Na matua faatumulia totonu ma fafo o le potu o Faamasinoga Faaitumalo i le taeao ananafi i a i latou sa taofia i le toese i le afiafi o le Aso Gafua ma le aso ananafi, aemaise ai a latou uo ma aiga na lolofi atu i le molimauina o a latou mataupu.

E silia i le 30 le aofai o i latou na taofia e Leoleo i le toese i Tafuna i le po a’o lumana’i le Kerisimasi faatasi ai ma le aso o le Kerisimasi, ona o tu’uaiga e aofia ai le ‘ona ma le faatupu vevesi, faamisa, faaoolima, gaoi, ave taavale ‘ona, faapea ai ma fanau laiti ua latou tagofia le ava malosi ae le’i atoa le ta’i 21 tausaga le matutua.

Mai lea 30 e to’aono na tuuaia i le ave taavale ‘ona; to’a 11 fanau laiti o lo o tu’uaia i le tagofia o le ‘ava ae le’i atoa le ta’i 21 tausaga le matutua; ma le isi to’atele o lo o tu’uaia i le faatupu vevesi, faamisa, faaoolima ma le gaoi.

O le toatele o i latou na taofia i le falepuipui na tatala i tua e aunoa ma se tupe e totogi, e toalua isi alii na toe tatala i tua ina ua manatu le malo e leai ni moliaga e faia faasaga ia te i laua.

O isi sa faatulaga e le faamasinoga tupe e totogi ona faatoa mafai lea ona tatala i tua, ona o lo o faamoemoe le malo e i ai moliaga faaopoopo e ono faila faasaga ia te i latou, ae o isi sa nofovaavaaia ae o lea ua toe molia mai i isi foi moliaga fou.

Na pau le faalavelave matuia na tulai mai i le vaveao o le aso o le Kerisimasi, o le faalavelave na tulai mai i Vaitogi i se misa ma tauai ai e ni alii se toatolu fale o ni aiga, ma manunu’a ai ni tagata, lea na loka mai ai Polagi Vaimoe, Tutuila Alolu ma Lester Sooalo.  O le isi toalua na manunu’a ai o Tala Tuitama ma Faatiu Amituana’i.

I faamaumauga a le faamasinoga o lo o taua ai e faapea, ao taaalo Amituana’i ma Tuitama i le piliaki, na faafuasei ona ulufale atu Vaimoe Alolu ma Sooalo i totonu e fia taaalo, e tau i ua le ‘onana, ma e leai ma se isi o le toatolu lea e masani i ai Tuitama ma Amituana’i.

Na taaalo le toatolu lea ma vaaia ai e Tuitama le tau leaga atu ai ma le ie o le laulau piliaki i le au alii ia, o lea na alu atu ai ma taofi i latou ma fai i ai, ua tatau ona o latou o ese ua lata le taimi e tapuni ai le fale piliaki.

Na laulau vavale i latou nei e toatolu ma i’u ina latou tauaia ai le fale piliaki, sosoo atu ai ma fale mautotogi a Sale Young.

O isi maa na tau i luga o le fale o Amituana’i, na mafua ai ona sau i fafo Amituana’i ma valaau mai i aualii ia, ina ia soia, peitai na togi e Polagi Vaimoe le ma’a ma misi ia Tuitama ae manu’a ai le ulu o Amituana’i, ma mafua ai loa ona tulai mai se fusuaga i le va o i latou nei, ma o lo o faaauau suesuega a leoleo e uiga i lenei mataupu.

E ui i le toatele o i latou na taofia i le toese i le Kerisimasi, peitai na saunoa le afioga i le Sui Komesina o le Matagaluega o Leoleo i le taeao ananafi, e leai ni faalavelave matuia na tutupu i le atunuu ao alo atu ai le atunuu i le faamanatuina o le Kerisimasi.

Saunoa le tofa a Leiseiau Laumoli e faapea, talosia ae faapea foi aso malolo o le Tausaga Fou i le vaiaso fou, i le leai lea o ni faalavelave matuia po o se soifua e maimau ona o ni faalavelave tutupu.

Saunoa Leseiau e faapea, o se tasi o itu lelei o lo o maitauina i le taimi nei, o le toalaiti lea o i latou o lo o taofia ma tuuaia i le ave taavale ‘ona.

“E ui lava e to’a laiti i latou sa taofia mai i le ave taavale ‘ona, ae o le fautuaga le atunuu, aua le tago i le ava ma ave le taavale, afai ua e tagofia le ava malosi, nofo lelei i le fale pe vili fo’i se taxi, ina ia taofia ai le ono tula’i mai o ni faalavelave matuia ao feagai ai le atunuu ma malologa o aso fiafia,” o le saunoaga lea a Leseiau.