O se tasi o fautuaga fa’a tama matua na tu’uina atu e le afioga i le ali’i Senatoa ia Soliai T. Fuimaono i le Komesina o Leoleo, ina ua fesiligia ma iloilo e le Komiti Soofaatasia le Fono le Paketi a le Ofisa o Leoleo i le vaiaso na te’a mei, o le tatau lea ona a’oa’o leoleo talavou ia iloa ‘ava ma fa’aaloalo i tagata matutua o le atunu’u.

Saunoa Soliai e fa’apea, o le isi lea fa’afitauli o lo o maitauina pea i ni isi o leoleo talavou i taimi e fa’atino ai a latou tiute i luga o le alatele, e leai se va fealoa’i ma tagata matutua o le atunu’u.

“O isi taimi na ona taofi lava e le leoleo talavou o le ta’avale a le tagata matua, alu atu loa ma le fa’atonuga malosi, o fea lou laisene, aumai lou laisene, e aunoa ma le fa’aaoga o le gagana fa’aaloalo e feso’ota’i ai ma le atunu’u,” o le saunoaga lea a Soliai.

Na fa’ailoa e Soliai ia Save Liuato Tuitele e faapea, o lana fautuaga fo’i lea sa tu’uina atu i le Komesina o Leoleo ua mavae atu ia William Haleck na fa’atoa mavae atu nei, o lona fautuaina lea o leoleo talavou ina ia iloa fesootai i le atunu’u i le gagana fa’aaloalo.

“E taua tele le a’oa’o o leoleo talavou nei ia iloa fa’aaloalo i tagata matutua, ona o i latou o lo o fai ma vaaiga o le atunu’u i so o se taimi, o i latou e sulu atu i ai le atunu’u pe a mafatia, ae afai e sulu atu ae o uiga nei e fa’aali mai, ona le iloa loa lea e le atunu’u po o ai o le a sulu i ai,” o le fautuaga lea a Soliai.

Saunoa le afioga i le ali’i Komesina ia Save e fa’apea, e le o mapu le taulogologo a le matagaluega o leoleo faapea ai ta’ita’i, i leoleo talavou i so o se taimi ina ia tautuana le va fealoa’i ma le atunu’u.

“E tatau lava ona fa’aaloalo leoleo i le atunu’u, e le o utuva fo’i le faufautua i ai o Ta’ita’i Leoleo i leoleo talavou ma fanau a le atunu’u fa’atoa aga’i atu i le galuega, ina ia fa’aaoga le gagana fa’aaloalo e feso’ota’i ai ma le atunu’u,” o le saunoaga lea a Save.

Na fa’afetaia e Soliai ma Galea’i M. Tuufuli le matagaluega o leoleo e tusa ai o le latou tautua i soo se taimi i le atunu’u.

Saunoa Galea’i e fa’apea, afai e fa’atusatusa le to’atele ua i ai le atunu’u ma le aofa’i o leoleo a le malo, e le taitai gafatia e leoleo ona tausi ma puipui le saogalemu o tagata, ae to lona pulou i le matagaluega ona o le tele o galuega lelei ua mafai ona fa’atinoina mo le atunu’u.

O se tasi o mataupu na fesiligia e le Komiti Soofaatasi a le Fono, o le mafua’aga ua tapuni ai le Lala o le Ofisa a Leoleo i Fagaitua.

Saunoa Legae’e Palepoi Mauga e fa’apea, afai ae tula’i mai se fa’alavelave i le Falelima i Sasa’e, ae alu atu le ta’avale leoleo i Fagatogo, e taunu’u atu le ta’avale a leoleo i Sasa’e ua tuai, ua maliu se tagata, ae afai e fa’aauau pea ona tatala le ofisa o leoleo i Fagaitua, e faigofie ma vave le tautua a le matagaluega mo le Falelima i Sasa’e.

Na faamanino e Save le mafua’aga na ala ai ona tapunia le ofisa o Leoleo i Fagaitua, ona o ni isi o vaega sa moomia le fa’aleleia, peita’i o le taimi nei, ua mae’a ona toe tatala le ofisa i Fagaitua, o lea fo’i ua toe amataina lea auaunaga taua mo le atunu’u.

Na fautua Tuiasina S. Esera i le alii komesina o leoleo, ina ia silasila toto’a i totogi o nai leoleo o lo o fa’atinoina le galuega faigata, ina ia faaopoopo.

Saunoa Tuiasina e fa’apea, manaia ae amata atu i le ta’i $25,000 totogi o leoleo i le tausaga, nai lo le ta’i $10,000 o lo o i ai i le taimi nei.