E silia i le 2,000 koko ua maea ona toto e ni isi o le aufai faatoaga a le atunuu i le palapala, ma le faamoemoe o le a tele atu ni isi koko e toe toto i faatoaga a isi fai faatoaga mo le tausaga fou.

I se faatalatalanoaga a le Samoa News ma le afioga i le Faatonusili o le Matagaluega o Faatoaga ia Lealao Mel Purcell, sa ia faamaonia mai ai le tulaga manuia ua i ai le atina’e o le koko i Amerika Samoa.

“O le faanaunauga maualuga a le Matagaluega, ia tele le koko e tuu i lalo o le palapala, ina ia mafai ai ona taunuu le sini na mafua ai ona amata lenei atina’e, o le faaleleia lea o le atina’e koko i le atunuu ma fesoasoani ai i le aufai faatoaga,” o le saunoaga lea a Lealao.

O le vaega tupe e silia i le $200,000 na aumai i le Matagaluega o Faatoaga a le malo tele (USDA), lea o lo o faatupe ai le polokalame lenei e pei ona faamaonia mai e le tofa Lealao, ma le faamoemoe autu, o le koko lenei o le a mafai ona auina atu i maketi i fafo mo le gaosiina o le sukalati.

“O le agaga maualuga ia naunau ma fiafia le aufai faatoaga e toto le koko, ina ia suia ai foi isi ituaiga faatoaga e toto e le atunuu, e ese mai i le talo, fa’i ma togalaau aina,” o le saunoaga lea a Lealao.

E 2,122 le aofai o koko ua maea ona tufatufa atu i le aufai faatoaga, ma ua maea foi ona toto i le palapala.

E 8 le aofa’i o fai faatoaga ua maea ona tufatufa atu i ai koko mo le totoina, ma le faamoemoe o le Matagaluega e tatau ona oo atu i le tausaga fou ua faaopoopo le aofai o le aufai faatoaga e tufatufa atu i ai koko mo le totoina.

O le toga koko pito sili ona tele koko o lo o toto ai, o le toga koko a le afioga a Sili Sataua i Fagasa, lea e 582 le aofai o koko ua uma ona toto, sosoo ai ma le toga koko a le afioga i le alii Senatoa ia Alo Dr. Paul Stevenson, lea e 396 o lo o toto i lona fanua i Fagasa ae 184 o lo o toto i lona fanua i Pago Pago.

E tolu isi toga koko e tai 200 koko ua maea ona toto, o latou ia e aofia ai Tuilefano Vaelaa o Malaemoa; Duke Purcell  o Tafeta ma Keniseli o Vaitogi.

O isi fai faatoaga koko sa faamanuiaina i koko ua toto e aofia ai Mua Soli Ofoia o Vaitogi ma Lelei Peau o Malaeimi, lea e ta’i 150 a la koko, ma Peleti Sakaria o Fagali’i e 60 ana koko.

Na taua e ni isi o le aufai faatoaga le manaia o le atina’e lenei, ua mafai ai ona toe faaolaola le laau o le koko i faatoaga a tagata.