Ads by Google Ads by Google

Silia 700 mataupu tau solitulafono na su’esu’e leoleo Kuata 1

I le Kuata 1 o le Tausaga Tupe lenei 2016, e silia i le 700 mataupu tau solitulafono eseese na mafai ona su’esu’eina e le Ofisa o Leoleo, e pei ona taua i totonu o le latou Ripoti o Galuega Fa’atino sa tu’uina atu i le Ofisa o le Kovana Sili, lea fo’i ua tauaao e le Fono Faitulafono.

 

O le Ripoti mo Galuega Fa’atino a Matagaluega ma Ofisa Tumaoti a le malo i Kuata ta’itasi o le Tausaga Tupe, e mafai ai e le Ofisa o le Kovana ona malamalama i galuega ua mafai ona ausia e Ofisa eseese a le malo, atoa ai ma le tulaga o tupe ua fa’aalu fa’apea ai tupe sa maua, aemaise ai tupe o lo o totoe.

 

O kopi o ripoti mo Kuata taitasi e tu’uina mai i luma o le Fono Faitulafono mo a latou galuega ma fa’amaumauga, lea la e pei ona i ai le ripoti o galuega o le Kuata 1 ua mae’a atu, lea e aofia ai le masina o Oketopa e oo mai ia Tesema 2015.

 

Mai mataupu e 709 sa tali atu i ai le ofisa o leoleo, o le 339 o ia mataupu o mataupu tau solitulafono, 234 o mataupu tau ta’avale afi, 197 mataupu e aofia ai fa’alavelave tau ta’avale, 37 o mataupu i le ave ta’avale ‘ona, 14 mataupu e fa’atatau i fanau talavou latou te tagofia le ‘ava malosi, ma mu e 7 na tutupu mai i le atunu’u.

 

O solitulafono e lima pito i ta’atele o lo o aofia i le lata i le 339 mataupu sa su’esu’e e leoleo, e pei ona taua e le Komesina o Leoleo ia Save Liuato A. Tuitele i lana ripoti, e aofia ai le Fa’atupu vevesi i nofoaga faitele i le aofa’i e 117; 63 mataupu tau fa’ao’olima; 40 mataupu tau gaoi; 37 mataupu tau talepe fale, ae 38 mataupu tau i le fa’aleagaina o meatotino.

 

E 70 mataupu fou tau solitulafono sa su’esu’eina e le Ofisa Su’esu’e a Leoleo (CID). O le 28 o ia mataupu o lo o fa’atali i ai se fa’aiuga, 19 mataupu ua tapunia, 11 mataupu ua tuuina atu i luma o le fa’amasinoga, 12 mataupu o lo o fa’aauau pea, ma mataupu e 19 ua le mafai ona maua.

 

O ni isi o galuega o lo o fuafua le Ofisa o Leoleo e tatau o na ausia ma fa’ataunu’u i lenei tausaga, e aofia ai le fa’amae’aina lea o le Falepuipui mo ali’i na amata fausia mai i le masina o Setema 2014 i lalo o se vaega tupe e silia i le $3 miliona mai le Ofisa o le Initeria, fa’aleleia o le tautua a le Ofisa o Ta’avale Afi (OMV) i Tafuna i le tulaga o laisene ave ta’avale, fa’apea ai ma le taumafaiga ina ia i ai ni isi leoleo e toe fa’aopoopo i le galuega.

 

O se taimi o le tausaga lenei e pei ona taua i le lipoti o lo o fa’amoemoe e tatau ona mae’a ai le galuega o le Falepuipui fou o lo o fausia, e pei ona ausia le 95% o le galuega mo le fa’amoemoe e tausi ma nonofo ai pagota ali’i e to’a 124.

 

E $3,117,208.66 le aofa’i o le tupe na fo’i mai e le Ofisa o le Initeria i lalo o le polokalame a le Vaega Tupe mo Galuega Tetele (CIP Program) a le malo o lo o fausia ai lenei galuega.

 

Mo le tautua a le Ofisa o le OMV mo laisene ave ta’avale, o lo’o taumafai pea le Ofisa ina ia fa’aleleia lea tulaga, ina ia mafai ai ona fa’aaoga le laisene ave ta’avale pe a malaga i fafo.

 

I le tulaga o leoleo fa’aopoopo, o lo o galulue pea le Ofisa o Leoleo ma le Ofisa o le CJPA mo se vaega tupe e mafai ai ona fa’afaigaluega ni isi leoleo fou i lalo o se vaega tupe fesoasoani mai le feterale, e fesoasoani ai i le fa’aleleia atili o le tautua a Leoleo i le atunu’u.