Na faai’u puta le tau sailiina o fagupia ma le pepa sikaleti a se alii ‘ona e 32 tausaga le matua i le po o le aso Tofi na te’a nei i Aoloau, ina ua faasaga ane se tamaititi e 15 tausaga ma osofa’i o ia i se agaese ma manu’a ai lona lima, e pei ona tuuaia ai le ua molia i faamaumauga a le Faamasinoga.

O lea faalavelave ua tuuaia ai e le malo le alii talavou e 15 tausaga i le moliaga mamafa o le faaoolima i le tulaga lua, o se solitulafono e mafai ona faasala ai se tasi i le toese mo le umi e le mafai ona sili atu i le 5 tausaga, pe faasala foi i le salatupe e le sili atu i le $5,000, poo le faasala foi i faasalaga uma ia e lua.

I faamaumauga a le faamasinoga o lo o taua ai e faapea, o le alii na lavea sa inupia ma le isi alii o le nuu i le afiafi na tulai mai ai le faalavelave, e lei umi ona amata le evaga ae pisi loa le alii na lavea e tau saili ana fagupia e lua ma lana pepa silaketi.

Na faaiu le su’eina o fagupia ma le pepa a le alii na lavea i luma o se tuugamau i luma o le fale a le isi aiga, lea o lo o nofonofo mai ai ni tamaiti i luga o le tuugamau.

Na taua e le isi molimau i leoleo e faapea, e lei umi ona alu le alii na lavea e su’e ana fagupia ae vaai atu o lo o tauupu mai ma le alii ua molia i luma, e lei ae vaaia e le molimau le alii na lavea ua toe fo’i atu i le nofoaga o lo o faia ai le la inugapia, ae ua alu foi le alii ua molia i lo latou fale.

Na te’i le molimau ina ua ia vaaia le ua molia o lo o uu atu se sapelu i lona lima, ma ia taumafai ai loa e ta le alii na manu’a.

Fai mai le molimau, o lana vaai i le taimi lea, na taula’i le ta a le ua molia i le vaega pito i luga o le tino o le alii na lavea, ae o le vave o lana gaioi na mafai ai ona ia una’i ese le ua molia. Sa ia taua foi e faapea, ana le i ai i le taimi na tupu le faalavelave e i ai lona talitonuga e oti le alii na lavea.

Na agai atu leoleo ma aumai le ua molia faatasi ai ma lona tina i le ofisa mo le faatalatalanoaina o lenei mataupu.

Na taua e le ua molia i leoleo e faapea, o ia sa eva ma isi ona tausoga e toatolu i le po lea ina ua maea le Bingo sa fai, ona latou savavali lea i le fale ma faaiu ai loa le latou evaga i le latou nofonofoga sa fai i luga o le tuugamau e i luma o le latou fale.

E lei umi ae o uma ona tausoga i le fale ae nofonofo ai lava na o ia i luga o le tuugamau, e lei umi ae ona vaaia loa se tagata ‘ona o alu atu ia te ia, pe na ia gaoia ana fagupia ma lana pepa sikaleti ae sa ia tali i ai na te le iloaina se mea.

Na taua e le ua molia, e tiga lava ona fai atu i le alii ‘ona na te le iloa se mea ae sa fesili atu lava, ee atu ia te ia ma i’u lava i le palauvale atu ia te ia, peitai sa fai i ai e sili loa le alu i le fale leaga ua ona lona ‘ona, ae sa toe palauvale atu foi le alii ‘ona ia te ia.

Sa ia taua foi i leoleo e faapea, o lona ita tele i le alu atu o le alii lea ma laulauvavale i luma o le latou fale, na mafua ai loa ona alu i ai ma le sapelu ma ia taina ai lona lima, ae o lona uso ma lona tausoga na tosoeseina o ia.

Na fesili leoleo i le ua molia pe sa ia fuafua e matua osofa’i le alii na lavea, ae na ia tali, e na o le lima lava o le alii na manu’a na manatu e ta, e faatasi foi ona ia taina o ia.