Ads by Google Ads by Google

Silia i le $27 miliona aitalafu sa’o a le malo i le ASPA

O le po na soso’o ma le aso o le palotaga tele a le atunuu na se’i mavae atu nei, na faatoa faamanino auiliili ai e le Taitaifono o le Komiti Faafoe a le Faalapotopotoga o le Eletise ma le Suavai (ASPA) i le atunuu e faapea, e le $10 miliona le aitalafu a le malo i le ASPA e pei ona manatu ai le to’atele, ae $27,350,000 le saoga o le aitalafu o lo o i ai.

O lea tuu faatasiga e aofia ai pili o le eletise ma le suavai a vaega taitai uma o le malo e le o totogiina atu i le ASPA e aofia ai le Fono Faitulafono, Kolisi Tuufaatasi ma le Falema’i o le LBJ, faapea ai tupe ua uma ona faatulafono e totogi atu e le malo i le ASPA (subsidy) i tausaga taitasi, peitai ua tusa nei ma le 10 tausaga e le o toe totogiina atu lava e le malo ia vaega tupe.

O se faatalatalanoaga a le Komiti Faafoe a le ASPA i luga o le alaata faasalalau a le malo, le KVZKTV e faamanino so latou finagalo e faatatau i le mataupu o le ‘veto override’ lea na palota i ai le atunuu i le aso Lua na te’a nei, na aofia atu ai loa ma le mataupu i le aitalafu a le malo i le saunoaga a le susuga Rev. Asaua Fuimaono, o ia lea o le Taitaifono o le Komiti Faafoe a le ASPA.

 I le faaiuga o le palota a le atunuu i lenei tausaga e faatatau i le mataupu o le ‘veto override’, ua manumalo ai le manatu ina ia taoto pea le tulaga o le Faavae o lo o i ai, nai lo le taumafai e sui.

O le fesili pe tuu atu i le Fono Faitulafono le malosi e sui ai se faaiuga a le kovana na te teena ai pili na pasia e le Fono, e to’a 7,177 na palota ‘leai’ ae toa 5,854 na palota ‘ioe.’

Ae i le saunoaga a Rev. Asaua a’o lumana’i ai le palotaina o lenei mataupu, sa ia taua ai e faapea, afai e manumalo le palota ioe e sui le Faavae, o le a tele le afaina o le ASPA, ona o lo o tumau pea le talitonuga o le Fono e avatu le malosi ia te i latou e pulea ai le Paketi a le ASPA.

“O lea lava e finau mai le Fono e tuu atu le malosi lea ia te i latou, ae le o malamalama le atunuu i le tele o tupe o lo o nofo aitalafu ai le Fono ma le malo i le ASPA, ona faitio mai lea o le atunuu i le ASPA ae le o malamalama i le isi itu o le faafitauli,” o le saunoaga lea a Rev. Asaua.

  Na faamanino e Rev. Asaua e faapea, o le tupe lea e aitalafu ai le malo i le ASPA mo le eletise e $9.6 miliona, e le o aofia ai i totonu le aitalafu a le LBJ i le eletise e $1,380,000, ma le aitalafu a le Kolisi Tuufatasi e $432,000.

O le isi aitalafu a le malo i le ASPA e ese mai i le eletise, o le ‘subsidy’ lea ua uma ona faatulafono, e totogi atu e le malo e faatino ai galuega a le ASPA i tausaga ta’itasi, peitai e le o toe totogiina atu lava e le malo lea vaega tupe talu mai le tausaga e 1992.

Talu mai la le taimi lena e oo mai i le taimi nei, ua $10,600,000 le tupe o le ‘subsidy’ fai mai le ASPA sa tatau ona totogi atu e le malo ia i latou, peita’i ua taofia.

“A tuu faatasi la aitalafu uma nei a le malo i le ASPA, e tusa ma le $27,350,000 le tupe sa’o lava o lo o nofo aitalafu a le malo, ae o le $10 miliona lea matou te augani atu e totogi mai, ua na o sina vaega lena o le aitalafu mo le eletise, matou te mana’omia le totogi mai ina ia fesoasoani ai i le faatinoina o a matou galuega mo le atunuu,” o le saunoaga lea a Rev. Asaua, ma faaiu ai lana saunoaga i lona fautuaina lea o le au palota, ina ia palota leai i le mataupu e faatatau i le ‘veto override’.

I se ripoti na tuuina atu e le ASPA i luma o le Fono Faitulafono ina ua iloiloina lana paketi i le aso 11 Setema 2012, sa taua ai le aitalafu a le malo i le eletise e $8,747,952.84, ona faaopoopo lea i ai o le aitalafu a le LBJ e $1,118,080.33 ma le Kolisi Tuufaatasi e $831,359.64, ona maua lea o le tuufaatasiga atoa o le aitalafu e $10,497,392.81.