Ads by Google Ads by Google

Silia 700 tagata ua talia lalo polokalame NEG

O se tala fiafia mo le malo aemaise ai le toatele o tagata sa tau saili ni galuega, ina ua fa’alauiloa e Kovana Togiola Tulafono le silia i le to’a 700, ua talia i lalo o le polokalama fou a le NEG, po o galuega mo le toe fa’aleleia o mea sa fa’aleagaina i le galulolo, lea o lo o fa’aauau pea ona fa’atupe mai e le malo tele o Amerika.

Na fa’alauiloa foi e le kovana le mafai ona fa’atupe o galuega lautele ina ua faamatuu mai e le Vaega o Fela’uaiga a le malo tele se vaega tupe e $10.7 miliona, ona o talosaga sa tuuina atu i ai ina ua tuana’i le galulolo ia Setema 2009.

O le polokalame lenei e na o le tolu masina le umi, peitai na saunoa Togiola, o se itu lelei lea mo le atunu’u o lo o saili galuega, e mafai ai ona maua se isi alagatupe e fesoasoani ai i aiga.

E tusa ai ma se ripoti na tu’uina mai e se sui o le Ofisa o le NEG e le fa’atagaina ona ia fa’amatu’u mai fa’amatalaga faapenei na taua ai, o le Aso Toonai na tea nei na faia ai foi le isi suega i le fale ta’alo a le ASCC, e sailia ai galuega.

Na fautuaina e Togiola i latou uma ua talia i le polokalama ina ia fa’aaoga tatau le avanoa ua maua, ma ia faamaoni i le galuega.

“Afai ete faamaoni i lau galuega ua tuuina atu, e i ai le avanoa e mafai ai ona faatumauina oe e le kamupani poo le fale faigaluega lena ua e galue ai, ae afai ete le faamaoni, o lona uiga e maea lava le 3 masina ma maea atu ai ma lou avanoa,” o le lu’i lea na tuuina atu e le kovana i le atunuu ua maua avanoa e galulue ai.

Ae mo galuega ia ua faatupe mai i lalo o le vaega tupe fesoasoani mai le Vaega o Felauaiga, ua faamaonia mai ai le aofai o galuega ua faamoemoe e faatinoina ai i le 26.

O lea aofaiga e aofia ai galuega e 4 ua maea ona fausia, lea sa faaaluina ai e le malo le tupe e $1.5 miliona, e 4 isi galuega o loo faaauau pea i le taimi nei lea e tusa ma le $6.2 miliona le tau aofai.

E 7 isi galuega ua amata ona tapena mo le faasalalauina atu i konekarate e tauofo atu ai, ma galuega e 11 o loo faaauau pea ona tapena ma fuafua ma le faamoemoe, e tatau ona amata faasalalau mo tauofoga i le faaiuga o le tausaga  tupe lenei 2012, ma amata fausia ai loa i le tausaga tupe e 2013 ma faaauau atu ai i le 2014.

Saunoa le alii kovana, o galuega e 11 o loo faagasolo i le taimi nei le tapenaina, o galuega tetele uma ia a le malo, ma e manaomia foi se taimi umi e tapena ma fuafua lelei ai, ma o nisi o nei galuega e aofia ai le faaleleia o auala, taligalu ma auvai.

O loo tele pea faasea mai le atunuu tauala atu i le fono faitulafono faapea ai luga o le polokalame a le alii kovana, i le tele o vaega o le alatele ua agai atu ina matuia lona faaleagaina, ma ua fai ma itu e faaleagaina ai taavale a nisi o le atunuu.

O le faaauau pea o faaletonu i auala ua mafua ai ona faaaoga e nisi o afioaga ma’a e faatutumu ai omoomo i totonu o le auala, ina ia faafaigofie ai e taavale ona uia.

O le taeao ananafi na talosagaina ai e le afioga i le alii faipule ia Faimealelei Anthony Allen le Fofoga Fetalai, ina ia talosagaina le Faatonusili o Galuega a le malo e tuuina atu se ripoti mae’ae’a a lana matagaluega i le faasologa o galuega o auala ua oo i ai le latou faatinoga i le taimi nei.

Saunoa Faimealelei, o le taligalu o lona nuu o Aua na folafola mai e le Faatonu e amata ona fausia i le masina o Setema na te’a nei, peitai o lea ua tuana’i masina e fa e lei tupu lava se mea. E oo foi i isi galuega sa folafola e le Faatonu o le a faia, e oo mai lava i le taimi nei e leai lava se mea.