Silia i le 100 Aufai Faatoaga na lesitala i le Fa’aaliga

E silia i le to’a selau le aofa’i o le aufai faatoaga mai itu eseese o le atunuu na mafai ona lesitalaina o latou suafa, i le Faaaliga a le Aufai Faatoaga sa faagasolo mo le lua aso, ma tapunia ai i le aso Lulu na te’a nei.

 

Ae le’i tapunia le faaaliga,  na taua ai e le afioga i le kovana sili ia Lolo Moliga e faapea, e lua lava auala o faamanuiaga na aumai e le Atua mo Samoa, o le sami ma le laueleele, ma ua ia manatu fo’i, o auala ia e lua o lo o fau ma soloi ai faamanuiaga a le Atua mo Samoa i le taimi nei.

 

“E foliga mai o lo o soifua le atunuu i luga o si tama’i ma’a, nai ou laueleele e faitau i alofilima, o si ou sami ua na o se vaega itiiti, ae o iina o lo o i ai faamanuiaga a le Atua ia Samoa, lea e pei ona tatou molimauina i le anoanoa’i o fua o faaeleelega ua la’u mai e le atunuu i lenei faamoemoe,” o le saunoaga lea a le alii kovana.

 

Saunoa fo’i Lolo e faapea, o galuega uma o lo o faatinoina e le aufai faatoaga, aufai faiva faapea ai le vaega o lo o gaosiina galuega taulima, o lo o tutu faatasi i latou i le fausiaina o se tamaogai mautu ma lelei mo le atunuu.

 

“O la outou pito laau tausi i aso taitasi, ua atagia mai ai le i ai ia te outou o le manuia ma le tamaogai mo le atunuu. Faafetai mo galuega lelei, faamalo fo’i le galulue faamalolosi,” o le saunoaga lea a le alii kovana.

 

E to’atele atu i latou ua lesitala i le Faaaliga o le tausaga lenei nai lo le tausaga ua mavae, e pei ona faamaonia mai e Lealao i le Samoa News, ina ua fesiligia o ia i le tulaga sa i ai le Faaaliga a le Aufai Faatoaga i lenei tausaga.

 

Na taua e Lealao e faapea, i le faaiuga ai o le Faaaliga o lenei tausaga, ua maitauina ai le faatupulaia o le aofa’i o le aufai faatoaga ua latou toto le talo ma faatau atu i le polokalame o le School Lunch a le Ofisa o Aoga, lea o lo o faatupe mai e le malo feterale.

 

E ese mai i le talo, ua vaaia foi le toatele o isi aufai faatoaga ua latou toto isi ituaiga faatoaga eseese e aofia ai ma fualaau taumafa mata.

 

“O le agaga atoa o le malo ma lenei faamoemoe, ia aua ne’i mativa le atunuu i taumafa, a ia faaaoga tatau eleele na tuuina mai e le Atua mo Samoa,” o le saunoaga lea a Lealao.

 

Na taua e le Faatonusili Lagolago a le Ofisa o Faatoaga ia Peter Gurr e faapea, o se tasi o mafuaaga na ala ai ona unaia le malo e faataunuu le polokalame lenei, ina ua maitauina o le 95% o fualaau ‘aina taumafa mata aemaise ai faatoaga e pei o talo o lo o maua i le atunuu e aumai i maketi i fafo.

 

Ae ina ua unaia e le matagaluega le aufai faatoaga ina ia toaaga e toto faatoaga, sa maitauina ai loa le toatele o le aufai faatoaga ua lesitala i polokalame a le Matagaluega, ma ua amata ona latou toto faatoaga eseese i le atunuu.

 

“O le tausaga na te’a nei, e silia i le $1miliona le tupe sa faaalu e le polokalame o le School Lunch e totogi ai le aufai faatoaga a le atunuu, sa faatau atu fua o a latou faaeleeleaga i le polokalame o taumafa mo le fanau aoga, ma o se vaega tupe tele lea ua tumau i totonu o le teritori,” o le saunoaga lea a Gurr.

 

I le tapunia ai o le faaaliga a le aufai faatoaga, na saunia ai loa e le Ofisa o Faatoaga faailoga mo i latou uma sa lautogia mo lenei faamoemoe, ma ua faamoemoe o le vaiaso fou e tauaaoina ai e le aufai faatoaga a latou faailoga mai le Ofisa o Faatoaga i Tafuna.

Comment Here