Ads by Google Ads by Google

Sola Samoa ma le Ipu a le Kovana i Fusuaga Fa’avaomalo

I le fa’ai’uga o fusu’aga fa’apitoa o le Ta’amilsaga Fusu mo le Sisigafu’a 2014 sa faia i le afiafi o le aso Lulu na te’a nei i le Fale Ta’alo o Samoana i Utulei, na se’ia ai le Ipu o Fusu’aga Fa’a-Amateur i le va o Samoa na Lua, e le aufusu mai le Malo Tuto’atasi o Samoa.

 

O le ala lea o le se’ia o lea Ipu Fa’avaomalo e Samoa ina ua mae’a nei fusu’aga. Peita’i, i le vaega o fusu’aga sa fusu ai nisi fa’apolofesa, sa mua’i fetaui ai Poutoa Faleseu mai Samoa ma le ali’i talavou o Henry Tupai mai Faleniu, Amerika Samoa. Na togi le solo a le ali’i o Poutoa i le ta’amilosaga lua, ma ua faia’ina ai  i lea fetauiga, ae manumalo Henry o Amerika Samoa.

 

I le paga lona lua fa’apolofesa sa tula’i mai ai le ‘auro a Amerika Samoa Alapati A’asa e fetaui ma Opetaia Tui mai Samoa. I le taimi a’o le’i fetaui i la’ua nei i le aso Lulu na te’a nei, sa tula’i mai A’asa e fa fusu’aga fa’apolofesa 4 fo’i manumalo, ae leai se faia’ina.

 

O lea fusu’aga sa iloga lava le malosi tele o A’asa i lona fa’afetauia o Opetaia, ma e tau le maua se avanoa e ‘aiga ai se so’a po’o se tu’i a Opetaia ia A’asa. Na i’u ina taofia le fusu’aga e le Laufali o lea fusu’aga, ma fa’ailoa ai ua KO le ali’i o Opetaia i le ta’amilosaga muamua lava.

 

Ona maua ai lea o le i’uga o fusu’aga fa’apolofesa i lea po, e lua lava manumalo o Amerika Samoa i le leai a Samoa.

 

O paga ta'itasi sa fa'atautaia i lea po ua aofia ai:

 

Keach Tanoa sa fusu ma Jensen Poutoa o Samoa, i le paga e 131-135 pauna le mamafa, va'aia lava le sesela o le to'alua, ae na mae'a lea fusu'aga, auau fa'atasi fa'amasino tu'uina le manumalo ia Jensen Poutoa o Samoa.

 

Paga lona lua o Kelepi Fata o Amerika Samoa sa fetaui ma Sui Palauni o o Samoa, i le la'ua paga e 141-147 pauna le mamafa, na mae'a lelei le tolu ta'amilosaga o lea fusu'aga, ma na auau fa'atasi fa'amasino e tu'uina le manumalo ia Kelepi Fata.

 

O le fetauiga i le va o Sinapapa Leao o Amerika Samoa ma Henry Tyrell o Samoa i le la'ua paga e 155-160 pauna le mamafa, na eseese f'a'amasino ae tu'uina atu le manumalo ia Henry Tyrell.

 

O le paga  e 169-175 pauna le mamafa sa fusu ai George Tanoa mai Amerika Samoa ma Petelo Matagi mai Samoa, o le isi fo'i lea paga sa eseese fa'amasino ma ua tu'uina atu le malo ia Petelo Matagi o Samoa.

 

O le vaega o Heavy Weidgt e lua paga sa fusu ai, ma o le fetauiga i le va o Ofisa Talimalo ma Ioane Paulo o Samoa sa matua faigata le i'uga a fa'amasino, eseese fo'i fa'aiuga, ae na ave le manumalo e Ioane Paulo mai Samoa.

 

O le fetauiga mata'ina sa tatau ona maimoaina i lea po o le fusu'aga lea a Robert Toilolo ma Filimaua Hala mai Samoa, sa fa'ailoa mai e le'i o'o ane Robert Toilolo o Amerika Samoa, ma ua lafo ai le manumalo ia Hala o Samoa.

 

O le tama pi'i super heavy a Amerika Samoa o Riley Tuala sa fetaui ma Paddy Jr Leui'i mai Samoa, sa umi se taimi o tau fa'amasino po'o ai a mauaina le manumalo, ae ui lava ina la'ititi Riley, ae matua fai lava le loto o lea alo o Amerika Samoa. Uma lelei ta'amilosaga ae tu'uina le malo ia Leui'i mai Samoa.

 

O le fetauiga mata'ina sa fa'afiafiaina ai le to'atele ae peita'i, sa fa'aletonu le tau'au o le tama'ita'i o Onolina Viliamu o Amerika Samoa ina ua lavea tonu se uaua i le tui masau a Fan Atina'e mai Samoa. Na le toe gafatia ai loa ona fa'aauau e ia le fusu'aga, taofia i le fa'ai'uga a le laufali lea fusu'aga i lona ta'amilosaga muamua lava.