Ua taula i le uafu a le Tri Marine International le “Cape Ferrat” o le va’a fagota purseiner, e na’o le 18 aso na fagota ai ae tumu lana uta e 150,000 tone o le uta o le i’a mo le Tri Marine.

Sa taunu’u mai i le vaiaso ua te’a ma auina atu i le Hope House ma patele o le Ekalesia Katoliko le fesoasoani o ‘ia tetele e sefulu. O le susuga ia John  Cabral o le kapiteni o le ‘Cape Ferrat’, ma e faaipoipo i se tamaitai Samoa e suafa ia Lagasami To’omalatai o Matautu i Samoa ma Aua i Amerika Samoa.

O le po anapo na malaga ese ai Cabral mai le teritori mo le lona aiga i Uosinitone ae o lo’o i le teritori le isi ona atali’i o George Cabral, o se tasi i luga o le Cape Ferrat.

I se tala fiafia a Cabral, sa ia fa’ailoa auiliili mai ai i le Samoa News, “O le maua o lea fa’aeaga e le’i faigofie e avea ma kapiteni sili, aua e to’atele i matou o Kapeteni o le vasa, ua masani i le faiva o le fagota, toe lelei fo’i matou masaniga ma matou auva’a, peita’i, e le’i faigofie ala i lea fo’i manuia.”

Ina ua fesiligia, ae ia fa’ailoa mai, “Ua fitu tausaga o avea ma Kapeteni, ae ua fa ai lenei o tausaga, o lo’o o’u mauaina lava le fa’ailoga a le Tri Marine, Kapeteni sili ona tele a’u i’a e fagotaina, ma e tele fo’i le tupe e maua ai a le Tri Marine, ma le ali’i pule sili ia Renato Curto.”

O le aiga o Cabral, e to’alima o la’ua alo ma Lagasami. Na fa’aipoipo i la’ua i Samoa i le tausaga e 1989, peita’i na fetaui lava i la’ua i Amerika Samoa i le 1987 a’o avea o ia ma ali’i fagota. E fa tama ae to’atasi lava le tama’ita’i o Christine, peita’i o lona atali’i e pito i le ui’i, George Cabral lea e soa mai lava ma si ona tama i lana galuega ma faigaluega ai o se tasi o lana ‘auva’a.

O sana tala e tusa o le la’ua mafutaga ma le fanau, sa ia fa’ailoa mai ai, “O la’u galuega sa ou fagota, ae o Lagasami sa faigaluega i le Rainmaker Hotel e tautu i le fale’aiga. Na amata mai le ma’ua aiga o feoa’i solo ma le fanau i le pasi, tama’i pasi lava a Aua, peita’i, i le taimi nei, ua fealua’i le tina ma le fanau i le Escalade Hybrid. Ai ua galo i la’u pele lena mea?” O lana tala lea ma ata.

O se tala a George Cabral sa ia fa’ailoa ai, “O a’u ia o le Samoa, e fealua’i lava ae iloa ala o i’a, o iinei lava sa fanau ai ma amata atu ai le matou aiga. O a’u fo’i lea e ta le pe’a i le tau’au sa faia e le “off da rock”. Ou te fiafia lava ma te o mai ma si ou tama, aua o tama lava o le vainu’u lea o Aua ma Satala.”

I lana auva’a, e to’atasi lava le ali’i Samoa o lo’o auai i le Cape Ferrat - Iulio Sapata, peita’i, e fa’amoemoeina lava o ia e George ma lona tama, aua o tama lava o le eleele. Ina ua fesiligia pe aisea ua le to’atele ai ni Samoa i lana auva’a, ae tali Capt. Cabral, “E matua mafiafia i alo o Samoa e galulue i luga o va’a ma avea ma auva’a, le o’o mai loa o le va’a, le toe o mai loa e faigaluega. Ua galo le galuega pe a toe va’ai i aiga, ae le iloa e matua tele lava fa’alavelave.”

E matua manino lava le fa’alavelave faaSamoa na sipela mai e Cabral.