E silia ma le to’a 50 fanau mai a’oga maualuluga, ua mae’a ulufale i le avanoa na sailia mai e le AS Area Health Education Center a le ASCC -Nursing Program, lea sa fa’afaigaluega ai le tama’ita’i o Saili Samoa, e na te tima’ia nisi o fanau a’oga ia fa’aosofia lo latou naunau e amata fa’aa’oa’o i le tausiga o tagata fa’agasegasea i falema’i, peita’i, ua latou fa’aaogaina le Hope House i Fatuoaiga mo le latou polokalama lea.

“O se avanoa ua ou maua, ou te alu atu ai i a’oga maualuluga i le tatou teritori ma fa’amatala i fanau le aoga o le avea o le Tausima’i ma sau galuega tumau. O se galuega e faia i le alofa, ma e aoga tele mo i latou ua fa’agasegasea ma ua avea ma mea ua faigata ai ona tula’i ma fa’atino mana’oga tupito i le tagata lava i le tausiga o lona malosi ma lona soifua maloloina.”

O se tala lea a Saili Samoa, lea ua aoga tele lana fo’i pito la’au, ua amata ai ona fa’ava’ai, fa’ata’ita’i i tiute tau tausima’i, ma fa’atino gaoioiga uma lava e mafai ai ona fa’aosofia lo latou fia avea ma ni fanau e tau’avea mataupu fa’atausima’i i le Kolisi Tu’ufa’atasi o Amerika Samoa pe a mae’a latou a’oa’oga i A’oga Maualuluga o i ai.

Ina ua o’o atu i latou i le Hope House i le taeao ananafi, sa maua se avanoa e talanoa ai ia i latou, pe mata o se mea lea ua latou fia faia i le lumana’i?

“Ioe, aua o le olaga lenei, e ono o’o i matou ina matou toe fa’afo’i le tausiga i o matou matua pe afai o le a tino matutua i latou ma mama’i fo’i.” O se tali lea a le tama’ita’i o Azriel Tauvela mai le a’oga maualuga a Iakina i Iliili.

O Matelagi Lotovanu mai le a’oga Fa’asao Marist, sa ia fa’ailoa mai lona taofi, “O se mea ua ou manatu ou te fia iloa ona fai, ma e tatau lava ona fa’amasani i ai, ae o le taimi nei, e o i ai se tasi e matua i le matou fale o mo’omia lea tausiga lelei, peita’i, ou te iloa e i’u lava ina i ai so’u matua ou te fia tausia!”

E to’atasi lava le ali’i sa i ai, ma e tupuga mai i Filipaina o ia, ae na soifua ane i Amerika Samoa, Isideo Baha mai Samoana High, peita’i, sa ia fa’ailoa mai, “E tutusa lava tagata Samoa ma le matou fo’i atunu’u, ta te fia tausia ota matua pe afai o le a o’o ina mama’i mai, ma ua faigata ona toe o e ta’e’ele ma fai a latou mea’ai. O lea la, ou te fia iloa ai po’o tulaga uma lava e tatau ona ou sauni i ai mo le tausiga o tagata mama’i, ma o i lava fo’i e faia ai ma la’u filifiliga pe ou te fia avea ma Tausima’i po’o se Foma’i fo’i i lo’u olaga galue i le lumana’i.”

Ua fa’ailoa mai e Samoa, “E matua mo’omia lava ni Tausima’i Taulele’a Samoa, e te silafia, e mo’omia lava e nai o tatou matua ua tino vavai ma ua i apuluotofaga, nai a tatou fanau tino malolosi, e fa’amoemoe i ai i le si’ia o i latou i luga ma tu’u i luga o nofoa fa’ata’avalevale po’o moega fo’i!”

I le tulaga o i ai atunu’u uma lava o le lalolagi, ua tulaga ese le mo’omia o tagata ua maua tusi pasi i le Tausima’i, aua e mo’omia lava i so’o se falema’i i so’o se atunu’u o le lalolagi lea tautua aoga tele. O le totogi fo’i ua iloga ona lelei, pe a fa’atusa atu i nisi o ituaiga o matata o lo’o tausaili e nisi.

“E matua tele ma anoanoa’i avanoa mo Tausima’i i so’o se atunu’u e alu i ai, tau lava le mea o le i ai o lou tusi pasi tausima’i, e fa’afaigofie ona feso’ota’i nei malo ma iloga ai e moni lou agava’a! E le motusia la le galuega mo oe, pe afai o le a si’itia lou aiga e fia ola fo’i i fafo!”

O nisi nei o taumafaiga ua fa’atautaia e lea Ofisa o le AS-AHEC a le tatou Kolisi ina ia mautinoa, o malamalama le fanau i tuite ma faiva ae maise o avanoa lelei e mafai ona tauavea tonu ai e oe au a’oa’oga tatau mo lea kosi fa’a-Tausima’i, a’o fa’agasolo atu le soifua a’oa’oina o fanau talavou i le la’asaga o le Kolisi.

I le isi vaega atoa o lea latou a’oa’oga fa’apitoa lea, ua tima’ia ai fo’i i latou ina ia mua’i iloa fo’i e i latou ona tausia lo latou soifua maloloina lelei, a’o le’i alu atu e tausia gasegase i so’o se falema’i po’o nofoaga e pei o Fatuoaiga Hope House.

Ua fa’ailoa fo’i e Sister Fausitina, le ua va’aia fa’apitoa le Hope House, lona fiafia ina ua gasolo atu lea to’a 50+ o le fanau talavou e fa’aa’oa’o i ai tiute ma le fa’atinoga o nei tiute taua tele.

“O se fa’afetai ona e ola alolofa le autalavou lea, e ui ona e le o totogia i latou, ae o le tele agaga alofa ia i latou ua fiafia ai e usu mai, ma ofoina mai le latou tautua e tausia ai tatou tina ma tama matutua, ae maise o sui gasegase o le atunu’u o tausia fa’apitoa i’inei. O le Atua lava na te tausia ma fa’afailele o latou fa’amoemoe i le lumana’i, ae ou te fa’amanuia ma fa’afetaia tele i latou mo le latou fo’i tautua.”