Ads by Google Ads by Google

Sola Nuuuli ma le siamupini ta’amilosaga ta’ito’a 7 Mosooi

Ua faapaleina nei le au ta’ito’a 7 mai le afioaga o Nuuuli i le siamupini, ina ua sola ma le Ipu autu atoa ai ma le faailoga tupe o le taamilosaga ta’ito’a 7 o le Mosooi o lenei tausaga, ina ua faiaina ai le au malosi mai Fagatogo, i le la taaloga finau i le aso To’ona’i na te’a nei.

O se ta’aloga mataina ma le finauina na molimauina e le toatele o le atunuu na lolofi atu e maimoa, aemaise au tapuaiga mai afioaga e lua na faatumuina ai le malae o le Veterans Stadium i Tafuna.

Na taunuu moemitiga o le au a Fagatogo i le toe fia puipui lea o lona tulaga siamupini mai le tausaga na te’a nei, ina ua mafai ona oo i le sailiga o le Ipu autu, peitai i le taimi atoa o le taaloga, sa finau mai foi Nuuuli i lona fia maua o le manumalo, ma finau ai le taaloga seia oo lava i toe minute o le afa mulimuli, o lo o sili pea ai a Nuuuli i le 5-0, lea lava na maea le taimi o tumau ai pea ai ia o le ta’aloga.

E le o i ai lava se au ua sosoo ni tausaga o ia umia le tulaga siamupini i le taamilosaga taitoa 7 lenei a le Mosooi i tausaga taitasi.

O le tausaga e 2010 na siamupini ai le Aeto ina ua manumalo i le Utusi’a Knight i le sailiga o le Ipu autu i ai e 8-5, o le tausaga 2011 na siamupini ai Fagatogo ina ua manumalo ia Leone i le sailiga o le Ipu autu i ‘ai e 12-5, peitai o le tausaga lenei, ua siamupini ai Nuuuli.

I le vaega o au a tamaitai, na sola nei le au malosi mai Vaiala ma le siamupini o lenei tausaga, ina ua manumalo i i le au a Moata’a i se taaloga finau, ina ua le faamanuiaina au a tamaitai a Amerika Samoa nei.

E ui i le tulaga le manuia o taumafaiga a au a tamaitai a le atunuu, peitai na taua e se sui o le Iuni Lakapi a Amerika Samoa (ASRU), afioga Peseta Sa Mavaega le tulaga mataina ma le maualuga sa i ai le faatinoina e tamaitai o le atunuu o le taaloga.

Pe a faatusatusa i le tulaga o lo o faagasolo ai pea taaloga lakapi a tamaitai i Samoa ma le tulaga i le leai lea oni taamilosaga mo tamaitai i Amerika Samoa nei, na saunoa ai Peseta, sa mataina le faatinoina e au a nai a tatou tamaitai o le polo, malamalama i tulafono toe maua foi le malosi e faatino ai le taaloga.

E leai ni au a alii mai Samoa na malaga mai mo le taamilosaga a le Mosooi, sei vagana ai au e lua a tamaitai, lea ua faamoemoe e toe fo’i atu i Samoa i le aso Tofi o le vaiaso nei, i le malaga a le Lady Naomi.

I isi faailoga ua siamupini ai le au malosi mai Laulii i le Ipu mafolafola (plate), ina ua manumalo ia Lalomalava i le la taaloga finau, ae o Fagaalu ua sola ma le Ipu faaofuofu (bowl)

O le tausaga na te’a nei na siamupini ai le au a Marist i le plate, ae o Lalomalava i le bowl, peitai o lea ua suia uma foi au e umia faailoga nei i lenei tausaga.

O faailoga tupe na tapenaina uma e le ASRU, i lalo o le taitaiga a le afioga i le alii peresetene o le Iuni, le afioga Te’o J. Fuavai ma lana taupulega.

E tusa ai o se pepa o faamatalaga sa tuina mai i le Iuni Lakapi, o le isi gaioiga lea o le a soso’o nei i le kalena a le Iuni, o le auina atu lea o lana au e i lalo o le 19 tausaga le matutua, e tausinio i le taamilosaga e tama e i lalo o le 19 tausaga le matutua a le Pasefika, lea o le a talimalo ai Samoa i le masina fou.

O lenei taamilosaga o lo o faatautaia lea e le Vaega e Pulea Lakapi i le Pasefika, le Federation of Oceania Rugby Unions (FORU), o se lala lea o le IRB lea o lo o avea ai Amerika Samoa ma totino tumau