiligia so matou i o matou taofi e tusa o aia a tagata lautele mo lo latou saogalemu, ae ua talia fo’i e i matou, e fa’aalia omiga o le galuega i le vasega o leoleo, pe afai e lamatia o latou ola i tulaga o misa ma fevaevaea’iga. Atonu e le talafeagai nei tali ma lagona o tagata uma, peita’i, ua i ai se amataga o ni feso’ota’iga i le va ai o leoleo ma le mamalu lautele ua o’o i ai pagatia ona ua maliliu a latou pelega i lenei fa’alavelave.” O se saunoaga lea a le Stewart Richardson i fesili a tusitala o lea a’ai.

Na saunoa lava lea tama’ita’i e avea ma sui o le Pulenu’u Sullivan, sa ia fa’ailoa ane ai i sui o le Asosi a Tagata Polenisia. “E taua tele i le ali’i Pulenu’u le saogalemu o le a’ai atoa lenei ae maise i tagata o lo’o soifua uma ai.”

Peita’i o se tasi o sui e matua iloga ana galuega tima’i mo tagata lautele i Anchorage sa ia fa’apea ane, “E leai ana taua ia Sullivan le ola o tagata o lo’o a’afia i le fa’alavelave fa’atasi ai ma le saogalemu o le a’ai atoa, e le tu’ua e ia le tatou a’ai  ae malaga e fa’atauto lona tofi o Honolulu, aisea ua le fa’atauto ai i’inei?”

“O le mea mautinoa lava e le mana’omia ona tutu fa’atasi tagata uma e puipuia le mamalu lautele mai le pule saua a Leoleo, ua fana lava i le oti tagata i taimi e tau fa’afo’ia ai ni fa’afitauli, e le tatau ai ona fa’aaoga auupega malosi. Ua le toe vaoia lava leoleo latou i lo latou fasiotia o tagata i so’o se taimi ai e lu’ia ai o latou olaga faigaluega.”

O le pese na usu e le mamalu o le au solo tete’e a tagata polenisia o le “We are the world” ma faia lava le latou solo e aga’i mai le magafa i Elmore ma Tudor, ae ua iloga fo’i le sapaia o i latou e tagata feoa’i i le ala tele i lo latou fa’ae’e o pu o latou ta’avale i taimi e o’o ane ai i lea nofoaga.

“O se taumafaiga na iloga ua amana’ia mai e le setete, ma ua toe fa’atulaga ai se fonotaga lea i le faletusi o Lussac ina ia toe soalaupule ai se fa’ai’uga lelei, e taliagofie e loto o tagata lautele o Anchorage, aua o lea ua fa’ailoa mai, ua talafeagai ona fa’ao’o le oti i le alo o Amerika Samoa, ona ua iloga mai, ua lamatia le saogalemu o le leoleo i lea lava taimi.” O se talamai lea a Hirate Mahe.