Ads by Google Ads by Google

SILIA 30 TAGATA FA’AMAMA I’A UA GALULUE TRI MARINE

TALITONU TOGIOLA I FUAFUAGA A LE TRI-MARINE

O 'upu e pei o le ‘talitonu’, ‘fa'agae'etia’, ‘fa'afiafiaina’ ma le ‘maoa’e’ na fa'aaoga e Kovana Togiola Tulafono e fa'amatala ai ona lagona i le tulaga lea ua tula’i mai ai le kamupani o le Samoa Tuna Processors (STP), o se lala o le kamupani tu'u'apa o le Tri-Marine ma ana galuega fa'atino i lenei taimi o le tausaga.

I le taimi lava lea e tasi, e silia ma le to'a 30 tagata ua fa'afaigaluega e le kamupani a le Samoa Tuna Processors mo le fa'amamaina lea o le tino o le i’a lea ua latou auina atu nei i maketi i fafo e pei o Iapani ma Kalefonia, o le la'asaga muamua lea o la latou tautua lea ua tatalaina nei.

E pei ona silafia, o le nofoaga tuai lea sa i ai le kamupani i’a o le COS Samoa Packing i Atu'u, lea ua toe lisiina atu e le malo mo le kamupani i’a o le Tri-Marine mo le umi e 30 tausaga.

O le aso Tofi na te'a nei na asia ai e le ali'i kovana le nofoaga a le Tri-Marine, mo le mata'ituina lea o ana galuega ia ua amata ona fa'ata'atitia e aofia ai le fa'amamaina lea o le i’a lea ua auina atu nei i fafo e gaosi ai mea'ai i vaega 'ese'ese o le malo tele e pei o Hawaii.

Sa i ai i lea asiasiga sui o le Tri-Marine e pei o le ali'i Pule ia Joe Hamby, atoa ai ma le Sui Peresetene ia Dan Sullivan, ma sui o le lala o le kamupani lea o le a fa'atautaia galuega i le nofoaga 'autu i Atu'u, le Samoa Tuna Processors.

O tagata faigaluega e silia i le to'a 30 lea ua galulue nei e le STP o lo o aofia ai ma leoleo ia o lo o galulue fai sifi mo le mata'ituina o le saogalemu o le lotoa atoa i so o se taimi, ao fa'atinoina ai galuega a tagata faigaluega.

Na matauina i lea asiasiga e le Samoa News le galulue o tagata faigaluega i le fa'amamaina lea o le tino o le i’a a’o le’i tu'uina atu i totonu o pusa, ma fa'asolo atu ai i totonu o container mo le auina atu i fafo.

O i’a nei o lo o tu'u pusa e le STP e maua mai i va'a fagota o lo o latou fagotaina le i’a ma auina atu i le kamupani, ma o ni isi nei o moemitiga sa fa'ailoa e le kamupani i le ali'i Kovana i tausaga ua mavae, o le a mafai ona maua ai se fesoasoani e pei o galuega, atoa ai ma le aufai va’a fagota, i le auina atu lea o le a'ano o le i’a e fa'aaoga i faleaiga i fafo mo taumafa.

O le i’a o le ‘moon fish’ lea o lo o fa'aaoga mo le tautua lea, ona auina atu lea i le va'alele  lea o lo o malaga mai i vaiaso ta’itasi mo le auina atu o meli i Amerika Samoa, ma kiliva atu ai loa pusa i’a nei i maketi i fafo ma fa'atau ai.

O se tasi o vaega na maofa ai le ali'i kovana o le galuega mo le fausiaina o lea Fale Aisa fou a le kamupani, lea o lo o galulue ai le konekarate a le Paramount Builders i le tatalaina lea i lalo o le fale aisa tuai sa fa'aaoga e le Samoa Packing, ae fausia ai le fale aisa fou a le STP, lea e silia i le 5,000 tane (ton) le mamafa po o le tele o i’a e mafai ona teu ai i totonu.

Ina ua fesiligia e le Samoa News le afioga i le ali'i Kovana i sona lagona e tusa ai ma atina’e ia ua fa'alauiloa mai e le Tri-Marine, na ta'ua ai e Togiola e fa'age'etia o ia ona o le tulaga lea ua i ai gaoioiga a le kamupani.

Saunoa Togiola, e maofa lona loto i 'auala ia ua fa'aaoga e le kamupani  e fa'atino ai suiga ma la'asaga mo lana tautua i le atunu'u, e pei o le amataina lea o galuega mo le fa'amamaina o i’a lea ua auina atu i fafo mo le fa'aaogaina i kuka, atoa ai ma le galuega mo le fausiaina lea o le Fale Aisa a le kamupani i le nofoaga tuai sa i ai le fale aisa a le Samoa Packing lea ua tatala i lalo.

“O galuega nei ua ou va'ai ai i le aso ua atagia mai ai le tulaga mautu o fuafuaga a le kamupani ua aga'i atu ai, mo le fa'ataunu'uina lea o ana moemitiga e pei ona folafola mai i le ulua’i taimi na taunu'u mai ai,” o le saunoaga lea a le ali'i kovana i le Samoa News, ao fa'afofoga i ai sui o le kamupani a le Tri Marine ma le STP.

“E le gata o lea ua maua galuega mo ni isi o le atunu'u mo le fa'amamaina o le i’a mo le auina atu i fafo, ae o lea fo'i ua vavala mai ai se tulaga manuia mo le aufai va’a fagota, ae maise ai o le aga'i pea i luma o fuafuaga a le kamupani i lona aotelega, ma o se tulaga lea e lagona ai lava e a’u o le ta’ita’i le lagona fa'agae’etia ma le fiafia,” o lana saunoaga lea.

O le tele o fesili e pei ona fesiligia ai e le Fono ma ni isi o le atunu'u le ali'i kovana, po o afea e tatala ai le kamupani o le Tri Marine, ae o le a fo'i se tulaga ua i ai galuega mo le toe fa'aleleia o le nofoaga sa i ai le Samoa Packing, na saunoa ai le ali'i Kovana e fa'apea, o lea ua tali le tele o fesili e pei ona tu'u fesili ai le atunu'u, aua o lea ua aga’i ina tino mai galuega a le kamupani.

Na ta'ua e se ali'i o lo o galue ai i le STP i le taimi nei e fa'apea, o se tulaga fiafia ina ua mafai ona toe maua le avanoa e galue ai i le kamupani.

Na ta'ua e le ali'i lea, o ia sa galue muamua i le Samoa Packing, peita'i o lea ua maua le avanoa e fa'aauau ai lana tautua mo le STP, ma o se 'auala ua maua ai se fesoasoani tau tupe mo ia ma lona aiga.